2 Samuel 12 - Kalin Apo Dios

¹ Isonga dat ibaan nan apo nan mamadtona ay si Natan ken David. Idi inomdan ken siya dat mensodok en, “Wada nan dowa ay amam-a ay mentetee isnan esa ay ili. Nan esa et baknang dapay nan esa et kodo.

² San baknang et ado nan bakbakana ya kalnilona

³ dapay san kodo et es-esa nan kalnilona. Tinalakena san kalnilo et nasiken isnan baeyna ay kadwan nan an-akna. Pakanena pay isnan tap-in di makan ay kankanena danapay painomen isnan pag-inomana ya saksakliyena ay kaneg esa isnan an-akna ay bababai.

⁴ Isnan namingsan et wada nan sangailin san baknang isnan baeyna. San baknang et adyana ay ipaltiyan isnan talakena san sangailina nodi inalana san kalnilon san kodo et siya nan pinaltina.”

⁵ Dat makaliget si David issan baknang et kanana ken Natan en, “Isapatak isnan apo ay kangatowan en san am-ama ay nang-ikkan isna et mapatey koma.

⁶ Gapo tay ngawi nan inikkana ay maid seg-angna et masapol ay bayadana pay is mamin-epat ay kaad-ado san inalana.”

⁷ Dat kanan Natan en, “Dapay sik-a san deey am-ama. Et siya na nan kanan nan apo ay Dios di Israelita, ‘Pinabalinko sik-a ay alin di Israelita dakpay insalakan sik-a is ken Saul.

⁸ Inidyak ken sik-a nan itoltolayana ya nan am-in ay kokwana dakpay pinabalin sik-a ay alin di Israel ay maitapi nan Juda. No kolang di et waay dobli pay nan inidyak ken sik-a.

⁹ Ngem ayta dakan egay tinongpal nan bilbilinko? Dakan inikkan nan naay ngawi? Pinapateymo si Urias isnan gobat tay inpapateymo isnan Ammonita ta asawaem nan asawana ay si Batseba.

¹⁰ Isonga menlogi id wani et kanayon ay wada nan kaeegyat ay ommat isnan aan-akmo ya aap-om is kasin tay egaymo pinati sak-en dakapay inpapatey si Urias ta asawaem nan asawana.’”

¹³ Dat kanan David en, “Ninbasolak isnan apo.” Dat kanan Natan en, “Pakawanen nan apo sik-a et adika matey

¹⁴ ngem gapo tay ninbasolka is keg tona ay adi layden nan apo et awnit matey nan damo ay anakmo ken Batseba.”

¹⁵ Dat somaa et si Natan.