Yunu 2 - Wunta Mempori

Pekakaino i Yunu a kompono Bou 2:1-10

¹ I Yunu mekakai ndi Ondae i Ue, Ue Alano, inso a laro kompono bou atuu,

² ipotae, ”A laro masusaaku mebooli aku ndi Ondae i Ue, ka Dosangki aku, inso a laro po'iangado mia mate kupebooli, ka Irongeo pebooliku.

³ Ipetadiakunemo a mpo'ianga anu ondalo, a mpuheno tahi molue, uwoi mansolo sumampu aku; luwuno peleluno bomba ka bomba-Miu tumutuwi aku.

⁴ Umarino atuu kupotae: teponsia akumo inso i aro-Miu. Da aku koa kumitao mbo'uke raha-Miu anu mempori?

⁵ Luwuno uwoi kumadu aku, ta sumolangio penaaku, uwoi a ondaloano sumampu aku; ewo ntahi wewesio uluku.

⁶ A mpu'uno luwuno torukuno kupetii, toondu a empehino tolino; tondono telanso i bungkuku nahina tampulaano. Tempono atuu Itandeo penaaku inso a laro ngkaburu, oo Ue, Ue Alaku.

⁷ Tempono sumangaku molema, terorambe akumo ndi Omiu Ue, ka haweomo pekakaiku ndi Omiu, a raha-Miu anu mempori.

⁸ Ondae anu mpe'ini a lahumoa nahina pengkonaano bara'ura domebintao petenunudo.

⁹ Sine ongkue, saru po'undeku aku mompesombaako pesomba ndi Omiu; hapa anu kutangao aku umowahio. Inso ndi Ondae i Ue tekaduduia!”

¹⁰ Ka i'amba mepau Iramo i Ue a bou atuu, umarino atuu i Yunu iluao a wita.