Deuteronomio 11 - Kalin Apo Dios

⁸ Dat itoloy Moses ay mangwani en, “Tongpalenyo nan ibagbagak ken dakayo id wani. No siya di nan ikkanyo et makagdang kayo isnan Ginawang ay Jordan ta menkowayo nan daga ay ngannganiyo omdanan.

⁹ Et awnit mabaybayag nan matatagowanyo isnan deey maloweb ay daga ay inkalin nan apo en idyana isdin alal-apoyo ya isnan ap-oda.

¹⁰ Nan daga ay omayanyo et baken kaneg id Egipto ay ninteeanyo id kasin. Tay isdi et no menmola kayo et masapol ay ikaligatanyo ay mang-idanom isnan paypayewyo.

¹¹ Ngem nan daga ay ngannganiyo mentean et bilbilig ya tantanap ay sibsibogan di odan.

¹² Tay nan naay ay daga et kawkawanan nan apo ay Diosyo isnan kaageagew isnan katew-etew-en.

¹³ Isonga tongpalenyo nan bilbilin ay naibagbaga ken dakayo id wani. Laylaydenyo nan apo ay Diosyo ya mensilbi kayo ken siya isnan am-in ay nemnemyo.

¹⁴ No ikkanyo dana et ipaalina nan odan isnan dagayo isnan timpo ay mangsapolan di esekyo tapno adi kayo maaw-awanan is maapit ay kaneg nan pagey, nan esek ay sapowenyo is mainom ya nan kaiw ay olibo ay magapowan di lana.

¹⁵ Awnit wada gedan nan logam ay kanen nan talakenyo. Awnit wada am-in ay makan ay kaytenyo ay kanen.

¹⁸ Ipasnekyo isnan nemnemyo nan am-in ay ibagbagak ken dakayo tapno adiyo kalkalingkingan. Ibedbedyo isnan takkayyo ya isnan kitongyo ta mang-ipanemnemnem ken dakayo.

¹⁹ Itoltoloyyo ay mang-ibagbaga is dana isnan an-akyo ya nemnemnemenyo gedan no wada kayo isnan baeyyo wenno isnan ad-addawi, no men-iilleng kayo wenno men-ob-obla kayo.

²⁰ Isolatyo gedan isnan mensinombangilen di segpanyo ya isnan lowangan di ili.

²¹ Tay no ikkanyo dana et awnit mabaybayag nan matatagowanyo ya nan an-akyo isnan daga ay inkalin nan apo en idyana isdin alal-apoyo. Awnit dakayo ya nan an-akyo ya ap-oyo et mentee kayo isdi ay engganay daan nan daya ya nan batawa.

²⁶ Id wani ay agew et papiliyek dakayo is kaytenyo. Ay laydenyo nan bindisyon nan apo wenno nan dosana?

²⁷ Mabindisyonan kayo no tongpalenyo nan bilbilin nan apo ay Diosyo ay ibagak ken dakayo id wani.

²⁸ Ngem madosa kayo no adiyo idnge nan bilbilin nan apo ay Diosyo dayopay dokogan nan ibagbagak id wani ta mendayaw kayo isnan sinangdidios ay egayyo dinaydayaw.”