Yosua 9 - Wunta Mempori

Akalado to Gibeo

¹ Mansado merongeo mokole i sumooano oleo i asa towano koro Yarade, ia mentorukuno, ia pongkuno wita, ia tompaano wiwi ntahi langkai hawe i asa mbalino torukuno Libano, po'iangaado mokoledo to Heti, to Amori, to Kana'a, to Perisi, to Hewi ka to Yebusi,

² ntepo'asa ira moroso, meteaakono i Yosua ka to Isaraeli.

³ Sine mansado merongeo palilido to Gibeo, hapa anu wineweuno i Yosua i kota Yeriko ka Ai,

⁴ mpompewowolo iramo akala; melako ira mpompatinda kaangado, mpo'ala ira kampili mososao ta po'ulaado kaanga pinateke ia kalidedo, ponaapado anggoro mososa'o, anu teberi ka tinompili,

⁵ sandalado memososa'o, sineu, ka dompesandalaako, sangka anu dompelembaako ntebeberi, sekonopo roti kaangado motutu'iomo, tepe'awuomo.

⁶ Kanatuumo domelako ndi Yosua, a kemado i Giliga. Dompotaeakonomo ka a nto Isaraeli, ”Omami ndio nte'inso i wita olai; moiko to mpedandi.”

⁷ Sine mpotae ira to Isaraeli a nto Hewi atuu, ”Bara'ura omiu andio mpo'ia komiu i olo mami, kana'umpe ntu'u kami mpoweweu pedandia saru omiu?”

⁸ Mpotae ira ndi Yosua, ”Omami andio ata miu.” Mesikeno i Yosua, ”Isema ke omiu andio ka isua imente'inso?”

⁹ Domesangkio, ”Me'inso kami a olaiano ue, omami andio, mehawe kami hangano nee-Do i Ue, Ue Ala miu, ka kimerongeomo lele mongkona Ondae, luwuakoano anu wineweu-Do i Masiri,

¹⁰ ka luwuakoano anu wineweu-Do a orua mokoledo to Amori, i asambalino koro Yarade, Sihoni, mokole Hesiboni, ka i Ogo, mokole i Basani, anu mpo'ia i Asita.

¹¹ Onaekoa mia motota'u mami ka luwuno palili mpotae ira ndi omami kanandio: Tompowawa kaangato ia nsala, ka tomelako ndi ondae: Omami andio tetenaa miu gaagi kanandio tompedandimo.

¹² Ndiomo roti mami, da mokula tempono kimpelungka inso i raha mami aiwa tepohaweakomiu, sine kanandio, imengkitaomo, mokariomo ka butumokoa rawo-rawono.

¹³ Ndio ponaapa mami anggoro, da wo'ohu tempono kime'ihiio, sine kanandio teberiomo; ndio sangka ka sandala mami mosa'oomo luwu hangano pelempaa mami tedoa olai.”

¹⁴ Dome'alao to Isaraeli kaangado mia atuudo, sine nahi dompo'ema pontiso-Do i Ue.

¹⁵ Ka i'amba i Yosua moweweu pesintuwua ka pedandia saru ondae, nine ta mo'inee ira mentuwu; ka petewawa bawaa atuu mpesumpa ndi ondae.

¹⁶ Sine mansano laloomo otolu oleo, umarido mpedandi to Isaraeli ka mia atuudo, domerongeomo motae mia atuudo po'ia ira umpeda ndi ondae, ka mpo'ia ira i olodo.

¹⁷ Nde melako iramo to Isaraeli, ko'otolu oleono hawe iramo ia kota-kotado mia atuu; onaemo Gibeo, Kepira, Beero, ka Kiriati-Yearimi.

¹⁸ To Isaraeli nahi dompompepate, nde petewawado mpesumpa iramo ia nee-Do i Ue, Ue Ala Isaraeli. Onaemo ka dompewuruki ndi ondae petewawado.

¹⁹ Mpepau iramo petewawado ia luwudo bawaa, ”Pesumpa kamimo ndi ondae a nee-Do i Ue, Ue Alado to Isaraeli; onaekoa ka nahi kita sumaari ira.

²⁰ Kanandiomo ba toweweu ira: Po'ineomo domentuwu, kasi tomemasola hangano sumpa, anu tontepo'asaakonomo.”

²¹ Mpotae ira mbo'u luwudo petewawa, ”Po'ineomo domentuwu.” Ondae mempinokogagi puu mpobansi keu, ka puu mpontambu uwoi tiano luwuno bawaa, kana anu pinakosidomo petewawa mongkona ondae.

²² Ipoboi iramo i Yosua mia atuudo ka ipotaeako ira kanandio, ”Tembio ka ipopo'oo kami motae: Omami andio mpo'ia kami tedoa olai inso ndi omiu, ka hinaano mpo'ia komiu itonga-tonga mami?

²³ Onae pu'uno, tetotonaakomiumo ka nahi ta te'otu komiu gagi tetenaa, puu mpobansi keu ka puu mpontambu uwoi tiano raha-Do Ue Alaku.”

²⁴ Domesangkio i Yosua, dompotae, ”Lano pinaleleomo ndi omami, motae Ondae i Ue, Ue Ala miu tumenao i Musa tetenaa-Do, meweengakono luwuno wita andio ndi omiu ka rumopu ira luwuno palili inia atuu i aromiu. Onaemo ka kitedoa medoito memate, umaropi komiu; onaemo ka kimpoweweu kanatuu.

²⁵ Gaagi kanandio, omami ndio ia ngkae miu, po'ineeomo iweweu kami kana'umpe anu pinemoikomiu ka mentee.”

²⁶ Kanatuumo doweweu ira. Dopotola iramo inso a ngkaedo to Isaraeli, onaemo ka nahi domempinepate.

²⁷ Ka i tempo atuu ipokogagi ira i Yosua puu mpobansi keu ka puu mpontambu uwoido to Isaraeli ka a meda pontunua mpesombaa ndi Ondae i Ue, ranta kanandio ia mpo'iangaa anu ta bininiki-Do.