Yosua 24 - Wunta Mempori

Pedandia i Sikemi pinokowo'ohu

¹ Ka i'amba pumpu ira i Yosua luwudo tongku to Isaraeli i Sikemi. Ipoboi ira mia memota'u to Isaraeli, luwuno petewawado, puu mpobitara, ka tadulako. Ka dompentade i aro-Do Ue Ue Ala.

² Mepauomo i Yosua ia luwudo tongku atuu, ”Kanandiomo pau-Do i Ue, Ue Ala Isaraeli: I ndi'ipua i asatowano koro Eparata, i tu'aimo dopo'ia ue mpu'umiu, ondaemo i Tera amano i Burahima ka amano i Nahoro, mpesomba ira a anu pinesombaido susua.

³ Sine Kubinikio i Burahima, amamiu atuu, inso i asatowano koro Eparata, ka Kutenao lumaloio luwuno wita Kana'a. Aku mokohadioo inuleno. Kuweeakono i Saki.

⁴ Ndi Saki Kuweeakono i Yako ka i Esau. Ndi Esau Kuweeakono mentorukuno Seiri gagi tiano, i Yako ka luwuno anano lumako i wita Masiri.

⁵ Kutenao i Musa ka i Haruni ka mowee ira haki to Masiri, kana anu Kuweweuomo ndi ondae, ka Ku'amba wawa komiu mpeluarako.

⁶ Tempono ka Kuwawa ira ue mpu'u miu mpeluarako inso i wita Masiri ka imehawe i tahi, to Masiri lumuluako ira kareta saru sorodadu mpengara hawe ia Tahi Teberau.

⁷ Mpebooli ira ndi Ondae i Ue, onaemo ka Dopokowongi-wongio olo miu ka to Masiri, ka Dopokonte'ilio tahi, ka domemate mo'opo. Imengkitaakonomo matamiu, hapa wineweu-Ku ia nto Masiri. Umari atuu mapata'u-ta'u tehineno impo'ia i pada one.

⁸ Kuwawa komiu a witado to Amori anu mpo'ia i asatowano koro Yarade. Itempono dompe'iwaliakomiu, Kupeweengako ira ia ngkaemiu, onaemo kai mpentorokio witado, ka ondae kuropu ira i aromiu.

⁹ Itempono atuu i Bala anano i Sipora, mokole to Moabi mpe'iwaliako ira to Isaraeli. Itena ira mia moboio i Bilea anano i Beori ka itotonaa komiu.

¹⁰ Sine nahi perorongeakono i Bilea, onae ka i ronso komiu. Kanantuumo Kupotola komiu inso ia ngkaeno.

¹¹ Mansamiu mpesakiako ia koro Yarade ka hawe i Yeriko, mpe'iwali komiumo ka to Yeriko, to Amori, to Perisi, to Kana'a, to Heti, to Girigasi, to Hewi, to Yebusi, sine ondae atuu Kupeweengako ira ia ngkaemiu.

¹² Kupotolaomo hoani anu mosia mese'elungi komiu ka hoani atuu lumulu ira inso i aromiu, saru orua ira mokoledo to Amori atuu. Gaagi komba hangano ponai, ka mata mpanamiu.

¹³ Kanandiomo kuwee komiumo wita anu nahi mpe'o'osuakono, luwuno kota anu komba winangumiu, sine omiu anu mpo'iangario, saru lere anggoro ka lere saitu anu komba pinahomiu, sine wuano omiu mengkaano.

¹⁴ Gaagi kanandio, imedoitoako Iramo i Ue, ka impesombamo ndi Ondae ia memoleo ka petenunu. Ime'olaiakono luwuno pinesombaido ue mpu'umiu i asatowano koro Eparata ka Masiri, ka impesomba ndi Ondae i Ue.

¹⁵ Sine ba impewowoloo, nahi impemoikoo mesomba ndi Ondae i Ue, impobinikimo oleo andio ke ndi sema komiu mpesomba; luwuno anu pinesombaido ue mpu'umiu i asatowano koro Yarade, ke anu pinesombaido to Amori, anu witano impo'iangario. Sine ongkue ka luwuno pe'asa rahaku kami mpesomba ndi Ondae i Ue!”

¹⁶ Onaemo ka domesangki tongku atuu, ”Olai inso ndi omami binta Ira i Ue ka mpesomba a anu pinesombai susua.

¹⁷ Nde Ondae i Ue, Ue Alato, Ondaemo anu wawa kita ka uempu'uto mpeluarako inso i wita Masiri, wita tepe'ataa ka moweweu anu tedoa kinohali-haliako andio i'aroto. Ondaemo anu kumongkomi kita ia pelempaato ka ia luwuno tongku anu linaloto.

¹⁸ Ondae i Ue sumaari ira inso ndi ontae luwuno tongku saru to Amori, mia anu mpo'ia i ndi'ai. Omami koa mbo'u, kami mpesomba ndi Ondae i Ue, nde Ondaemo Ue Alato.”

¹⁹ Sine i Yosua mepau ia tongku atuu, ”Nahi komiu mempolio mpesomba ndi Ondae i Ue, nde Ondaemo Ue Ala anu mempori, Ondaemo Ue Ala anu meposiri. Nahi Ira umoninio pe'ewa ka halamiu.

²⁰ Tewala imebinta Ira i Ue, ka mpesomba a anu pinesombaido mia hawe, Ira mebungkui komiu, ka Ira moweakomiu urasa'o, ba mokoropu komiu umari-Do moweweu anu moiko ndi omiu.”

²¹ Sine tongku atuu mpotae ira ndi Yosua, ”Naahi! Butu ndi Ondae i Ue kami mpesomba.”

²² Motaeomo i Yosua, ”Omiumo sakosii ndi omiu-miu, motae ibiniki Iramo i Ue mpesomba ndi Ondae.” Mesangki ira: ”Omamimo sakosiino!”

²³ Ipotae, ”Impetadiakonomo anu pinesombaido mia hawe anu kongko i olomiu, impo'aroomo aroa miu ndi Ondae i Ue, Ue Ala Isaraeli.”

²⁴ Mesangki ira tongku atuu ndi Yosua, ”Ndi Ondae i Ue, Ue Alato, kami mpesomba, ka pau-Do kami merongeo.”

²⁵ I'oleo koa atuu, i Yosua moweweu pedandia saru tongku atuu ka moweweu tepo'asaa pau ka atora, ndi ondae i Sikemi

²⁶ Luwuakoano atuu iburio i Yosua ia wunta songka-Do Ue Ala. Ka i'amba mo'ala asa watu anu langkai ka ipontadeo i totono keu tarabanti, a po'iangaa mempori-Do i Ue.

²⁷ Motae i Yosua ia luwuno tongku atuu, ”Menteeano ntu'u watu andio ta gagi sakosii ndi ontae, nde watu andio rumongeo luwu pau-Do i Ue anu pinau-Do ndi ontae. Gagi watu andio gagi sakosii ndi omiu, kasi mpehapu ia Ue Alamiu.”

²⁸ Umari atuu ipotola ira i Yosua tongku atuu melako, ia mpo'iangaado tia pusakado.

Matedo i Yosua ka Eliasa

²⁹ Umarino luwuakoano inanggano i Yosua anano i Nunu, mia anu tinena-Do i Ue atuu, mate iramo itempono tinuwuno asa etu ka hopulu nta'u.

³⁰ I Yosua kinaburu ia wita pusakado, i Timinati-Sera a mentorukuno i Eparai, i utara torukuno Gadi.

³¹ To Isaraeli mpesomba ndi Ondae i Ue i tempono i Yosua da tuuwu ka itempono luwuno mia memota'u anu tinuwudo melaiopo sekono tinuwuno i Yosua, ka ipembasaio anu wineweu-Do i Ue ia nto Isaraeli.

³² Luwuno wukuno i Yusupu, anu winawado to Isaraeli inso i wita Masiri domengkaburuo i Sikemi, ia wita anu inolino i Yako asa etu kesita inso ndi anano i Hemoro, amado i Sikemi, ka anu pinakosiako tiado inuleno i Yusupu gagi tia pusakado.

³³ I Eleasa anano i Haruni mate, ka kinaburu ia pongkuno wita anu wineeako ndi Pineha, anano atuu, a mentorukuno i Eparai.