Amos 5 - Kalin Apo Dios

Nan Inbagan Apo Dios Ta Menbabawida 5:6-7 , 10-15 18-24

⁶ Somag-en kayo isnan apo ta matago kayo. No adi kayo et awnitna aminen dakayo ay Israelita ay kaneg nan ikkan di apoy ay mangpoo isnan iBetel ay maid makasebseb.

⁷ Madosa kayo, dakayo ay mangbalbaliktad isnan linteg ta sowitikenyo nan ipogaw.

¹⁰ Ligtenyo pay nan mang-ilinteg isnan baken nalinteg ya mang-ibagbaga isnan tet-ewa isnan pag-okoman.

¹¹ Aamisenyo pay nan kodokdo dakayo pay sowitiken daida ta ibayadda nan pageyda. Isonga olay no sinaadyo nan gawigawis ay bato ay baey ngem awnit adi kayo makatee isdi ya adi kayo gedan makainom isnan basi ay nagapo isnan gawis ay onas ay inmolmolayo

¹² tay getkek nan kadagsen nan basbasolyo ya nan kaad-adon nan ngawi ay inik-ikkanyo. Aamisenyo nan gawis ay ipogaw dakayopay alaen nan pasoksok di ipogaw dayopay iyadi nan kalintegan di kodokdo isnan pag-okoman.

¹³ Isonga kanan nan ipogaw en gag-awis no gomiginekda isnan kaneg tona ay timpo.

¹⁴ Ngem masapol ay padasenyo ay mang-ikkan is osto ay baken nan ngawi tapno matagotago kayo ya tapno tomet-ewa nan kankananyo ay wada nan Dios ay manakabalin ken dakayo.

¹⁵ Dokoganyo nan ngawi dayopay layden nan osto ya makailanyo ta nan nalinteg nan maikkan isnan pag-okoman. Et waay seg-angan nan kangangatowan ay apo nan ipogaw ay daan ay matmatago isnan naay ay ili.

¹⁸ Kaseseg-ang kayo dakayo ay mangseseed isnan agew ay omaliyan nan apo. Ay ngan od di awnit ibadang nan deey ay agew ken dakayo? Dapay ken dakayo et awnit agew di bolinget di ay baken pat-a.

¹⁹ Nan kanegna et kaneg nan mang-itagtagtagan di ipogaw isnan layon ngem danat sab-aten nan esay dakkel ay animal ay makwani en bear wenno kanegna nan kasasaa ay mensadag isnan diding dat ketban di oweg.

²⁰ Nan agew nan apo et awnit agew di bolinget ay baken pat-a, agew ay kasasadot ay maid polos lagsakna.

²¹ Adiyak layden nan agiaginyo dadayawen sak-en isnan fiestayo. Kaiingek nan naayda.

²² Olay no iyaliyo nan mapoowan ay idatonyo ya nan idatonyo ay pagey et adiyak dawaten. Olay nan pinatabayo ay talaken ay idatonyo ken sak-en et adyak gedan.

²³ Isaldengyo nan kantayo ay aped ngalawngaw. Adiyak layden ay dengngen nan kotengtengyo.

²⁴ Ngem nan masapol ay ikkanyo et nan osto ta men-ayos nan linteg ay kaneg nan ginawang ay adi katkatdok.