Deuteronomio 30 - Kalin Apo Dios

Nan Ikkan Ta Mabindisyonan 30:1-20

¹ Dat itoloy Moses ay mangwani en, “Pinapilik met dakayo isnan laydenyo mo nan bindisyon nan apo wenno nan dosana. No mapaligatan kayo ay kaneg din inbagbagak ken dakayo dakayopay wada isnan nateketeken ay il-ili ay nang-iwalasan nan apo ken dakayo et awnit manemnemyo nan inpapilik.

² Tay no dakayo, nan aan-ak ya aap-oyo et kasinyo tongpalen ay osto nan bilin nan apo ay inbagbagak id wani

³ et awnit seg-angan nan apo ay Diosyo dakayo. Danat ipasagong dakayo ay nagapo isnan nateketeken ay il-ili ay nang-iwalasana ken dakayo ta maponok kayo isnan iliyo ya kasina panam-ayen dakayo.

⁴ Olay no nan naiwalasanyo et isnan kaaddawiyan ay solin nan batawa et awnit dagopen nan apo ay Diosyo dakayo ta isagongna dakayo

⁵ tapno kowaenyo nan daga ay kowan din alal-apoyo id kasin. Danat paad-adowen ya panamnam-ayen pay dakayo mo din alal-apoyo id kasin.

⁶ Awnit menbalinen nan apo ay Diosyo dakayo ya nan ap-oyo ay managtongpal tapno laylaydenyo siya isnan am-in ay nemnemyo ta matagotago kayo isnan sana ay ili.

⁷ Awnitna isaldeng ay mangdosa ken dakayo et isoblatna ay mangdosa isnan mang-ap-apos ya mang-aamis ya mangpalpaligat ken dakayo.

⁸ Et awnityo kasin tongpalen nan bilina ay ibagbagak ken dakayo id wani.

⁹ Awnit panam-ayen nan apo ay Diosyo dakayo isnan am-in ay ikkanyo. Awnit kayo maganak ya magabay kayo isnan talakenyo ya isnan paypayewyo. Awnit magasingan nan apo ay mangpanam-ay ken dakayo ay kaneg din gasingna isdin alal-apoyo id kasin.

¹⁰ Ngem masapol ay tongpalenyo nan apo ay Diosyo ya adiyo kalkalingkingan nan lintegna ay wada isnan naay naisolatan di bilbilina. Owen, masapol ay tongpalenyo siya isnan am-in ay nemnemyo.

¹¹ Nan naay ay bilin ay ibagbagak ken dakayo id wani et baken naligat ay matongpal isonga adiyo kankanan en adiyo kabaelan.

¹² Tay baken met id daya is kad-ana ta masapol di kananyo en, ‘Sino pay di omey mang-ala id isdi ay mang-igowab ta dengngen tako datakot patiyen?’

¹³ Ya baken met gedan isnan bangil di baybay is kad-ana ta kananyo en, ‘Sino pay di gomdang ay omey mang-ala ta iyalina ken datako tasiyay di dengngen tako et tongpalen tako?’

¹⁴ Nodi wada met ken dakayo isnan nemnemyo ya mabalin ay kankananyo isonga tongpalenyo et.

¹⁵ Nemnemenyo na tay id wani et papiliyek dakayo is kaytenyo. Ay kaytenyo nan gawis ay biyag wenno nan madosa kayo ay eng-enggana?

¹⁶ No tongpalenyo nan bilbilin nan apo ay Diosyo ay ibagbagak ken dakayo id wani isnan manglaylaydanyo ken siya, mangpatiyanyo ken siya ya adiyo mangkalkalingkingan isnan am-in ay lintegna et awnit matagotago kayo dakayopay omadoado. Ya awnit bindisyonan nan apo ay Diosyo dakayo isnan daga ay menkowayo.

¹⁷ Ngem no adiyanyo ay mangtongpal isnan bilbilina ya adiyo idnge siya gapo tay nan sinangdidios nan daydayawenyo

¹⁸ et ibabagak nan tet-ewa ay awnit kayo madosa et baken mabayag nan menteanyo isnan daga ay awnityo kowaen isnan dedemangen di Ginawang ay Jordan.

¹⁹ Napatepateg nan naay ibagbagak ken dakayo tay no makakali koma nan daya ya nan batawa ta daida nan menkali pala ken sak-en et daida nan mang-ipanemnem isnan ipapilik ken dakayo id wani. Naay nan ipapilik ken dakayo, ay laydenyo nan bindisyon nan apo ay nan biyag wenno nan dosana ay tetey? Isonga piliyenyo koma nan biyag ta matagotago kayo ya nan aan-akyo ya nan aap-oyo.

²⁰ Laylaydenyo nan apo ay Diosyo. Tongpalenyo ya adiyo dokdokogan siya tapno matagotago kayo ya mabayag nan menteanyo, dakayo ya nan aan-ak ya nan aap-oyo isnan daga ay insapatana en idyana isdin alal-apoyo ay da Abraham, Isaac ya si Jacob.”