Deuteronomio 33 - Kalin Apo Dios

Nan Nangbindisyonan Moses Isnan Israelita 33:1-29

¹ Siya dana nan kinwanin Moses ay baan Apo Dios isnan nangbindisyonana isnan Israelita esapay matey. Kinwanina en,

² “Ninpaila nan apo isnan bilig ay Sinai. Nan silangna et kaneg nan tomag-adan nan agew id Edom. Ninlinang nan silawna isnan bilig ay Paran et menlinang isnan ipogawna. Simpoo ay libo ay aanghel nan naiboboweg ken siya ya wada nan menbidbidang ay apoy isnan makanawana.

³ Laylayden nan apo nan ipogawna ya salsalaknibana daida isonga menpalintomeng tako isnan sikiyana ya tongpalen tako nan bilbilina.

⁴ Tongpalen tako nan linteg ay inbagbagan Moses ken datako. Nan linteg ay siya nan kapategan isnan am-in ay wada ken datako.

⁵ Nan apo et ninbalin ay Ali isnan ipogawna ay Israelita isdin nadagopan nan am-in ay ipogaw ya nan mang-ipangpangolo ken daida.”

⁶ Dat isnan sinpangapon din si Ruben et siya na nan kinwanin Moses, “Adi koma mamam-aid nan ap-on din si Ruben ay olay no atiatikda.”

⁷ Dat abes isnan sinpangapon din si Juda et kinwanina en, “Dengngem pod apo nan dawatda ta ipos-am daida isnan iib-ada ay Israelita. Sik-a koma apo nan makigobat pala ken daida ta badangam daida isnan mangsapeanda isnan mangbosboso ken daida.”

⁸ Dat isnan sinpangapon din si Levi et kinwanina abes en, “Ipagtekmo koma apo isnan urim ya tummim nan laydem isnan matalek ay baam ay nan Levita. Daida nan pinadasmo isdin kawad-anda id Massa isdin panggep di danom di Meriba et napaneknekam ay matalekda.

⁹ Inpailada ken sik-a ay dadama nan pammatida ay egayda inkaskaso nan olay din am-ada, in-ada, bebsatda wenno nan an-akda. Tinongtongpalda nan bilbilinmo ya matalekda isnan tolagmo.

¹⁰ Awnitda isolowan nan ipogawmo ta tongpalenda nan lintegmo ya awnitda menpalti is igasingda ken sik-a.

¹¹ Badangam apo nan sinpangapoda ta pomigsada. Magasinganka koma isnan ikkanda. Dosaem nan mangbosboso ken daida ya adim ipalobos ay makigobatda kasin.”

¹² Isnan pay abes sinpangapon din si Benjamin et kinwanina en, “Daida nan ipogaw ay laylayden ya salsalakniban nan apo. Inagew ay banbantayana daida danapay ay-ayowanan daida isnan matatagowanda.”

¹³ Dat abes isnan sinpangapon din si Jose et kinwanina en, “Bindisyonan koma nan apo is odan nan dagada ya oopeen koma gedan di menbala ay danom.

¹⁴ Isnan kad-anda et gawigawis koma nan begas di kaiwda dadapay maom isnan agew. Adoado koma gedan nan kagawisan ay begas di kaiw isnan tonggal timpo ay bomgasanda.

¹⁵ Nan bilbiligda et mapno koma is kaimisan ay bengan di kaiw.

¹⁶ Mapno koma nan dagada isnan am-in ay gawis ay banag ay binindisyonan nan apo. Siya nan apo ay ninkali isnan tengan di menbidbidang ay kaiw. Menpaay koma am-in dana isnan sinpangapon din si Jose tay siya nan nang-ipangolo isdin bebsatna.

¹⁷ Nan pigsan Jose et kaneg nan pigsan di nowang ya pilmi ay tinmoled. Nan pigsana et nan pigsan nan linibo ay ipogaw din si Manases ay anakna ya nan simpoo ay libo ay ipogaw din si Efraim ay anakna gedan. Daida nan makigobat ay mangdosa isnan mangbosboso isnan Israelita enggana isnan solsolin nan batawa.”

¹⁸ Dat isnan sinpangapon din da Zabulon ken Issacar et kinwanina en, “Mennam-ay koma nan sinpangapon din si Zabulon isnan omay-ayanda isnan tap-in di il-ili isnan benget di baybay ay men-ang-angkatanda. Omado abes koma nan kinabaknang nan sinpangapon din si Issacar isnan il-ilida.

¹⁹ Isnan bomaknanganda et awisenda nan gagayyemda isnan bilig dadapay igasing nan lebbengna ay maigasing isdi. Nan omay-ayanda isnan il-ili isnan benget di baybay ay men-ang-angkat nan magapowan di kinabaknangda. Nan saydowanda isnan benget di baybay nan magapowan di pagbiyagda.”

²⁰ Dat abes isnan sinpangapon din si Gad et kinwanina en, “Dayawenda koma si Apo Dios ay nangpaannawa isnan teanda. Pilmi nan anos nan sinpangapona isnan menseseedanda isnan awnitda makigobatan ta abaken nan Israelita nan mangbosboso ken daida.

²¹ Nan kagawisan ay daga nan pinilida ay pala ken daida. Nan bingay di men-ipangpangolo nan naitna ken daida. Tay nan linteg ya bilbilin nan apo et tinongtongpalda isdin nadadagopan di aamam-an di Israelita.”

²² Isnan pay sinpangapon din si Dan et kinwanina en, “Awnit maipaila nan pigsada ay kaneg nan pigsan di layon isnan magapowanda id Basan ay makigobat isnan mangbosboso ken daida.”

²³ Dat abes isnan sinpangapon din si Neftali et kinwanina en, “Daida et mamapnekda gapo isnan layad nan apo ken daida. Nan dagada et nan menpaabagatan enggana isnan Baybay ay Galilea.”

²⁴ Isnan pay sinpangapon din si Aser et kinwanina en, “Ad-ado nan bindisyonda mo nan tap-in di sinpangapo. Laylayden koma nan bebsatna siya. Omadoado koma nan kaiw di olibo isnan dagada.

²⁵ Mabaked koma nan il-ilida is landok ya maid koma om-ommat ken daida.”

²⁶ Dat itoloy Moses ay mangwani en, “Dakayo ay Israelita, maid dios is kaneg nan Diosyo ay nadayaw ay maitatapi isnan liboo ay omali ay mangbadang ken dakayo.

²⁷ Si Apo Dios nan mang-isalsalakan ken dakayo. Siya nan kanayon ay mangtatapaya ken dakayo. Inabakna nan mang-ap-apos ken dakayo isnan om-omdananyo isnan daga ay omayanyo danapay ibaga ken dakayo en abakenyo am-in nan mang-ap-apos ken dakayo engganay maaminda.

²⁸ Isonga awnit menlamlamnin nan ap-on din si Jacob. Mamas-etda isnan daga ay adoado nan makan ya mainom ya sibsibogan nan magapo id daya nan dagada.

²⁹ Dadama koma nan gasingyo, dakayo ay Israelita. Maid kanegyo is insalakan nan apo. Nan apo mismo nan kalasag ya kanegyo ispada ay mang-isalsalakan ya mangpangabak ken dakayo. Awnitda omali nan mang-ap-apos ken dakayo ay menseg-ang ngem awnityo gatigatinan daida.”