Yosua 6 - Wunta Mempori

Tekaleno kota Yeriko

¹ Tempo atuu tondo pewinsoa i inia Yeriko tinondoomo, hangano to Isaraeli. Nami hina mewinso ka meluarako.

² Mepau Iramo i Ue ndi Yosua, ”Kitaomo, Aku moweeko inia Yeriko saru mokoleno ka pongkiarino anu moroso ntu'u.

³ Omue ka luwuno sorodadumu imentanggolilio kota atuu, tepohonamokoa. Kanandio uweweuo i larono onoo oleo,

⁴ ka opitu ira sando mpesomba mpowawa tawuwua tandu bimba i arono burua pedandia. Sine i oleo ko'opitu, pepintu imebolilio kota atuu, ka sando mpesomba mpopuuri tawuwua.

⁵ Tewala tawuwua tandu bimba melai unino, mansano imerongeo unino tawuwua, luwuno tongku atuu ka impebooli meroku, gagi rere watu ta tehoa, ka i'amba mempomaruo sompo mia tetutu lumako i arono.”

⁶ Ka i'amba i Yosua anano i Nunu moboi ira luwuno sando mpesomba ka ipepauako ira, ”Imentandeomo burua pedandia atuu ka opitu mia mpowawa opitu tawuwua tandu bimba i arono burua-Do i Ue.”

⁷ Ka ia tongku atuu ipauako ira: ”Impelempamo, mebolilio kota atuu ka sorodadu mpelempa i arono burua-Do i Ue.”

⁸ Umarino i Yosua mepauako ira tongku atuu, mpelempa iramo opitu sando mpesomba, mpowawa opitu tawuwua tandu bimba i aro-Do i Ue ka domempuurio, ka burua pedandia tumonda ira.

⁹ Ka luwuno sorodadudo mpelempa i arodo sando mpesomba anu mpompuuri tawuwua, ka anu mpebaresi pokotompa tumondao burua, ka sangkakala kongkono pinuuri nahi'otu.

¹⁰ Sine i Yosua ipauako iramo ia tongku atuu kanandio, ”Siimo impebooli, siimo impoporongeo paumiu, maupo te'asampali pau kasi peluarako inso ia wiwimiu, hawe ia oleo anu aku pauakomiu: Impeboolimo! Ka i'amba mpebooli.”

¹¹ Kanandiomo burua-Do i Ue tumanggolilio inia atuu, imentanggolilio tepohonamokoa. Umari atuu impekulemo ia kema ka imperatomo i tu'ai.

¹² Tisomono kopewanguno mo'oru i Yosua domentandeomo sando mpesomba burua-Do i Ue.

¹³ Mpelempa iramo mbo'u opitu sando mpesomba, anu mpowawa opitu tawuwua tandu bimba atuu i arono burua-Do i Ue kontongaado mpelempa, mpompuuri tawuwua. Sorodadu mpelemba i arodo ka baresi pokotompa tumondao burua pedandia-Do i Ue kongkono sangkakala pinuuri.

¹⁴ Kanatuumo i oleo anu ko'orua domentanggolilio inia atuu butu pohona, mpekule iramo ia kemado. Kanatuumo domeweweuo onoo oleo tehineno.

¹⁵ Sine ko'opitu oleono dompewangu da mo'oru, tempono da'iaopo isaba oleo, kanampiha domentanggolilio kota atuu pepintu, butu ia oleo atuu domebolilio pepintu.

¹⁶ Anu kopepintuno, sando mpesomba domempuuriomo sangkakala, mepauomo i Yosua ia tongku atuu, ”Impeboolimo, nde Ondae i Ue Dopeweengakonomo inia andio ndi omiu!

¹⁷ Inia atuu ka luwuno ihino Dopakosio i Ue, pinokoropu, butu i Rahabu beine belesu atuu, pinotuwu, saru luwuno pe'etuno anu mpe'asaakono ia rahano, hangano iwuni iramo mia anu tinenato.

¹⁸ Sine omiu, dagaio koroimiu, inso ia sangka anu ta pinokoropu, sii mpo'ala sangka anu pinakosiomo atuu, kasi hangano onae po'iangado to Isaraeli ta pinokoropu.

¹⁹ Luwuno wulaa ka salaka sangka mala ka labu mempori ndi Ondae i Ue, luwuakoano atuu ta wininso ka pinumpu ia raha-Do i Ue.”

²⁰ Mpebooli iramo to Isaraeli, ka mpopuuri tawuwua, mansado merongeo unino tawuwua mpebooli iramo to Isaraeli tedoa meroku. Tehoaomo bente Yeriko, mpomaru ia bente mpewinso ia kota, ka dompoko'alao kota atuu.

²¹ Dompepateako ira ponai, tama ka beine, mia mota'u ka mia mongura, ka io pinotuwudo, sapi, bimba, ka kalide.

²² Sine orua ira mia anu mompadaso atuu ipotaeako ira i Yosua, ”Ipewinso ia rahano beine belesu atuu wawa ira mpeluarako ka luwuno mia anu i laro rahano, kana anu idandiakonomo ka mesumpa ndi onae.”

²³ Mewinso iramo orua ira pompadaso mongura atuu ka dowawao meluarako i Rahabu ka amano ka ineno, ka pepaekompono ka luwuno pe'etuno, ka dotisoako ira po'iangaado i bungkuno kemado anu susua inso ia kemado to Isaraeli.

²⁴ Sine inia atuu ka luwuno anu i larono sinongkoomo, butu wulaa, salaka, mala, ka labu donaa ira pinumpu ia raha-Do i Ue.

²⁵ Kanatuumo i Rahabu, beine belesu atuu ka pe'etuno ka luwuno mia pe'asano ipo'inee ira i Yosua ka domentuwu. Mpo'ia iramo beine atuu i tonga-tongado to Isaraeli ranta hawe kanandio, hangano dowuni iramo mia tinenano i Yosua padasoo kota Yeriko.

²⁶ Tempo atuu mesumpaomo i Yosua, ipotae, ”Tetotonaaomo i aro-Do i Ue mia anu wali wanguo kota Yeriko andio; ka i'owahiakono penaano anano anu aka, gagi empehino kota atuu, gagi owahino penaano anano tompasusu, ka ipoweweuakono pewowano anu moroso!”

²⁷ Ka Ondae i Ue kumongkomio i Yosua, ka teleleomo ia luwuno inia atuu.