2 Aali 5 - Kalin Apo Dios

Nan Naagasan Naaman 5:1-15

¹ Wada nan ap-apon di sosoldado id Siria ay kangadan is Naaman ay idaydayaw ya laylayden nan ali tay gapo ken siya et pinangabak nan apo nan iSiria. Natoled siya ngem nakolit.

² Isnan namingsan ay sinonggep nan iSiria isnan kad-an di Israel et inalada nan esay babassang et menbalin ay baan nan asawan Naaman.

³ Isnan namingsan et kinwanin san babassang isnan asawan Naaman en, “No koma makaey si apo Naaman isnan mamadto ay wada id Samaria et mapagawisna nan sakitna.”

⁴ Idi dinngen Naaman san kinwanina dat omey issan ali et ibagana san kinwanin san babassang.

⁵ Isonga dat kanan san ali en, “Enka ngalod isnan alin di Israel dakat idya nan solatko ken siya.” Dat menlobwat si Naaman et inmikawit is adoado ay pilak ya balitok ya simpoo ay ganaganagwis ay bado.

⁶ Et siya na nan kanan nan solat san ali ay inkawitna en, “Ipaeyko ken sik-a nan esay opisyalko ta pagawisem koma nan kolitna.”

⁷ Idi binasan nan alin di Israel nan solat dat makolkol nan nemnemna isonga danat singaten nan badona danapay kanan en, “Ayta dan kanan nan alin di iSiria en agasak nan naay ipogaw. Ay kanana ngen en diosak ta mabalin ay makatagowak ya makapateyak? Kagtekana ay kaytena et kedeng ay men-ilogi is sape.”

⁸ Idi dinngen Eliseo ay mamadto nan nangsingatan nan ali isnan badona danat paibaga na, “Ayta dan makolkol nan nemnemmo? Ipaalim ken sak-en nan sana lalaki ta ipagtekko ken siya en wada nan tet-ewa ay mamadton Apo Dios id isna Israel.”

⁹ Dat menlogan si Naaman isnan kalesana et omey isnan pantew di baey Eliseo.

¹⁰ Dat ibagan Eliseo isnan esay baana ta ibagana ken Naaman en omey menletep is maminpito isnan Ginawang ay Jordan ta gomawigawis nan kolitna.

¹¹ Ngem dat makaliget si Naaman et ninpangakaan danapay kanan, “Kanak pay no omali ay mangsab-at dat menlowalo isnan apo ay Diosna danapay paypayan nan kad-an di mensakit ta kaganawisak.

¹² Nadaldalos adi nan Ginawang ay Abbana ya Farfas id Damasco mo nan am-in ay ginawang id Israel. Ay adiyak gomawis no isnan ginawang id Damasco nan omeyak menletepan?”

¹³ Ngem dat somag-en nan baana dat kanan nan esang ken daida en, “Ine apo, olay no naligat nan ipaikkan nan mamadto ken sik-a et tet-ewa ay ikkam. Ngem nalaka met nan kanana ay enka menletep isnan ginawang ta gomawiska isonga am-amedmo koma ikkan ta epdaska gomawis.”

¹⁴ Isonga dat omey menletep si Naaman isnan Ginawang ay Jordan is maminpito ay kaneg san kinwanin Eliseo daet ginmawigawis ya dinmalodalos nan kodilna ay kaneg kodil di onga.

¹⁵ Dat somagong si Naaman ya nan bowegna ken Eliseo et kanana en, “Getkek et id wani ay maid teken is dios malaksig nan Dios di Israel. Paangaasim kad ngalod apo ta alaem nan naay sagotko ken sik-a.”