Yunu 3 - Wunta Mempori

Tepidino Niniwe ka inonini halano 3:1-10

¹ Haweomo pau-Do i Ue ndi Yunu anu kompenduano, kanandio,

² ”Pewangumo, lakomo i Niniwe, kota anu langkai atuu ka pohaweomo ndi onae pe'oliwi anu pinau-Ku ndi omue.”

³ Mepatindaomo i Yunu, ka i'amba lumako i Niniwe, menunu kana pau-Do Ue Ala. Niniwe onaemo asa kota anu tinengiriako langkaino, maluano otolu oleo pelempaa.

⁴ Mompu'uomo i Yunu mewinso a laro ngkota atuu, asa oleo pelempaa olaino, ka i'amba mebooli, ”Pato pulu oleo mbo'u, manasa Niniwe winowangunsule.”

⁵ To Niniwe mpope'ala-ala ndi Ondae Ue Ala, ka do'amba mempaleleo puasa, ka ondae, moiko mia anu sompoomo tinuwuno maupo nana'ote, pompokona sawu po'inombo.

⁶ Mansano hawe lele atuu ndi mokole kota Niniwe, metiiomo inso a ngkadera poparentaano, ilohuo lemba meloeno, ipekukumbuako sawu po'inombo, ka i'amba mentoro a awu.

⁷ Ka i'amba a mpeparentado mokole ka luwuno anu langkai potorono mia mempaleleo ka mempauo i Niniwe kanandio, ”Mia ka pinotuwu, sapi ka bawaano bembe bimba si dompongkaa hapa-hapa, si dompongkaa ewo ka si dompo'inu uwoi.

⁸ Asalakono luwuno mia ka pinotuwu, mpekukumbuako sawu po'inombo ka mpebooli meroku ndi Ondae Ue Ala, saru asalakono singge mia mepokule inso a leluno anu mosa'o ka inso a mpobobarasaia anu wineweuno.

⁹ Ba mansa, bara'ura Ondae Ue Ala Ira mepokule ka me'o'ole saru mewolili inso a ntekuda-Do anu tensila atuu, ranta nahi tomemate.”

¹⁰ Mansa-Do kumitao Ue Ala wineweudo atuu, onaemo kana'umpe dompepokule inso a leludo anu mosa'o, me'o'ole Iramo Ue Ala hangano masolaa anu Dopatindaomo tiado ka nahi gagi mbo'u Doweweuo.