Deuteronomio 26 - Kalin Apo Dios

Nan Bilin Maipanggep Nan Damo Ay Apit 26:1-11

¹ Dat kanan Moses en, “No mentetee kayo et isnan daga ay idyan nan apo ay Diosyo ay menkowayo

² et masapol ay omala kayo isnan damo ay begas nan esekyo dayot gimataen ta iyeyyo isnan pagdaydayawan ay awnit piliyen nan apo ay Diosyo.

³ Dakayot omey isnan padi ay mensilsilbi isnan deey ay timpo et kananyo en, ‘Ipagtekko id wani isnan apo ay Diosko ay wadaak et isnan daga ay inkalina ay idyana isdin alal-apo tako id kasikasin.’

⁴ Daet alaen nan padi nan gimata et ippeyna isnan sagang nan altar nan apo ay Diosyo.

⁵ Dakayot kanan isnan apo ay Diosyo en, ‘Ninbabbab-aat din alapok ay esay Arameo tay maid osto is ilina isonga dat omey id Egipto ay nanakkey nan pamilyana. Atiatikda isdin inmayanda isdi ngem dadat omadoado et enggana ay ninbalinda ay esay napigsa ay sinpangili.

⁶ Ngem dat pinabalin nan iyEgipto dakami ay baada dadapay paligaten ay nangpaobla ken dakami is mendagsen.

⁷ Dakamit mendawat isnan apo ay Dios din alal-apomi et dinngena nan dawatmi ya inilana nan napalpaligatanmi ya nan mensegseg-anganmi.

⁸ Dat isalakan nan apo dakami id Egipto isnan nang-ipailaana isnan panakabalina isnan nang-ikkanana isnan ado ay kaskasdaaw ya kaeegyat.

⁹ Danat ipaali dakami isna et idyana ken dakami nan naay ay gawigawis ya maloweb ay daga.

¹⁰ Et id wani apo, naay iyalik nan damo ay begas di esekko isnan daga ay inidyam ken dakami.’ Dakayot ippey isnan sagang di altar nan apo ay Diosyo dakayot menlokbob ay mendayaw.

¹¹ Dakayot lagsakan nan am-in ay gawis ay inidyan nan apo ay Diosyo ken dakayo ya isnan pamilyayo. Ayaganyo nan Levita ya nan sangaili ay makitetee isnan teanyo ta makilagsakda ken dakayo.”