2 Aali 6 - Kalin Apo Dios

Nan Nangbadangan Eliseo Isnan Alin Di Israel 6:8-17

⁸ Isnan namingsan ay men-gobgobatan nan alin di iSiria isnan makwani en Israel et nakitoya nan ali isnan oopisyalna isnan awnitda omapaan.

⁹ Ngem inpagtek Eliseo isnan alin di Israel nan inmapaan nan iSiria ta adida somagsag-en isdi tay sesed-en nan iSiria daida.

¹⁰ Daet abes ibagan nan alin di Israel isnan iib-ana. Isnan keg tona et namin-ado ay binadbadangan Eliseo nan alin di Israel.

¹¹ Dat madadanagan san alin di iSiria danat ayagan nan oopisyalna et kanana ken daida en, “Ay sino ken dakayo nan men-isipsisipsip isnan alin di Israel?”

¹² Dat kanan nan esa ken daida en, “Maid apo, ngem nan mamadto ay si Eliseo nan mang-ibagbaga isnan alin di Israel isnan kankanam ay olay no kinwanim isnan kowaltom.”

¹³ Dat kanan san ali en, “Anapenyo siya ta ipadpapko.” Idi inbagada en wada si Eliseo id Dotan

¹⁴ dat omipaey is adoado ay sosoldado ay ninkakabayo ya ninlologan. Dinmatengda isdi isnan labi dadat liwesen.

¹⁵ Dat isnan wakgawakgat ay binmangon nan baan Eliseo et bomala danat ilaen nan sosoldadon di iSiria ya nan kabayoda ya loganda ay nangliliwes isnan deey ili. Dat somagong ken Eliseo et kanana en, “Naskokta apo, ay ngan pay di ikkanta?”

¹⁶ Dat kanan Eliseo en, “Adika omegyat tay ad-ado nan mangbadang ken daita mo ken daida.”

¹⁷ Dat menlowalo et kanana en, “apo, bitagem koma nan matan nan baak ta makaila.” Dinngen nan apo nan lowalona dat idi kasin mentangad san baan Eliseo et inilana isnan bilig nan adoado ay ninkakabayo ay sosoldado ya kaneg kalesa ay menkimkimat ay nangliliwes ken Eliseo.