1 Aali 8 - Kalin Apo Dios

Nan Ninlowalowan Ali Solomon 8:22 , 23 27-30 41-43

²² Isnan namingsan et tinmakdeg si Solomon isnan sagang nan altar nan apo ay wada isnan pantew di Templo ay iilaen di Israelita danat ingato nan ledengna

²³ et menlowalo en, “apo ay Dios di Israelita, maid Dios is kanegmo id daya ya isnan batawa. Adim kalkalingkingan pay nan nakitolagam isnan ipogawmo ya itoltoloymo nan layadmo ken daida ay managtongpal.

²⁷ Ngem ay mentee od di Dios isnan batawa? No nan daya et adika omanay adi am-amed nan sinaadko ay Templo is adim omanayan.

²⁸ Ngem olay no keg todi apo ay Diosko, dengngem koma sak-en ay baam isnan menlowalowak ya mendawatak ken sik-a.

²⁹ Adim kalkalingkingan koma nan naay Templo ay pinilim ay mangdaydayawanmi ken sik-a ya dengngem nan lowalok isnan pantew nan naay Templo.

³⁰ Owen, isnan kad-am id daya et dengngem nan lowalok ya nan lowalon nan ipogawmo dakat pakawanen dakami.

⁴¹ Et awnit omali nan baken Israelita ay magapo isnan ad-addawi ay ili ay mangdayaw ken sik-a isnan pantew nan Templom

⁴² tay dinngeda nan panakabalinmo ya nan nakaskasdaaw ay inik-ikkam isnan ipogawmo. No omalida ay menlowalo isnan pantew nan Templom

⁴³ et dengngem koma nan lowaloda isnan kad-am ay nan daya ta idyam nan dawatda. Et siya nan manggetkan nan am-in ay ipogaw isnan batawa isnan kabaelam dadat patgen sik-a ay kaneg nan ikkan nan ipogawmo ya ta mangtekanda ay nan naay Templo ay sinaadko nan tet-ewa ay pagdaydayawan ken sik-a apo.”