1 Samuel 3 - Kalin Apo Dios

Nan Ninpailaan Nan apo Ken Samuel 3:1-20

¹ Isdin timpo ay mensilsilbiyan nan onga ay si Samuel isnan apo isnan it-itdon nan esay padi ay si Eli et atiatik et kedeng din inpagtek Apo Dios ay kalina ya atiatik gedan din ninpalpaliknaana isnan tap-in di kaytena ay ipagtek.

² Isnan esay labi et si Eli ay nakapsot et nan matana et maseseyep isnan pagseypana

³ dapay abes si Samuel et maseseyep isnan leem di Templo ay kad-an di napateg ay baol Apo Dios. Esapay toman-o ay daan nan silaw

⁴ dat kanan nan apo en, “Samuel.” Dat kanan Samuel en, “Ayta apo?” Tay inpagalopna en si Eli

⁵ danat ikakamo ay omey ken siya ay mangwani en, “Naayak apo tay nang-ayagka.” Ngem dat kanan Eli, “Egayak inag-aggan sik-a. Enka bawet ipodan.” Isonga dat somagong si Samuel et ena ipodan.

^6-7 Dat kasin ayagan nan apo si Samuel. Ngem si Samuel et adina getken ay nan apo nan mangay-ayag ken siya tay egay polos nakikalkali nan apo ken siya. Isonga kasin binmangon et omey ken Eli danat kanan, “Naayak apo tay nang-ayagka.” Ngem dat kanan Eli, “Dapay egayak inag-aggan sik-a. Somagongka bawet ta enka ipodan.”

⁸ Dat kasin aggan nan apo si Samuel is maikatlo. Dat kasin bomangon et omey ken Eli et kanana, “Naayak apo tay nang-ayagka.” Nanemnem Eli ay nan apo nan mangay-ayag ken Samuel

⁹ isonga danat kanan ken siya en, “Enka ipodan dat no wada kasin nan mang-ayag ken sik-a dakat kanan, ‘Komalika apo tay mendedengeak ay baam.’ ” Dat kasin en ipodan Samuel.

¹⁰ Dat somag-en nan apo ken Samuel danapay kasin ayagan ay mangwani en, “Samuel.” Dat kanan Samuel, “Komalika apo tay mendedengeak ay baam.”

¹¹ Dat kanan nan apo ken siya en, “Awnit wada nan ikkak isnan Israelita ay kaeegyat et am-in ay mangdenge et awnitda masngang.

¹² Isnan deey ay agew et awnitak ikkan am-in nan inkalik ay maipanggep isnan pamilyan Eli enggana isnan katongpalana.

¹³ Tay inbagak ken siya en maid patenggan nan pangdosaak isnan pamilyana gapo tay nan an-akna ay lalalaki et menkalkalida is ngawi maipanggep ken sak-en ay olay gintekna danapay egay pinasaldeng daida.

¹⁴ Isonga insapatak ken Eli ya nan pamilyana ay maid mabalin is maibon-ong is mangsomang isnan naay nadagsen ay basol.”

¹⁵ Inpopodan Samuel enggana ay nawakgat dat bomangon et lokatana nan segpan di Templo. Omegyat ay mangibaga ken Eli maipanggep issan dinngena

¹⁶ ngem dat ayagan Eli siya ay mangwani en, “Samuel.” Danat kanan, “Ayta apo.”

¹⁷ Dat sooten Eli ay mangwani en, “Ngan nan inbagan nan apo? Adim ikampot nan inbagana ken sik-a. Dosaena sik-a no adim ibaga am-in ken sak-en nan inbagana.”

¹⁸ Isonga inbagan Samuel ken siya am-in ay maid polos in-gagagona. Dat kanan Eli en, “Siya nan apo et kalebbengana ay mang-ikkan isnan kagawisan ken siya.”

¹⁹ Masiksiken si Samuel ay tinatakdon nan apo et tinmet-ewa am-in ay kinkinwanina.

²⁰ Daet magtekan et am-in nan Israelita ay si Samuel et mamadton nan apo.