Daniel 7 - Kalin Apo Dios

Nan Naipailaan Nan Matagotago Ay Enggana Ken Daniel 7:1 , 9-14

¹ Isnan omona ay tew-en ay nintotolayan din si Belsazar id Babilonia dat ipaiitaw Apo Dios si Daniel isnan esay labi ay mangipagtek ken siya isnan naayda. Insolatna nan iniitawna et siya dana.

⁹ “Isnan menboyboyaak daet maiyolnos nan katokdotokdowan di ali dat tomokdo nan natatago ay enggana ay nan manakabalin ay Dios isnan tokdowana ta men-okom. Nan badona et mapolapolaw ay kaneg nan kapolawan ay kapes ya mapolapolaw gedan nan bookna. Kaneg menbidbidang nan napipilidan ay tokdowana dapay menbegbegang nan pilidna.

¹⁰ Men-ay-ayos ay kaneg ginawang nan apoy ay magapgapo isnan kad-ana. Kalibolibo nan wada isdi ay mensilsilbi ken siya ya kamilyomilyon nan tomatakdeg isnan sagangna ay maokom. Dat menlogi nan men-okomanda dadapay bilagen nan deeyday liblo.

¹¹ Isnan menboyboyaak daket dengen ay men-et-etek ya menlaslastog nan ban-eg ay sakgod nan maikap-at ay animal daket ilaen ay pateyenda dadat itep-a nan awakna isnan apoy et madadael.

¹² Dat makaan nan panakabalin nan iib-an san animal ngem napalobosanda ay matago is siawyan pay.

¹³ Dat issan labi et wada pay nan inilak ay kaneg ipogaw ay somagsag-en ay naitatapi isnan liboo et omey issan kad-an san natatago ay enggana ta maipalang.

¹⁴ Dat maagtan is panakabalin, dayaw ya kalebbengan tapno am-in nan ipogaw isnan kailiili isnan nateketeken ay ipogaw ya kali et silbiyanda siya. Maid kombos nan panakabalina ya nan mentolayana et maiwed patenggana.”