Deuteronomio 18 - Kalin Apo Dios

Nan Inkalin Nan apo Ay Omipaey Is Mamadto 18:14-22

¹⁴ Dat kanan Moses en, “Nan ipogaw isnan il-ili ay ngannganiyo mentean et patpatiyenda nan kankanan nan mensip-ok ya menboyboyon ngem adi ipalobos nan apo ay Diosyo ay ikkanyo dana.

¹⁵ Nodi awnit pomili is mamadto ay kaneg ken sak-en ay kailyanyo ta siya nan patiyenyo.

¹⁶ Isdin nadadagopanyo id kasin isnan bilig ay Sinai et ninpakpakaasi kayo ay adiyo layden ay kasin dengngen nan menkaliyan nan apo ay Diosyo wenno kasin ilaen nan apoy ay mang-ipaila isnan kad-ana tay kananyo en baka matey kayo.

¹⁷ Isonga dat kanan nan apo ken sak-en en, ‘Gawis nan dawatda.

¹⁸ Awnitak pomili is mamadto ay kaneg ken sik-a ay kailyanda ay Israelita. Awnitak ibaga ken siya nan kanana et awnit ibagana isnan ipogawko nan am-in ay ibilinko.

¹⁹ Et awnit siya nan kinatopekko et no waday adi mangtongpal ken siya et madosa.

²⁰ Ngem no waday mamadto ay aped mang-ipagtek is egayko inbaga wenno nan ibagbagana et nagapo isnan teken ay dios et masapol ay mapatey gapo isnan inikkana.’ ”

²¹ Dat itoloy Moses ay mangwani en, “Waay nemnemenyo no intoy ikakkanyo ay mangtek ay nan ibagbagan nan mamadto et baken nan apo is nagapowana.

²² Naay nan mangtekanyo, no menkali nan mamadto ay pala isnan apo kano dat adi tomet-ewa nan kinwanina et siya nan kagtekana ay baken nan apo is nagapowana. Nan kaneg tona ay mamadto et aped makikigad ay ninkali isonga adi kayo omeg-egyat isnan ibagbagana.”