1 Samuel 16 - Kalin Apo Dios

Nan Nadotokan David Ay Men-ali 16:1-13

¹ Dat kanan nan apo ken Samuel en, “Kaat nan kabayag nan mang-ag-agaam ken Saul dapay binaybay-ak siya ay alin di Israelita? Ngem id wani, omalaka bawet is lanan di olibo dakat omey id Betlehem isnan esay am-ama ay kangadan is Jesse tay pinilik nan esa ay anakna ta siya nan men-ali.”

² Dat kanan Samuel en, “Intoy ikkak ay mang-ikkan? No dengngen Saul nan maipanggep isnan naay et awnit mangpatey.” Dat kanan nan apo en, “Omikawitka is egay kaeteng ay baka dakat kanan en inmeyka isdi ay men-idaton isnan apo.

³ No omdanka isdi dakat ayagan da Jesse isnan men-idatonam daket ipagtek ken sik-a nan awnitmo dotokan ay men-ali.”

⁴ Dat ikkan Samuel san inbagan nan apo. Omdan pay id Betlehem dat sab-aten nan aamam-an di ili ay omeegyat ay mangsoot en, “Apo, ay paggawisan nan inalim?”

⁵ Danat kanan en, “Owen, tay inmaliyak ay men-idaton isnan apo. Dalosanyo bawet nan aw-awakyo ta makidayaw kayo ken sak-en isnan men-idatonak.” Dinalosan gedan da Jesse ya nan an-akna nan aw-awakda dat ayagan Samuel daida ay makiidaton.

⁶ Idi domateng da Jesse et inilan Samuel si Eliab ay anak Jesse danat kanan isnan nemnemna en waay si tona nan pinilin nan apo.

⁷ Ngem dat kanan nan apo ken siya en, “Baken nan kaan-ando wenno kinagowapo is mangil-ilaam tay adyak siya tay sak-en ay apo et baken kaneg nan ikkan di ipogaw nan ikkak ay men-ila. Nan ipogaw et kedeng nan maiila is il-ilaenda ngem sak-en et nan nemnem di ipogaw nan il-ilaek.”

⁸ Dat aggan Jesse nan pototna ay si Abinadab et iyeyna ken Samuel ngem dat kanan Samuel en, “Baken tay baken siya is pinilin nan apo.”

⁹ Dat iyey Jesse si Samma. Dat kanan kasin Samuel, “Baken tay baken gedan is pinilin nan apo.”

¹⁰ Siya na nan inikkan Jesse isnan pito ay aan-akna ay inyeyna daida ken Samuel ngem kinwanin Samuel ken siya en, “Baken. Maid pinilin nan apo ken datona.”

¹¹ Dat sooten Samuel en, “Ay waday tap-in di anakmo is lalaki?” Dat kanan Jesse, “Wada san kimmot ngem inmey ninpastol is kalnilo.” Dat kanan Samuel en, “Paayagam kad ta omali tay adi tako itoloy ay men-idaton engganay omali.”

¹² Dat ipaayag Jesse et gowapo ya makneg ay lalaki. Dat kanan nan apo ken Samuel en, “Si tona nan dotokam.”

¹³ Isonga isnan sagang nan bebsatna dat dotokan Samuel si David isnan mangpay-ana is lana ay olibo isnan toktok David dat taktakdowen et nan Ispiriton nan apo si David. Nakwas pay di dat somagong si Samuel id Rama.