Deuteronomio 4 - Kalin Apo Dios

Nan Nang-ibagaan Moses Isnan Israelita Ta Managtongpalda 4:1-14

¹ Kinwanin Moses ken daida en, “Tongpalenyo am-in nan linteg ay ibagbagak ken dakayo ta matagotago kayo et awnit kowaenyo nan daga ay idyan nan apo ay Dios din alal-apoyo.

² Adiyo an-anayan nan ibagbagak ken dakayo ya adiyo keskesayan. Tongpalenyo nan bilbilin nan apo ay Diosyo ay ibagbagak ken dakayo.

³ Dakayo mismo nan nang-ila isdin inikkan nan apo isnan bilig ay Peor tay pinateyna am-in nan Israelita ay nangdayaw ken Baal ay sinangdidios di Canaan.

⁴ Ngem dakayo ay egay nangdokdokog isnan apo ay Diosyo et daan kayo ay matatago enggana id wani.

⁵ Inbagak ken dakayo am-in nan linteg ay kaneg nan inbagan nan apo ay Diosko ay ikkak tapno tongpalenyo no wada kayo et isnan daga ay ngannganiyo gowaden ay menteeanyo.

⁶ Tongpalenyo ay ostoosto et awnit siya na nan mang-ipaila isnan ipogaw isnan tap-in di il-ili isnan kinasilibyo ya nan kinamanakaawatyo. No dengngenda nan am-in ay linteg ay naayda et awnit kananda en, ‘Ay, ay obpay nan naayda ay Israelita. Masilib ya manakaawatda.’

⁷ Tay maiwed ili ay olay no napatepateg is waday Diosda is kaneg nan Dios tako ay kanayon ay bomadang no masapol tako. Badangana datako isnan tonggal mendawatan tako ay menpabadang ken siya.

⁸ Ya maid gedan ili ay olay no napatepateg is waday lintegda is kaneg nan katet-ewan nan ibagbagak ken dakayo id wani.

⁹ Isonga masapol ay makailanyo ta adiyo kalkalingkingan nan inil-ilayo enggana ay matatago kayo. Ibagbagayo isnan an-ak ya ap-oyo

¹⁰ nan maipanggep isnan agew ay tinmakdeganyo isnan apo ay Diosyo isnan bilig ay Sinai isdin nangwaniyana ken sak-en en, ‘Dagopem nan sanada ay ipogaw. Kaytek ay dengngenda nan kanak tapno solowenda ay mangpati ken sak-en isnan matatagowanda ya tapno ibagbagada isnan an-akda ta tongpalenda abes sak-en.’

¹¹ Ibagayo ken daida din tinmakdeganyo isnan poon di bilig dapay nakobotan nan bilig is mensede ay asok di menbidbidang ay apoy.

¹² Ibagayo gedan nan nakikaliyan nan apo ken dakayo isnan menbidbidang ay apoy ay nangdengnganyo isnan kalina dapay maid polos mailayo ken siya.

¹³ Inpagtekna ken dakayo din tolagna ya nan osto ay ikkanyo ay mangtongpal isnan simpoo ay bilin ay insolatna isnan dowa ay nadadampig ay bato.

¹⁴ Inbagana en isolok am-in ay linteg ay masapol ay tongpalenyo isnan daga ay ngannganiyo menkowa.”

Nan Ommat No Mendaydayawda Isnan Sinangdidios 4:15-24

¹⁵ Dat itoloy Moses ay mangwani en, “Isdin nakikaliyan nan apo ken dakayo isnan menbidbidang ay apoy isnan bilig ay Sinai et maid polos nailayo is menkalkali isonga makailanyo

¹⁶ ta adi kayo menbasol ay somapsapo is tinagtago is kompolni ay ila ay kaneg nan ipogaw,

¹⁷ animal wenno mentaytayaw

¹⁸ ya nan kompolni ay menkodkodong isnan lota wenno nan wada isnan danom.

¹⁹ Adi kayo maaw-awis ay mangdaydayaw ya mensilbi isnan mail-ilayo isnan daya ay kaneg nan agew, bowan ya nan taltalaw. Inippey nan apo ay Diosyo dana ay daydayawen nan tap-in di ipogaw.

²⁰ Ngem dakayo nan insalakana id Egipto isnan dadama ay ligatyo ta menbalinena dakayo ay ipogawna ay kaneg id wani.

²¹ Et gapo ken dakayo, nakaliget nan apo ken sak-en danat isapata en adiyak makigdang isnan Ginawang ay Jordan ay omey isnan maloweb ay daga ay idyan nan apo ay Dios tako ken dakayo.

²² Awnitak matey isna et adiyak makigdang isnan deey Ginawang ay Jordan. Ngem dakayo et gomdang kayo ay omey mentee isnan deey maloweb ay daga.

²³ Makailanyo ta adiyo kalkalingkingan nan nakitolagan nan apo ay Diosyo ken dakayo. Tongpalenyo nan bilina ay adi kayo somapsapo is kompolni ay ila ay sinangdidiosyo.

²⁴ Tay nan apo ay Diosyo et dadama nan kabaelana ay mendosa ay kaneg nan menbidbidang ay apoy et adyana ay waday maiyis-iso ken siya.”

Nan Israelita Nan Pinilin Nan apo Ay Ipogawna 4:32-40

³² Dat itoloy Moses ay mangwani ken daida en, “Nemnemenyo pod nan inommat id kasikasin. Enggana isdin nangboliwan Apo Dios isnan ipogaw, ay waday kaskasdaaw is inom-ommat ay kaneg nan inommat ken dakayo? Ay waday nakadnge is kaneg na? Waay maid met.

³³ Ay waday teken is ipogaw ay nakadnge isnan kalin di dios isnan menbidbidang ay apoy dapay daan ay natatago ay kaneg ken dakayo? Maid gedan.

³⁴ Ay waday teken is dios is nang-ikaan isnan kaipoipogaw ay itoltolayan di teken ay ili ay kaneg nan inikkan nan apo ay Diosyo id Egipto? Inilayo met nan nangpaligatana ken daida isnan nang-ikkanana isnan kaskasdaaw, kaeegyat ya nan nanggobatana ken daida gapo isnan panakabalina.

³⁵ Inpailan nan apo am-in dana ken dakayo ta manggetkanyo ay nan apo nan Dios et maid teken nodi kedkedeng siya.

³⁶ Inpadngena ken dakayo nan kalina ay nagapo id daya tapno maisolowan kayo. Dat isnan batawa et inpailana ken dakayo nan menbidbidang ay apoyna ya nakikali ken dakayo isnan tengana.

³⁷ Gapo tay linaylayadna din alal-apoyo et pinilina dakayo ay ap-oda ay men-ipogawna. Dat siya mismo nan nang-ikaan ken dakayo id Egipto isnan pilmi ay kabaelana.

³⁸ Et siya gedan nan mang-ipakaan isnan tap-in di ipogaw ay napigpigsa mo dakayo ta dakayo nan mangtawid isnan dagada ay kowayo id wani.

³⁹ Isonga nenemnemenyo na id wani ta adiyo kalkalingkingan ay nan apo et siya nan Dios isnan daya ya isnan batawa ay maid teken.

⁴⁰ Dayopay tongpalen nan linteg ya bilbilina ay ibagbagak ken dakayo id wani tapno gawis nan biyagyo ya nan an-akyo ya ap-oyo tapno mabaybayag nan matatagowanyo isnan daga ay inidyan nan apo ay Diosyo ay kowayo ay eng-enggana.”