Deuteronomio 1 - Kalin Apo Dios

Nan Inomdanan Di Israelita Id Moab 1:1-5

¹ Nan wada isna et din inbagbagan Moses isnan Israelita isdin kawad-anda isnan pondag isnan balaan di agew isnan Ginawang ay Jordan. Wadada isnan tanap di Ginawang ay Jordan ay sag-en di Suf isnan nin-gawaen di ili ay Paran ya nan il-ilin di Tofel, Laban, Haserot ya nan Dizahab.

² No isnan bilbilig id Edom nan dinaanda et simpoo ya esa ay agew nan madaanana ay menlogi isnan bilig ay Sinai et enggana id Kades Barnea.

³ Ngem gapo isnan kinamakedsen nan Israelita et epatpoo ay tew-en nan nangbaatanda. Isonga issan omona ay agew nan maikasimpoo ya esay bowan isnan maikaepatpoo ay tew-en enggana isdin kinmaananda id Egipto et inbagan Moses ken daida nan am-in ay inbilin nan apo.

⁴ Naikkan na isdin nang-abakan nan apo ken da Sihon ay alin di Amorreo ay nintolay isnan ili ay Hesbon ya si Og ay alin di Basan ay nintolay isnan ilin di Astarot ya Edrei.

⁵ Isdin kawad-an nan Israelita isnan balaan di agew id Jordan isnan sakop di Moab dat ilogin Moses ay ipalawag nan linteg Apo Dios ken daida.