1 Aali 19 - Kalin Apo Dios

Nan Inmayan Elias Isnan Bilig Ay Sinai 19:9-16

⁹ Issan ninbaatan Elias et inomdan isnan bilig ay Sinai dat omyan isnan liyang. Dat kanan nan apo ken siya en, “Elias, ay ngan nan ik-ikkam isna?”

¹⁰ Danat tebben en, “apo ay Dios ay manakabalin, kedkedengka is kanayon ay silsilbiyak. Ngem gapo tay dinokogan nan Israelita nan nakitolagam ken daida dadapay bakasen nan aaltarmo ya pinateyda nan mamadtom et kaytenda ay mangpateyda abes tay kedkedengak is nabay-an.”

¹¹ Dat kanan nan apo en, “Bomalaka ta itakdegmo isnan kad-ak.” Ngem esapay bomala si Elias dat lomaos nan apo dat mendagem is napigsa et nang-ak nan bilbilig ya naamam-as nan batbato ngem maid nan apo issan dagem. Makwas pay ay nindagem dat wada nan yegyeg ngem maid gedan nan apo issan yegyeg.

¹² Makwas pay san yegyeg dat wada nan apoy ngem maid gedan nan apo issan apoy. Makwas pay san apoy dat wada nan menkalosokos.

¹³ Idi dinngen Elias di danat ikobot nan kagayna isnan angasna dat bomala et itakdegna issan segpan san liyang. Dat wada nan menkali ken siya ay mangwani en, “Elias, ay ngan nan ik-ikkam isna?”

¹⁴ Danat kasin kanan en, “apo ay Dios ay manakabalin, kedkedengka is kanayon ay silsilbiyak. Ngem gapo tay dinokogan nan Israelita nan nakitolagam ken daida dadapay bakasen nan aaltarmo ya pinateyda nan mamadtom et kaytenda ay mangpateyda abes tay kedkedengak is nabay-an.”

¹⁵ Dat kanan nan apo ken siya en, “Iddanmo kasin isnan pondag ta somagongka id Damasco. Dat no omdanka isdi dakat pay-an is lana nan toktok Hazael ay mangdotok ken siya ay men-ali id Siria.

¹⁶ Ya ikkam gedan ken Jehu ay anak Nimsi ta men-alin nan makwani en Israel. Dakat gedan ikkan ken Eliseo ay anak Safat ay iyAbel Mehola ta siya nan mangsokat ken sik-a ay mamadtok.”

Nan Nadotokan Eliseo Ay Menmamadto 19:19-21

¹⁹ Dat komaan si Elias issan bilig et das-ana si Eliseo ay men-al-alado. Wada nan simpoo et dowa ay palis ay nasasangolan ay kanowanowang dapay si Eliseo et wada isnan kaodiyan ay palis. Dat kaanen Elias nan kagayna et ippeyna ken Eliseo ay mang-ipaila ay pinilin nan apo siya ay mamadtona.

²⁰ Dat taynan Eliseo nan kanowanowangna et ikakamona ay mang-onod ken Elias et kanana en, “Omeyak kad od menpakada ken da ama ken ina sakpay omonod ken sik-a.” Dat kanan Elias en, “Enka ngalod ngem nenemnemem ay nan apo nan mang-ayag ken sik-a.”

²¹ Dat somagong si Eliseo issan sinpalis ay nasasangolan ay nowangna et paltiyena danapay isonod san sangolda et siya nan pinang-otona issan kalni danat iwalas isnan ipogaw et isdada. Makwas pay di dat omonod et menbalin ay kabadang Elias.