Yosua 4 - Wunta Mempori

Watu petondoni anu hopulu ka orua

¹ Mansado mpesakiako luwu to Isaraeli ia Koro Yarade, mepau iramo i Ue ndi Yosua, kanandio,

² ”Pobinikimo inso ia tongku atuu te hopulu ka orua mia, nte'o'asa sompo tongku,

³ ka tena ira kanandio: Tandeomo hopulu ka orua watu inso i ndi'ai, i tongano koro Yarade andio, anu a mpelandaado sando mpesomba atuu, wawaomo luwuno atuu i asatowano ka imenaao a mperatoamiu te'ingka wongi.”

⁴ Ipoboi iramo i Yosua hopulu ka orua mia anu pinakosinomo nte'o'asa mia inso ia tongkudo to Isaraeli,

⁵ ka ipotaeako ira i Yosua, ”Impesakiakomo i arono burua pedandia-Do i Ue, Ue Alamiu, i tonga-tongano koro Yarade, ka impo'ala nte'o'asa mia asa watu ka imempo'ahao, montonda doano tongkudo to Isaraeli,

⁶ ka igagi tondonino ndi omiu. Tewala te'ipua mpesikeno ira anamiu: Hapa pengkonaano watu andio ndi omiu?

⁷ Asalakono pauako ira motae: Uwoi koro Yarade te'otu i arono burua pedandia-Do i Ue; itempono burua atuu sinakiako. Onaemo pu'uno watu andiodo ta gagi petondoni ia nto Isaraeli ranta nahina tampulaano.”

⁸ Domeweweuomo to Isaraeli kana petenano i Yosua. Mpontande iramo watu hopulu ka orua inso i tongano koro Yarade, kana petena-Do i Ue ndi Yosua, montonda doado tongku Isaraeli. Luwuno atuu domewawao i asatowa a mperatoado, ka domenaao i tu'ai.

⁹ Mowangu mbo'u i Yosua hopulu ka orua watu i tongano koro Yarade ia hangangkarudo sando mpesomba anu mpontande burua pedandia atuu. Luwuno watu atuu da koongko ranta hawe kanandio.

¹⁰ Luwudo sando mpesomba anu mpontande burua pedandia mpentade ira mpiha i tongano koro Yarade, ranta ka i'umari wineweu luwuno anu Dotenaakono i Ue ndi Yosua ka domempinauako a tongku atuu, menunu kana petenano i Musa ndi Yosua. Umari atuu mpopari-pari iramo tongku atuu mpesakiako.

¹¹ Mansado luwuno tongku atuu umari mpesakiako, domensakiakonomo mbo'u burua pedandia-Do i Ue atuu saru luwudo sando pesomba i arono matado tongku atuu.

¹² Inuleno i Rube, inuleno i Gadi, ka tongku Manase anu asantia atuu, mpesakiako, mpesangka petea, i arodo to Isaraeli atuu kana ipauako ira i Musa.

¹³ Bara'ura patopulu nsowu mia anu mpepatinda mpetea mpesakiako i aro-Do i Ue lumako i lembono Yeriko ira mpetea.

¹⁴ I temponomo atuu Ondae i Ue Dopokolangkaio neeno i Yosua i arodo to Isaraeli, ranta ka domedoitoakono, kana domedoitoakono i Musa asa ntinumuwuno.

¹⁵ Mepau iramo i Ue ndi Yosua, kanandio,

¹⁶ ”Tena iramo sando mpesomba mpontande burua songka-Do Ue Ala atuu ka dompewuatako inso ia koro Yarade.”

¹⁷ Onaemo ka itena ira i Yosua sando mpesomba mentandeo burua pedandia, ”Impeluarakomo inso ia koro Yarade.”

¹⁸ Mansado mpeluarako inso ia koro Yarade sando mpesomba saru anu pontande burua pedandia-Do i Ue atuu, ka da'iaopo dompelanda ia wita motu'i, tepokuleomo uwoi Koro Yarade umili kana se'eluno, buuso hawe ia wiwino.

¹⁹ Luwuno tongkudo to Isaraeli mpeluarako inso ia koro Yarade ia tanggala hopulu wula ko'asa, ka mpoweweu kema i Giliga, i sabaano oleo Yeriko.

²⁰ Watu anu hopulu ka orua anu inalani inso a ngkoro Yarade atuu iwanguo i Yosua i Giliga.

²¹ Motae i Yosua a nto Isaraeli, ”Ba mpesikeno ira ana miu te'ipua hapa pengkonaano watu andiodo?

²² Asalakono ka imempauako ira anamiu kanandio, ’Mpesakiako iramo to Isaraeli a ngkorono Yarade andio ia wita anu motu'i!’

²³ Nde Ondae i Ue, Ue Alamiu anu Dopokomotu'io koro Yarade i aromiu, onaemo ka dopokompesakiako, kana Doweweuo i Ue, Ue Alamiu tahi Teberau, anu Dopokomo'areo i aroto, ka tompokompesakiako,

²⁴ ka domento'orio luwuno mia i tolino, motae moroso kae-Do i Ue, ka domedoito mpiha ndi Ondae i Ue, Ue Alamiu”