2 Aali 4 - Kalin Apo Dios

Si Eliseo Ya Nan Babai Ay iSunem 4:8-37

⁸ Isnan esay agew et inmey si Eliseo id Sunem. Et id isdi wada nan baknang ay babai ay nang-awis ken siya ta makikan isnan baeyda. Dat enggana di et no tonggal omey isdi et omey mangan issan baey san babai.

⁹ Dat kanan san babai isnan asawana en, “Maid dowadowana ay si tona ay kaaanali et mamadton Apo Dios

¹⁰ isonga omisaganata is kowalto isnan ngato datat pay-an is kama, lamisaan, tokdowan ya silaw ta mentet-eeana isnan omal-aliyana.”

¹¹ Isnan esay agew dat somagong da Eliseo id Sunem dadat omey men-illeng issan kowalto.

¹² Danat ibaa si Gehazi ay baana ta ayagana san babai. Idi inomdan san babai

¹³ dat kanan Eliseo ken Gehazi en, “Sootem kad ken siya no ngan nan maibadangko ay kaneg sobalit nan kinagawisna ay nang-idya isnan masapolta. Baka waday kaytena is ibagak isnan ali wenno isnan ap-apon di sosoldado.” Dat kanan san babai ken Gehazi en, “Wada am-in ay masapolko isna isnan kakailyak.”

¹⁴ Issan kinmaanan san babai dat kanan Eliseo ken Gehazi en, “Ngan pay ngalod di maibadangko ken siya?” Dat kanan Gehazi en, “Maid met anakna dapay naam-ama et si asawana.”

¹⁵ Dat kanan Eliseo en, “Ibagam ngalod ta omali isna.” Dat omey kasin san babai et itakdegna issan segpan.

¹⁶ Dat kanan Eliseo ken siya en, “Isnan kaneg tona ay timpo is omali ay tew-en et awnit wada nan anakmo ay lalaki ay ab-abaem.” Dat kanan san babai en, “Pangaasim ta adika somsomlat tay ipogaw Apo Dios sik-a.”

¹⁷ Ngem tinmet-ewa san kinwanin Eliseo et inmanak san babai is lalaki issan naisned ay tew-en.

¹⁸ Nasiken san onga. Dat isnan namingsan isnan pinag-aani inmey dinas-an san onga si amana ay makian-ani isnan payewda.

¹⁹ Maaw-awni pay danat kanan ken amana en, “Mensakit nan olok.” Dat kanan san amana isnan esa ay baa en, “Iyeymo kad nan naay onga ken inana.”

²⁰ Dat lak-eyen san baa san onga et iyeyna ken inana. Dat sakliyen inana et enggana ay makag-aw dat matey.

²¹ Danat iyey san onga isnan kowalton Eliseo et ipapodana isnan kama danat taynan et likpana nan segpan.

²² Danat ayagan si asawana et kanana en, “Omibaaka isna is esay baa ya omipaalika is kabayo tay masapol ay omeyak is ken Eliseo ay mamadto. Mensasagongak met laeng ay dagos.”

²³ Dat kanan asawana en, “Ayta, daen masapol di omeyka id wani dapay baken met obaya wenno fiesta.” Danat kanan en, “Olay no baken.”

²⁴ Danat sakayan san kabayo et kanana issan baa en, “Ala patagtagem et. Olay adim ipaam-amma enggana ay kanak.”

²⁵ Et omeyda isnan kad-an Eliseo isnan bilig ay Carmel. Idi inilan Eliseo isnan ad-addawi ay om-omey san babai danat kanan ken Gehazi ay baana en, “Naay omal-ali san babai ay iSunem.

²⁶ Ikamom ta enka sab-aten dakat sooten no gawisda.” Issan nangsab-atan Gehazi issan babai danat ibaga ken siya en gawisda.

²⁷ Ngem idi inomdan ken Eliseo dat menlokbob et gen-ana nan sikin Eliseo. Dat idogos koma Gehazi ngem dat kanan Eliseo en, “Bay-am tay pilmi ay menseseg-ang dapay maid polos inpagpagtek nan apo ken sak-en is maipanggep nan naay.”

²⁸ Dat kanan san babai ken siya en, “Egayak nindawdawat ken sik-a is anak nodi sik-a nan nangwani en mawad-anak et ninpakpakaasiyak pay en adika somsomlat.”

²⁹ Dat kanan Eliseo ken Gehazi en, “Ikamom, alaem nan sokodko ta omeyka. Adika somalsaldeng ay makitoytoya is kompolni ay sab-atem ya no waday sab-atem is mangtoya ken sik-a dakat adi tebtebben. Idadawesmo issan onga dakat ipatang isnan angasna nan sokodko.”

³⁰ Dat kanan san babai ken Eliseo en, “Isapatak isnan panangtalekko isnan kangatowan ay apo ya ken sik-a ay adiyak somasaa no adika makkey.” Isonga ninbowegda et ay somagong.

³¹ Ngem inyon-onan Gehazi et ipatangna san sokod issan angas san onga ngem maid polos sinyal ay matago. Dat somagong ay omey mangsab-at ken da Eliseo et kanana ken siya en, “Adi met kayet kagido.”

³² Idi inomdan si Eliseo dat kedkedeng ay songgep issan kowalto danat ilaen san onga ay naipapopodan issan kama.

³³ Danat ilikep nan segpan et menlowalo isnan apo.

³⁴ Makwas pay ay makalowalo danat gat-onan san onga et ibatogna nan topekna isnan topek san onga, nan mata isnan matana ya nan ledengna issan ledeng san onga. Dat ilogin san awak san onga ay pomoos kasin.

³⁵ Dat tomakdeg si Eliseo et mendaadaan isnan kowalto danat kasin gat-onan san onga. Daet men-akkis san onga is maminpito dat menbotag.

³⁶ Dat ayagan Eliseo si Gehazi et ibaana ay mang-ayag issan inan san onga. Idi songgep san babai isnan kowalto dat kanan Eliseo ken siya en, “Naay natago nan anakmo.”

³⁷ Dat menlokbob san babai ay men-iyaman ken Eliseo danat aggan san anakna et bomalada.