YUDASI 1 - Wunta Mempori

Tabea 1-2

¹ Inso ndi Yudasi, tetenaa-Do i Yesu Kerisituu ka pepaekompono i Yakobu, hawe ndi ondae anu mempinoboi, anu mempinehohawa ndi Ondae Ue Ala Ama, ka anu mempinekaria tia-Do i Yesu Kerisituu.

² Pe'aroa, rodoa ka pompehohawa po'ineeomo ka ikoteti-tetiangino ndi omiu.

Pohuku a luwuno guru mpegaupi 3-16

³ Luwuno pepaekompo anu kinekewoiku, kontongaaku mompesu'ui meteahako buriakomiu mongkona tekaduduiato luwu, telelu aroaku burio andio ndi omiu ka mompauakomiu, ka imekongko koa mpiha mpeteahako mengkorahakono pompe'ala-ala anu pinohaweomo a luwuno mia mempori.

⁴ Hangano mengkaa hinao mia susua anu mewinsoomo nahi teto'ori i tonga-tongamiu, onaemo mia anu tehineomo domempinakosi ka domehinuku. Ondaemo mia anu mosa'o gaudo, anu mensala pakeo pe'aroa-Do Ue Alato ka dompoweweu po'eheno aroado, ka anu mehapuo asa-asa-Do Anu Pabawa ka Ueto, i Yesu Kerisituu.

⁵ Sine, maupo imento'oriomo luwuno atuu ka nahi imenanta-nantaakono mbo'u, ineheku mopoto'oriakomiu nine lano Ondae i Ue kumadudui ira bawaa-Do inso i wita Masiri, sine pohona mbo'u Dopepate ira anu nahi dompompe'ala-ala.

⁶ Ka nine Dotaha ira mala'eka anu nahi domentondao luwuno tidano pabawado, sine anu mebintao po'iangado, saru pongu anu nahina tampulaano i wawontolino wongi-wongia hawe a mpobitaraa a oleo langkai,

⁷ mengkena kana Sodomo ka Gumora ka luwuno kota petengi-tengino, anu saru wineweu anu mengkena mpoweweu pebelesua ka mpo'ungke pepokonsanaa anu nahi pototono, mpompembasai iramo pobobarasaino api anu nahina tampulaano gagi pompopoto'ori a luwuno mia.

⁸ Sine maupo kanandio mia anu memo'ipi mbo'u atuudo mengkokoburutio koroido ka mempokongkodeio pabawa-Do Ue Ala saru mpepaukiako ira luwuno anu memaramba i suruga.

⁹ Sine i Mikaeli tadulakodo mala'eka, tempono a laro aasa teposisalaa megaga saru i Mosa'o mongkona wata ngkoroino i Musa, nahi sapa humukuakono i Mosa'o pau pompepaukiako, sine ipotae, ”Po'ineeomo Ondae i Ue kumuahakomu!”

¹⁰ Sine dompepaukiako ira luwuakoano anu nahi domento'orio ka tendeano hapa anu domento'oriakono aroado kana kondehora anu nahina pinewowolo, onaemo pu'uno domemateako.

¹¹ Memasola iramo, hangano domentondao sala anu tinondano i Kai ka hangano ondae, ka hangano tambo, onaemo ka dontedonta a ntepopo'oono i Bilea, ka memate ira hangano pe'ewado kana i Kora.

¹² Ondaemo andio tataa a mpelimbua mambepehohawamiu, nde ondae nahi mokoko'iido mpongkaa hadio ka butu mpekakaakono koroido ondaedo; ondae kana seru anu nahi pe'uwoi, anu telalo ipuurio angi; ondae kana luwuno keu anu i tempo motu'i-tu'i nahi pewua, luwuno keu anu tebuta saru luwuno hakano ka mateomo ntu'u.

¹³ Ondae kana bombano tahi anu mongkokongiri, anu mewureako tetataado ondaedo; ondae kana luwuno anano wula anu tiano tetindaomo po'ianga i wawontolino wongi-wongia ranta nahina tampulaano.

¹⁴ Mongkona mbo'u ondae i Heno, inule ko'opitu inso ndi Adama, mompauomo anu ta gagi, ipotae, ”Menteeano Ondae i Ue hawe saru sowu-sowuno mia mempori-Do,

¹⁵ Ira bitarao luwuno mia ka modontaiako ira pohuku a mia memosa'o gaudo hangano luwuno wineweu gau mosa'o, anu mewineweudo ka hangano luwuno pau pontata, anu pinaudo mia ntehala anu mosa'o gaudo atuu ndi Ondae i Ue.”

¹⁶ Ondae atuudo mia anu mpewuruki ka mpe'asengi mongkona teweweudo, mentuwu montonda po'eheno aroado, sine wiwido meluarako ira pau anu nahi pewinso akala ka me'unde-unde ira mia ka dompohawe me'uraa.

Patudu mompokoroso pompe'ala-ala 17-23

¹⁷ Sine omiu, luwuno pepaekompo anu kinekewoiku, impewowoloomo hapa anu i ndi'upua domempauomo tinena-Do Ueto i Yesu Kerisituu ndi omiu.

¹⁸ Hangano domempauomo ndi omiu, ”tamo haweako pokotampulaano wawontolino ira mehawe mia pompopodeu-deu anu ira mentuwu mentondao po'eheno aroa ka gaudo anu mosa'o.”

¹⁹ Ondaemo anu mpoweweu teposisalaa anu pinabawai butu luwuno mosisirino wawontolino andio ka anu tuwu nahina Penaa Mempori.

²⁰ Sine omiu, luwuno pepaekompo anu kinekewoiku, imewanguomo koroimiu omiu-miu me'empehiako pompe'ala-alamiu anu lalu mempori ka impekakaimo a laro Penaa Mempori.

²¹ Impekariaomo koroimiu kanandio a laro pompehohawa-Do Ue Ala saru mensikorio pe'aroa-Do Ueto, i Yesu Kerisituu, tiano tuwua anu nahina tampulaano.

²² Impopokitaomo pe'aroa ndi ondae anu menanta-nanta,

²³ Imengkadudui iramo mesala rumontu ira inso a api. Sine impopokitaomo pe'aroa anu tinondaako doitoa a luwuno mia susua mbo'u, ka ime'o'aliaakonomo sangkado anu rinegeiako luwuno mosisirino hala.

Pokotompaano 24-25

²⁴ Ndi Ondae, anu pabawa modagai ka si ntetidu ka anu wawa komiu nahina tataano ka buke mawongkoa i arono maramba-Do,

²⁵ Ondae Ue Ala anu asa-asa, Puu Pongkaduduito hangano Ondae i Yesu Kerisituu, Ueto, ndi Ondaemo marambaa, pompelangkai, roso ka pabawa se'eluno luwuno tempo ka kanandio-andio ka ranta nahina tampulaano. Ami.