2 Aali 2 - Kalin Apo Dios

Nan Naikaanan Elias 2:1-15

¹ Naay nan inikkan nan apo ay nang-ala ken Elias ay mamadtona. Inpaalana siya isnan esay dalipospos et iyeyna id daya. Issan esay agew et ninlobwat da Elias ken Eliseo id Gilgal.

² Dat isnan daan et kinwanin Elias ken Eliseo en, “Mataynanka isna tay inbagan nan apo en omeyak id Betel.” Ngem dat kanan Eliseo en, “Isapatak isnan panangtalekko isnan kangatowan ay apo ya ken sik-a ay adiyak taytaynan sik-a.” Isonga dat makkey id Betel.

³ Et id Betel wada nan esay bonggoy di mamadto ay mentetee isdi ay nangsoot ken Eliseo en, “Ay getkem ay ikaan nan apo nan apom id wani?” Dat kanan Eliseo en, “Owen, getkek ngem adi tako kalkaliyen id wani.”

⁴ Dat kasin kanan Elias ken Eliseo en, “Mataynanka isna tay inbagan nan apo en omeyak id Jerico.” Ngem dat kanan Eliseo en, “Isapatak isnan panangtalekko isnan kangatowan ay apo ya ken sik-a ay adiyak taytaynan sik-a.” Dadat et menboweg et omeyda id Jerico.

⁵ Idi inomdanda id Jerico dat wada nan tap-in di mamadto isdi ay inmey ken Eliseo ay mensoot en, “Ay getkem en ikaan nan apo nan apom id wani?” Dat kanan Eliseo en, “Owen, getkek ngem adi tako kad kalkaliyen.”

⁶ Dat kasin kanan Elias ken Eliseo en, “Mataynanka isna tay inbagan nan apo en omeyak isnan Ginawang ay Jordan.” Ngem dat kanan Eliseo en, “Isapatak isnan panangtalekko isnan kangatowan ay apo ya ken sik-a ay adiyak taytaynan sik-a.” Isonga ninbowegda kasin ay omey.

⁷ Et limampoo isnan deeyday mamadto nan inmonod ken daida isnan Ginawang ay Jordan. Dat itakdeg da Elias ken Eliseo isnan benget nan ginawang ay iilaen nan deeyday mamadto daida isnan naiyaaddawi.

⁸ Dat kaanen Elias nan kagayna et kopinena danat isaplit isnan danom. Dat mensiyan nan danom et mendaanda isnan gawana ay naaango nan lota.

⁹ Idi inomdanda isnan bangilna dat kanan Elias ken Eliseo en, “Ay ngan pay di kaytem is idyak ken sik-a esakpay maikaan?” Dat kanan Eliseo en, “Ipatawidmo koma ken sak-en nan doblin di kabaelam.”

¹⁰ Dat kanan Elias en, “Naligat nan dawatmo ngem no mailam nan maikaanak et awnit dawatem ngem no adim maila et adim dawaten.”

¹¹ Isnan mendad-aananda et mentoytoyada. Dat pangawada nan kaneg kalesa ya nan kabayo ay menkimkimat ay linmaos isnan baetda dat maipangato si Elias id daya isnan dalipospos.

¹² Inilan Eliseo na danat ipaonod ay mangwani en, “Sik-a Elias nan tet-ewa ay nangsalsalaknib isnan aap-on din si Israel.” Enggana di et egayna et kasin inil-ila si Elias. Dat gapo is seg-angna danat singaten nan badona.

¹³ Nakwas pay di danat piditen san kagay ay inekdag Elias dat somagong isnan benget di Jordan et itakdegna isdi.

¹⁴ Danat isaplit san kagay Elias isnan danom danapay kanan en, “Into pay nan apo ay Dios Elias?” Et issan nang-isaplitana isnan kagay dat mensiyan nan danom dat mendaan et omey isnan bangilna.

¹⁵ Inilan san limampoo ay mamadto ay nagapo id Jerico san inikkan Eliseo dadat kanan en, “Wada et san kabaelan Elias ken Eliseo.” Dadapay omey sab-aten si Eliseo et menlokbobda isnan sagangna.