Yunu 4 - Wunta Mempori

Pompehohawa-Do i Ue lumaluio pompewowolono i Yunu 4:1-11

¹ Sine mongkona atuu tedoa mosa'o aroano i Yunu, onaemo ka itekuda.

² Ka mekakaiomo ndi Ondae i Ue, ipotae, ”Oo Ue, kombake kupauomo mongkona andio, tempono ongkue da i witaku? Onaemo pu'uno, ka kupolai i ndi'ipua lumako i Tarasisi, hangano kuto'orio, nine Omiumo Ue Ala anu me'aroa ka mompehohawa, anu tedoa sabara ka tedoa metenunu mompehohawa, saru me'o'ole hangano masolaa anu tinoo-Do.

³ Gagi kanandio-andio, oo Ue, po'ineeomo I'alaomo penaaku, hangano laluopo kumate sekonopo kutuwu.”

⁴ Sine pau-Do i Ue, ”Tekonake utekuda?”

⁵ I Yunu meluarako inso a ngkota atuu, ka mentoro i sabaano oleono. Iwanguo i tu'ai asa laika ka ipentoro a ntoto inengoino, sumikorio hapa anu ta gagi a ngkota atuu.

⁶ A pompakosi-Do Ue Ala tuwuomo asa ngkeu keu hulu-hulu lumaloo uluno i Yunu umengoio, ka itetarero inso a mosa'ono aroano. I Yunu tedoa mo'unde hangano keu hulu-hulu atuu.

⁷ Sine tisomono, tempono mewanta towea, a pompakosi-Do Ue Ala haweomo asa ule-ule, anu kumarasio keu hulu-hulu atuu, ranta ka imoleu.

⁸ Tempono saba oleo, a pompakosi-Do Ue Ala mepuuriomo angi sabaano oleo anu mokula ntu'u, ranta wantano oleo mokomahakio uluno i Yunu, ka i'amba tebangkuomo telusa. Ka i'amba mo'ema ka imate, ipotae, ”Laluopo kumate sekonopo kutuwu.”

⁹ Pau-Do Ue Ala ndi Yunu, ”Tekonake utekuda hangano keu hulu-hulu atuu?” Sangkino, ”Tekonaomo kutekuda ranta kumate.”

¹⁰ Ka i'amba mepau Ira Ue Ala, ”Upehohawao keu hulu-hulu atuu, anu ndi onae maupo tedei nahina pe'i'iseimu ka komba omue motuwuo, anu tuwu i larono asa wongi ka mate i larono asa wongi mbo'u.

¹¹ Kana'umpe nahi Aku mehohawao Niniwe, kota anu langkai atuu, anu palilino torea inso asa etu ka rua pulu nsowu mia, anu luwuno nahi ponto'ori mosisalao kae ngkoana ka kae manggali, saru pinotuwuno anu hadio?”