Deuteronomio 34 - Kalin Apo Dios

Nan Nateyan Moses 34:1-12

¹ Nakwas ay binindisyonan Moses nan Israelita dat tomikid ay magagapo isnan nadadataan nan Moab ay menpaey isnan bilig ay Nebo et enggana isnan toktok nan bilig ay Pisga isnan balaan di agew id Jerico. Dat ipailan nan apo isdi nan daga ay menlogi isnan sakop nan Galaad et enggana isnan amyanan ay awnit tawiden nan aap-on din si Dan

² ya nan am-in ay sakop ay awnit tawiden nan aap-on din si Neftali, din si Efraim ya din si Manases. Inilana pay nan sakop ay awnit tawiden nan aap-on din si Juda ay menlogi isnan Natey ay Baybay isnan balaan di agew enggana isnan Baybay ay Mediterranean isnan maon-onogan di agew.

³ Isnan abagatan nan Juda et nan nadadata ay menpaey isnan Zoar enggana isnan amyanan id Jerico ay ili ay kad-an di kak-aiw ay kaneg niyog.

⁴ Dat kanan nan apo ken Moses en, “Siya na nan daga ay inkalik ken da Abraham, Isaac yas Jacob en itedko isnan aan-ak ya aap-oda. Ipailak dana ken sik-a ngem adiyak ipalobos ay omeyka isdi.”

⁵ Isonga dat matey id Moab si Moses ay pinilin nan apo ay baana tay siya nan kinwanin nan apo en mateyana.

⁶ (-)

⁷ Sin-gasot et dowampoo nan tew-en Moses isdin nateyana dapay napigsa pay laeng ay maid kinmapsotana ya napigsa pay laeng nan matana. (v 6) Dat maikaob isnan nadadataan nan Moab ay dedemangen nan ilin nan Betpeor. Ngem enggana id wani et maid mangtek isnan osto ay naikaobana.

⁸ Daet ilemet nan Israelita siya is tolompoo ay agew isnan nadadataan nan Moab.

⁹ Si Josue ay anak Nun et masilib isnan nangdotokan Moses isnan nang-ipatangana isnan ledengna isnan olon Josue ay mang-ipaila ay si Josue nan mangsokat ken siya. Tinongtongpal nan Israelita si Josue dadapay inikkan san bilbilin nan apo ay inbagbagan Moses.

¹⁰ Ngem engganas di et maid mamadto isnan Israelita is makakaneg ken Moses ay nakikalkali isnan apo.

¹¹ Maid polos mamadto is makaikkan isnan kaskasdaaw ay kaneg san inpaik-ikkan nan apo ken Moses isnan alin di Egipto, nan oopisyalisna ya isnan am-in ay iyEgipto.

¹² Maid teken is mamadto is makaikkan isnan napateg ya kaeegyat ay inik-ikkan Moses ay inil-ilan nan Israelita.