Yosua 8 - Wunta Mempori

Tekaleno kota Ai

¹ Mepau Iramo Ondae i Ue ndi Yosua, ”Sidoito kasi molusa aroamu. Wawa iramo luwuno sorodadu, impepatinda, imelako i kota Ai. Ka uto'orio, Aku meweengakono ndi omiu i kota Ai, mokoleno, palilino,

² ka uweweuo i kota Ai ka mokoleno, kana uweweuo Yeriko ka mokoleno; butu sangka, ka pinotuwudo anu moiko impomuruo. Tena ira miamu mpewuni i bungkuno inia.”

³ Mepatindaomo i Yosua saru luwuno sorodaduno lumako i kota Ai. Ibiniki iramo i Yosua tolu pulu nsowu mia, luwuno pongkiari anu moroso ntu'u, itena ira melako ia wongi atuu.

⁴ Ipauako ira, motae, ”Ka imento'orio koa, impewuni ibungkuno inia, impepatinda sumaari ira, simpo'ia tedoa olai te'inso i inia, ka impedagai luwu.

⁵ Ongkue ka luwuno mia anu mperongaakune me'umpedaakono inia atuu; ba ira mpeluarako mensapoi kami, kana anu amba-ambano, kami mpolai olaiako ira.

⁶ Gaagi ira mpeluarako umungke kami, kami paani ira ka dome'olai te'inso i iniado, nde ira mpotae: Mpolai ira inso ndi ontae, kana anu amba-ambano. Ba mpolai kami inso ndi ondae,

⁷ ka omiu impeluarakomo te'inso ia mpewunia miu melako sumapoio i kota Ai. Ka Ondae i Ue, Ue Alamiu, Ira meweengakono a ngkaemiu.

⁸ Sa'umarimiu menangio inia atuu imentunuo; luwuakoano imeweweuo kana pau-Do i Ue, ka imento'orio motae, onaemo petenaku ndi omiu.”

⁹ Kanandiomo i Yosua tumena ira melako, melako iramo mpelempa a mpewuniado mpo'ia i olono Beteli ka Ai, a sumooano oleo i kota Ai. Sine i Yosua merato i olono palilino ia wongi atuu.

¹⁰ Tisomono mo'oru, sapewanguno i Yosua iparesao baresido to Isaraeli ka ipelempa merongaako ira mia mota'udo to Isaraeli i arodo tongku atuu melako i kota Ai.

¹¹ Ka luwudo sorodadu anu merongaakono mpelempa me'umpedaakono hawe i arono kota atuu, ka do'amba mpoweweu kema i utara Ai, ka lembono atuu i olodo ka kota Ai.

¹² I biniki iramo i Yosua bara'ura lima nsowu mia, itena ira mpewuni i olono Beteli ka Ai, i sumooano oleo kota atuu.

¹³ Kanandio i'atora ira palilino: Luwuno sorodadu i utarano kota ka baresi i bungkuno kota a sumoano oleo. Wongi atuu melempaomo i Yosua molalo lembono.

¹⁴ Da mo'oru, mansano mokole Ai kumitao mongkona atuu, onae ka luwuno palilino, luwuno mia i kota Ai, tumampu'u mpeluarako mpeteako ira to Isaraeli, a korimbino lembono; mokole atuu nahi to'orio nine hinao mia mpewuni i bungkuno kota.

¹⁵ I Yosua ka luwudo to Isaraeli mpelelu kana mia mposuka, mpolai lumako i pada one.

¹⁶ Onaemo ka luwudo mia i kota mentinena lumulu ira to Isaraeli. Domeluluo i Yosua, ko'ola-olaino dontepaani bintao kota.

¹⁷ Maupo te'asa mia nami hina anu tebinta i kota Ai ka i Beteli anu nahi peluarako lumulu ira to Isaraeli. Domebintao iniado te'ungkahi, hangano luwudo lumulu ira to Isaraeli.

¹⁸ Mepau Iramo i Ue ndi Yosua: ”Tandeo kansaimu anu a ngkaemu te'aro i kota Ai, nde Aku meweengakono kota atuu a ngkaemu.” Itandeomo i Yosua kansaino te'aro i kota atuu.

¹⁹ Mansano tumandeo kaeno, mpentade iramo luwu mia anu mpewuni, mpelulu mpewinsokio inia, mpetorokio, ka domentunuo inia atuu.

²⁰ Mansano to Ai mpewolili i bungkudo, domengkitao ahu api mewuatako i langi; nahi donte'alu mpolai maupo isua ira melako, nde luwudo palili anu mpolai i pada one, mpepokule wali lumulu ira.

²¹ Mansano i Yosua ka luwudo to Isaraeli kumitao, nine mia anu mpewuni atuu domerontuomo kota atuu ka ahu api mewuatako, mpewolili iramo ka dopepate ira to Ai.

²² Kontongaado koa atuu mpeluarako iramo to Isaraeli anu mehano inso i laro kota sumapoi ira to Ai, onaemo ka donte'asi i olodo to Isaraeli, anu te'inso i ndi'ai, anu te'inso iraane; luwudo to Ai pinepate, onaemo nami hina mau te'asa mia anu toola.

²³ Sine mokoledo to Ai domerakoo kotuwu-tuwu ka domewawao i arono i Yosua.

²⁴ Umarido to Isaraeli mepate ira luwu mia i kota Ai a ntonga mpada, isua dolulu ira to Isaraeli, luwudo mateako mata mponai hawe a mia anu pokotompaano. Luwudo to Isaraeli mpekule i kota Ai ka donangiako ira ponai.

²⁵ Luwudo mia anu mate i oleo atuu tama ka beine, hopulu ka orua nsowu, luwudo to Ai.

²⁶ Nahi potiio i Yosua kaeno anu montande kansai ba napi pepate ira luwu palili kota Ai.

²⁷ Butu pinotuwu ka sangkado i kota atuu anu pinomurudo to Isaraeli, menunu pau-Do i Ue, anu Dotenaakono ndi Yosua.

²⁸ I Yosua tumunuo kota Ai ka iweweuo gagi howuno anu tinunu hawe pokotampulaano, gagi wita anu morungku ranta kanandio.

²⁹ Mokole Ai indoeo a ngkeu pondoea hawe ngkiniwia. Mansano sumoo oleo, metenaomo i Yosua ka dompotiio wata ngkoroino inso ia ngkeu pondoea ka domentadio i arono pewowa kota, ka dompowangu howuno watu anu langkai iwawono, da hinao ranta kanandio.

Pontunua pesomba i torukuno Eba; ka pobasaa songka Taura

³⁰ I tempono atuu i Yosua mowangu meda pontunua pesomba ndi Ondae i Ue, Ue Alado to Isaraeli, i torukuno Eba,

³¹ kana anu itenaakono i Musa, tetenaa-Do i Ue, a nto Isaraeli montonda anu teburi a wuntano i Musa; asa meda te'inso ia watu anu nahi tinaha, anu nahi wineweuako labu hapamokoa. I wawono dompotunu pinotuwu pesomba ndi Ondae i Ue, pesomba tetolosia.

³² Tu'aimo i wawono watu, iburio i Yosua polimbano songkado i Musa, iburio i arodo to Isaraeli.

³³ Luwudo to Isaraeli, mia memota'udo, petewawa ka puu mpobitara mpentade ira mompombali i horino burua pedandia, umaropi ira sando mpesomba inso ia tongku Lewi, mia mpowawa burua pedandia-Do i Ue, maupo mia mehawe, ka lano mia i tu'ai, tia oruano me'aro i torukuno Gerisi ka tia oruano mbo'u me'aro i torukuno Eba, kana petenano i Musa ndi'ipua, tetenaa-Do i Ue, ba ira mporonso to Isaraeli.

³⁴ Umari atuu binasaomo songka Taura, poronso ka petotonaa kana anu teburi ia songka.

³⁵ Nahina maupo te'asa mpali pau, anu iparentaakono i Musa nahi basao i Yosua ndi ondae to Isaraeli, ia beine ka nana'ote ka luwudo anu hawe.