1 Aali 17 - Kalin Apo Dios

Si Elias Ya Nan Balo Ay Babai 17:8-24

⁸ Isnan namingsan et kinwanin nan apo ken Elias ay mamadtona en,

⁹ “Omeyka et id wani isnan ili ay Sarefat isnan sag-en di Sidon ta menteeka isdi. Et isdi wada nan balo ay babai ay binilinko ay mangpakpakan ken sik-a.”

¹⁰ Daet omey si Elias id Sarefat. Isnan inomdanana isdi danat das-an san balo ay mamatpating danat kanan ken siya en, “Pangaasim kad ta mangatedka is danom ta inomek.”

¹¹ Issan omayan san babai ay omala is danom dat ipaonod Elias ay mangwani en, “Mangatedka gedan is olay bassit ay tinapay.”

¹² Dat kanan san babai en, “Gegetken nan apo ay manakabalin ay Diosmo en kolakolang nan makanmi. Sinkagemgem ay alina et kedeng ya atiatik ay mantika nan nababay-an. Mamatpatingak is atiatik ay pating ta pang-otok isnan naay maodi ay mangananmi isnan anakko et awnit kami et matey.”

¹³ Ngem dat kanan Elias ken siya en, “Adika omegyat. Enka bawet otowen nan sana ay kanam en maodi ay kanenyo ngem iyotowam on-ona sak-en is tinapay esakapay isagana nan kanenyo isnan anakmo.

¹⁴ Tay kanan nan apo ay Dios di Israelita en awnit wawawawada nan alina ya mantika ay mababay-an isnan pangigwanyo engganay omipaali nan apo is odan ta kasin tomobo nan esek.”

¹⁵ Dat somaa san balo et inikkana san inbagan Elias en ikkana daet enggana di et wawawawada nan makan ay inagew pala ken daida ay tolo

¹⁶ ay kaneg san inkalin nan apo ken Elias et egayda naaw-awanan is alina ya mantika.

¹⁷ Daet isnan adi mabayag dat masakit san anak san balo dat komalkalkalo et engganay matey.

¹⁸ Dat kanan san babai ken Elias en, “Ipogaw Apo Dios sik-a isonga ommat na ken sak-en. Waay obpay inmalika ay mangipanemnem isnan basbasolko isnan mateyan nan anakko.”

¹⁹ Dat kanan Elias en, “Iyalim kad nan onga.” Dat lak-eyen Elias et omeyna papodanen isnan pagseyepana isnan ngato nan onga.

²⁰ Dat ibibiyad Elias ay menlowalo en, “apo ay Diosko, ayta dakan paligaten nan naay balo ay makiteteak isnan nangipalobosam ay matey nan anakna?”

²¹ Danat gat-onan san awak san onga is mamintolo dapay menlowalo en, “apo ay Diosko, pangaasim ta tagowem nan naay onga.”

²² Dinngen nan apo nan lowalon Elias daet men-anges san onga et matago kasin.

²³ Dat lak-eyen Elias san onga et iyeyna ken inana danat kanan en, “Ilaem et natago nan anakmo.”

²⁴ Dat kanan san babai en, “Id wani et mapnekak et ay esangka ay ipogaw Apo Dios et tet-ewa ay am-in ay kankanam et magapo isnan apo.”