Yosua 3 - Wunta Mempori

Mensakio Koro Yarade

¹ Da mo'oru, mewanguomo i Yosua saru luwudo to Isaraeli, mpelungka te'inso i Sitimi, ka hawe iramo ia Koro Yarade, mperato iramo i ra'ai, se'eluno napi dompesakiako.

² Mansano lalo otolu oleo luwuno tadulako mentanggolilio luwuno kema,

³ Ka iparenta ira luwuno tongku atuu, ipotae, ”Tewala imengkitaomo burua pedandia-Do i Ue, Ue Alamiu domenselao sando mpesomba, anu lano tongku Lewi, imelakomo mentondao,

⁴ butu olomiu ka burua atuu bara'ura ruansowu hiku olono, sime'umpedaakono pengkonaano ka imento'oriokoa sala anu lano komiu mentondao, nde sala atuu napi hori imelaloo.”

⁵ Motaeomo i Yosua ia tongku atuu, ”Pokomemporio koroimiu, nde tisomo Ondae i Ue Ira moweweu anu kinohali-haliako i olomiu.”

⁶ Ka ia luwudo sando mpesomba ipotae i Yosua kanandio, ”Imentandeomo burua pedandia impesakiakomo i arodo tongku atuu.” Domentandeomo burua pedandia ka dompelempa i arodo tongku atuu.

⁷ Pau-Do i Ue ndi Yosua, ”Mompu'u ia oleo andio Kupokolangkaio neemu ia matado luwudo to Isaraeli, ka domento'orio motae i ndi'ipua Kukongkomio i Musa, kanandiokoa mbo'u kukongkomiko.

⁸ Gagi tena iramo luwudo sando mpesomba anu mpowawa burua pedandia atuu, kanandio: Mansamiu mehawe i wiwino uwoi koro Yarade, asalakono ka ikongko mpentade i ra'ai.”

⁹ Motaeomo i Yosua ia nto Isaraeli, ”Ime'aiwamo te'umpeda ka imerongeo pau-Do i Ue, Alamiu.”

¹⁰ Motae mbo'u i Yosua, ”I ndi'aimo komiumo mento'orio, motae Ue Ala anu tuwu, ndio i olomiu, ka Ira sumaari ira to Kana'a, to Heti, to Hewi, to Perisi, to Gerigasi, to Amori ka to Yebusi inso i aromiu.

¹¹ Menteeano, burua pedandia, Ueno wawontolino melempa mesakiako i aromiu mewinso ia koro Yarade.

¹² Gagi kanandio-andio, impobinikimo te hopulu ka orua mia inso ia sompo tongku to Isaraeli, nte'o'asa mia asa tongku.

¹³ Mansano karudo sando mpesomba pontande burua-Do i Ue, Ueno wawontolino, mpenaa-naa ia larono uwoi koro Yarade, onaemo uwoi koro Yarade atuu ta te'onto; uwoi anu waa inso iwawono ta menaa-naa waa gagi bunto.”

¹⁴ Mansado tongku atuu mpelungka inso ia mpekemaado ka ira mensakio koro Yarade, luwudo sando mpesomba pontande burua pedandia pelempa i arodo tongku atuu.

¹⁵ Mansado mia mpontande burua atuu hawe a Koro Yarade, ka luwudo sando mpesomba pontande burua atuu mpelanda a uwoi iwiwi koro atuu, Koro Yarade atuu teponsia mesawiako a wiwino itempono konsowia.

¹⁶ Menaa-naaomo uwoi atuu waa. Uwoi metii inso iwawono te'ili gagi bunto olai ntu'u, umpeda i Adama, kota anu asambalino Saritani, sine uwoi anu waa lako i Tahi Araba atuu, anu nineeako Tahi Me'ohia te'otuhi. Mpesakiako iramo tongku atuu i asambalino kota Yeriko.

¹⁷ Sine sando mpesomba mpontande burua pedandia-Do i Ue atuu kongkodo mpetade ia wita motu'i, i tongano koro Yarade, ka luwudo to Isaraeli mpesakiako ira ia wita motu'i, ranta luwudo tongku atuu pokompesakiako ira ia koro Yarade.