Deuteronomio 15 - Kalin Apo Dios

Nan Bilin Maipanggep Nan Maikapito Ay Tew-en 15:1-11

¹ Dat itoloy Moses ay mangwani en, “Isnan tonggal tapos di maikapito ay tew-en et masapol ay pakawanenyo nan otang di nakaotang ken dakayo.

² Siya na nan ikkanyo. Am-in ay ninpaotang is siping isnan ib-ana ay Israelita et masapol ay pakawanena nan deey ay inpaotangna. Adina singsingilen nan inpaotangna isnan kailyana ay Israelita tay nan apo mismo nan nang-ibaga en mapakawan nan otang.

³ No isnan sangaili et mabalin ay singilenyo nan inpaotangyo ngem adiyo singsingilen nan otang di ib-ayo ay Israelita.

⁴ Tay awnit bindisyonan nan apo ay Diosyo dakayo isnan daga ay idyana ken dakayo. Awnit maid polos kodo isnan kailyanyo

⁵ no kitdi patiyenyo nan apo ay Diosyo dakayopay tongpalen tet-ewa nan ibagbagak ken dakayo id wani.

⁶ Awnit bindisyonan nan apo ay Diosyo dakayo ay kaneg nan inkalina. Paotanganyo nan tap-in di ipogaw ay baken Israelita ngem adi masapol ay omotang kayo ken daida. Awnit kayo gedan mentolay isnan tap-in di il-ili ngem maid teken ay ipogaw is mentolay ken dakayo.

⁷ No waday ib-ayo ay Israelita ay kodo ay mentetee isnan kompolni ay ili isnan daga ay ited nan apo ay Diosyo ken dakayo et adiyo koma im-imotan daida nodi badanganyo daida.

⁸ Siwawaya kayo koma ay mangbadang ken daida ya pabolodanyo isnan masapolda.

⁹ Adi kayo mendowadowa ay mang-idya isnan masapolda gapo tay nganngani nan tew-en ay mapakawanan di otang. Adiyo koma nemnemnemen ay ngawi nan kaneg todi tay no siya di nan ikkanyo isnan ib-ayo ay makasapol is badangyo et baka awnit men-adawag isnan apo et makabasol kayo.

¹⁰ Men-gasgasing kayo koma ay mang-at-ated isnan ib-ayo ay adi mensakit nan nemnemyo. No siya di nan ikkanyo et bindisyonan nan apo ay Diosyo dakayo isnan am-in ay ik-ikkanyo.

¹¹ Tay awnit wawawawada nan kodo ay Israelita isnan kad-anyo isonga ibilinko ay masapol ay badanganyo ya agtanyo nan kodo ya nan makasapol.”