Yosua 23 - Wunta Mempori

Pau petompano i Yosua ia luwuno petewawa tongku atuu

¹ Tehine umari-Do i Ue moweeako ira rodoa a nto Isaraeli ia sompo siuno wita inso ia luwuno iwalido, ka itempono tinuwuno i Yosua mota'uomo,

² ipoboi ira luwudo to Isaraeli, mia memota'u, luwuno petewawa, puu mpobitara, tadulako, ka ipotae ndi ondae: ”Mota'u akumo, melaiomo tumuwuku.

³ Imengkitaomo luwuno anu wineweu-Do i Ue, Ue Alamiu, ia luwuno tongku i ndi'ai hangano omiu, nde Ondae i Ue, Alamu, Ondae anu me'iwaliakomiu.

⁴ Impewowoloo, kutiaakomiumo mesala ia undi, luwuno tongku anu da tebinta atuu gagi pusakamiu montonda luwuno tongkumiu, kanakoa mbo'u luwuno tongku anu kuropu iramo atuu, mompu'u a koro Yarade hawe i Tahi Molue te'alaako i sumooano oleo.

⁵ Ka Ondae i Ue, Ue Alamiu, Ondaemo anu sumaari ira ka moko'olai ira inso i aromiu, ranta ka impo'iangario witado, kana anu Dodandiakomiu i Ue, Ue Alamiu.

⁶ Impokomorosoo ntu'u aroa miu mpekariao ka meweweuo luwuno anu teburi ia wuntano i Musa. Sii mepansia i koana ke i manggali.

⁷ Sii mpe'asaako ira luwuno tongku anu da tepo'ia i olomiu atuu. Sii me'akuio neeno anu pinesombai susua ke ba mesumpa ia nee atuu. Sii mpesombaio lahumoa atuu.

⁸ Tendeano impe'ini temoroso ndi Ondae i Ue, Ue Alamiu, kana anu wineweumiu hawe kanandio.

⁹ Dosaari iramo i Ue inso i aromiu luwuno tongku anu langkai ka moroso atuu. Ka omiu nahina mau te'asa mia anu moko'aropi komiu ranta oleo andio.

¹⁰ Asa mia koa inso ndi omiu, anu mokolumulu ira asa nsowu mia, nde Ondae i Ue Ue Alamiu anu me'iwali mokowali komiu, kana anu Dodandiakomiu.

¹¹ Kongkomo impetenunu mehohawa Ira Ondae i Ue, Ue Alamiu!

¹² Nde tewala mpewolili komiu ka mpe'ini moroso a toreano luwuno tongku anu da mpo'ia i olomiu, pada mpekokombia saru ondae ka mpe'asaako ira,

¹³ imento'oriomo te manasa, motae Ondae i Ue, Ue Alamiu, nami Ira sumaario mbo'u luwuno tongku atuu inso i aromiu. Tendeano ira megagi dampa ka oho ndi omiu, gagi ponsepi ia koroimiu, ka rui ia matamiu, ranta ka imeropu inso ia wita anu moiko andio, anu Doweeakomiumo Ondae i Ue Ue Alamiu, ndi omiu.

¹⁴ Nami tehine mbo'u aku lumempaio sala anu luwuakoano ta tampula. Onaemo ka intepidimo ia tompaano aroamiu ka tompaano sumangamiu nde inso a luwuno dandi anu moiko anu pinau-Do i Ue, Ue Alamiu, ndi omiu nahi ta hina mau te'asa anu ta tetadi. Luwuakoano inihii. Mau te'asa nahina anu ta tetadi

¹⁵ Sine kana anu haweomo ndi omiu luwuno anu moiko, anu Dodandiakomiumo Ondae i Ue, Ue Alamiu, kanandiomo Ondae i Ue Ira moweeakomiu luwuno anu nahi moiko ranta ka Dopokoropu komiu inso ia wita anu moiko andio, anu Doweeako miumo Ondae i Ue, Ue Alamiu.

¹⁶ Tewala imelinggeio pedandia, anu Dotenaakomiumo i Ue, Ue Alamu, ka imelako mpesomba ia pinesombai susua. Tekuda-Do i Ue ta tensila ndi omiu onaemo ka imeropu inso ia wita anu mioko anu Doweakomiumo ndi omiu.”