Amos 6 - Kalin Apo Dios

Nan Awnit Dosan Di Israelita 6:1-7

¹ Kaseseg-ang kayo, dakayo ay nanam-ay nan biyagna id issa Sion ya dakayo id issa Samaria ay mangipagalop ay maid om-ommat ken dakayo, dakayo ay makmakwani en aap-apon nan naay ay madmadnge ay ilin di Israel ya menpabadngan koma di ipogaw.

² Enkayo ta ilaenyo nan ili ay Calne esakayopay omey isnan ili ay Hamat dakayot omey id Gat ay ilin di Filisteo. Ay gag-awisda mo nan ilin di Juda ya Israel? Ay dakdake nan ilida mo nan iliyo? Ngem nan inommat ken daida et awnit abes ommat ken dakayo.

³ Adiyo layden ay nemnemnemen ay wada nan domateng ay panagdadael ngem nan ik-ikkanyo nan am-amed mangipasagsag-en isnan deey ay agew.

⁴ Kaseseg-ang kayo, dakayo ay aped tomotokdo isnan gawigawis ya menyam-es ay kotson ya mensidsida isnan kagawisan ay kalnin di kalnilo ya baka.

⁵ Kaytenyo ay mensapo is kanta ay kaneg nan inikkan David dakayot ikotengteng.

⁶ Ominom kayo is kagosigosi ay basi dayopay osalen nan kagawisan ay bangbanglo ngem adiyo polos babawiyen nan nadadael ay Israel.

⁷ Isonga dakayo nan awnit omon-ona ay maikaan ay kaneg balod isnan teken ay ili. Mamaid et nan laglagsak ya fiestayo.