Yosua 22 - Wunta Mempori

Pekuledo tongku anu i asatowano Yarade

¹ Ipoboi ira i Yosua to Rube, to Gadi, ka tongku Manase anu asantia atuu,

² ka ipotaeako ira, ”Omiu impekariaomo luwuno anu dotenaakomiu i Musa, tetenaa-Do i Ue atuu. Ka imperorongeakonomo luwuno anu kutenaako miu.

³ Nahi binta ira pepaekompomiu ranta kanandio-andio, sine mpetenunu komiu mentondao petena-Do i Ue, Ue Alamiu, ndi omiu.

⁴ Sine kanandio-andio Ondae i Ue, Ue Alamu, Dopoweeako iramo rodoa ndi ondae pe'etumu, kana anu Dodandiako ira i Ue ndi ondae. Onaemo ka impekulemo ia kema miu, i wita miu, anu Doweeakomiumo i Musa, tetenaa-Do i asa towano Yarade.

⁵ Butu onae impetenunu meweweuo, hapa anu imentinenaako, songka inso ndi Musa tetenaa-Do i Ue, Ue Alamu, tuwu kana sala anu tiniso-Do, imekongko tumondao po'ehe-Do, me'ini temoroso ka mesombai Ira tompaano aroamiu ka tompaano sumangamiu.”

⁶ I Yosua rumonso ira ka itena ira melako, mpekule ia ngkemado.

⁷ A tongku Manase anu asantia iweeako iramo i Musa tiado i Basani; a tongku anu asantia mbo'u, iweeako iramo i Yosua tiado i olodo pe'etudo te'alaako ia sumooano oleo Koro Yarade. Ka itena iramo mbo'u ka domelako ia kemado umarino rumonso ira,

⁸ ka ipotaeako ira, kanandio, ”Impekulemo ia kema miu, saru arataa miu anu hadio, ka pinotuwu anu tedoa hadio, salaka, wulaa, mala, labu, saru sangka anu hadio ntu'u. Tiaako iramo mpe'etumu, anu pinomuru inso ia iwali miu atuu.”

Tongku i asatowano Yarade mpowangu pontunua pesombaa

⁹ Mpekule iramo inuleno i Rube, inuleno i Gadi ka tongku Manase anu asantia atuu ka domebinta ira to Isaraeli, mpeluarako inso i Silo i wita Kana'a ka lumako i wita Gilea witado anu ira mpo'iangario montonda petena-Do i Ue ndi Musa.

¹⁰ Mansado mehawe i Gelilo ia ngkorono Yarade, i wita Kana'a, onaemo ka inuleno i Rube, inuleno i Gadi ka asantia tongku Manase, mpowangu ira pontunua pesomba i ra'ai, i wiwino Koro Yarade, pontunua pesomba anu langkai.

¹¹ Domerongeomo to Isaraeli paudo mia: ”Mpowangu iramo pontunua pesomba inuleno i Rube, inuleno i Gadi ka asantia to Manase, pontunua pesomba me'aro i Kana'a i Gelilo iwiwino koro Yarade, i asambalino witado to Isaraeli.”

¹² Mansano domerongeo to Isaraeli, tepumpu iramo luwu i Silo, ira mpe'iwaliako ira.

¹³ Mpontena iramo mia to Isaraeli lako ia inuleno i Rube, ia inuleno i Gadi, ka tongku Manase anu asantiano ia wita Gilea, sando mpesomba Pineha anano i Eleasa,

¹⁴ ka hopulu ira petewawa anu merongaakono, onaemo asa petewawa sombori anu sumarungkaru ira sompo tongku ia nto Isaraeli. Nte'o'asa mia inso ia petewawa sombori i olodo to Isaraeli.

¹⁵ Mansado mehawe ia inuleno i Rube, inuleno i Gadi, tongku Manase anu asantia atuu, mpotae iramo ia mia tuudo, kanandio,

¹⁶ ”Kanandiomo potaedo luwuno bawaa-Do i Ue, tembio kai mpoweweu anu nahi menunu i aro-Do Ue Alado to Isaraeli, ka kanandio impebungkui ira i Ue, ka impowangu pontunua pesomba omiu-miu, nde ba kanandio i'ewai ira Ondae i Ue oleo andio?

¹⁷ Nde napi sompo ke ndi ontae hala anu i Peori atuu, anu napi topokomorinao koroito hawe oleo andio, anu weweu ira bawaa-Do i Ue mpohawe haki,

¹⁸ ranta ka iwali mpebungkui Ira i Ue? Tewala oleo andio i'ewai Ira i Ue, tisomo ira tekuda a luwuno to Isaraeli.

¹⁹ Sine ba mansa wita miu atuu mokoburu, aiwa tompe'asatowaako ia wita-Do i Ue, po'iangaano Kema Mempori-Do i Ue, ka impo'iamo ndi omami. Sine sii me'ewai ira Ondae i Ue ka sii me'ewai kami, mpowangu pontunua pesombaa miu anu susua sangkadio pontunua pesomba ndi Ondae i Ue, Ue Alato.

²⁰ Itempono i Akani anano i Sera nami petenunu, mo'ala parewa anu pinakosi, nde nahi luwuno to Isaraeli tokoa anu kona ntekudaako? Komba butu onae anu mate hangano halano.”

²¹ Mesangki ira inuleno i Rube, inuleno i Gadi ka asantia tongku Manase, dompotae ia luwu petewawado to Isaraeli,

²² ”Ondae i Ue, Ue Ala i wawono luwuakoano anu pinesombai! Ondae i Ue, Ue Ala i wawono luwuakoano anu penesombai! Ondaemo anu tumo'orio, ka pototonomo to Isaraeli ka domento'orio koa. Ba mansa ndio ta gagi, ka tinoo mami umewai ira, ka nami kimpetenunu ndi Ondae i Ue, po'ineeomo Ondae i Ue nahi Dotolosi kami oleo andio.

²³ Ba mansa mpowangu kami pontunua pesomba, ka kimpewolili inso ndi Ondae i Ue, ka mpompesombaako pesomba anu tinunu, ka pesomba kaanga iwawono, ka pesomba tetolosia iwawono, po'ineomo Ondae i Ue anu mombalo ndi omami.

²⁴ Sine menteeano ntu'u, kimeweweuo hangano salalaro mami. Nde pinewowolo mami: Ia lembuiano inule miu bara'ura ira mpotae ia inule mami, kanandio, hapa penggoea miu ka Ondae i Ue, Ue Alado to Isaraeli?

²⁵ Nde komba Ondae i Ue Dopakosiomo koro Yarade gagi tida, omami ka omiu, o inuleno i Rube, inuleno i Gadi! Omiu nahi mpohawe tia ndi Ondae i Ue. Kanandio, bara'ura inule miu doweweu ira inule mami nami ira medoito ndi Ondae i Ue.

²⁶ Onaemo ka kimpotae: Aiwamo ka to mpowangu pontunua pesomba tiato! Nde komba tiano pesomba tinunu ka komba tiano pesomba sinumbele,

²⁷ sine pontunua pesomba atuu gagi sakosii ndi omami ka ndi omiu, ka ia inuleto lembuiano, motae omami kongko kami mpesomba i aro-Do i Ue, mpompesombaako pesomba tinunu, pesomba sinumbele, ka pesomba tetolosia mami. Gagi nahi ira mpotae inule miu ia lembuiano ira mpotae ia inule mami: Omiu nahi mpohawe tia ndi Ondae i Ue.

²⁸ Ka i'amba kimpewowoloo: Tewala ia lembuaiano kanandio domempauo ndi ontae ka ia inuleto, asalakono kita mpotae: Kitao pontunua pesomba anu kana pontunua pesomba ndi Ondae i Ue atuu, anu winangudo ue mpu'u mami. Komba ta pontunua pesomba tinunu ba pesomba sinumbele, sine pontunua pesomba atuu gagi sakosii ndi omami ka omiu.

²⁹ Olai inso ndi omami, ba kami umewai Ira i Ue, ke ba mpebungkui Ira oleo andio, ka mpowangu pontunua pesomba tinunu, pesomba kaanga ba pesomba sinumbele, pontunua pesomba anu komba pontunua pesomba ndi Ondae i Ue, Ue Alato, anu i arono Kema anu Mempori-Do!”

³⁰ Mansado merongeo sando mpesomba i Pineha ka luwuno petewawa bawaa saru luwudo petewawado to Isaraeli anu mperongaakono, hapa anu pinaudo inuleno i Rube, inuleno i Gadi ka inuleno i Manase atuu, dompemoikoo.

³¹ Ka i'amba motaeomo sando mpesomba Pineha anano i Eleasa ia inuleno i Rube, inuleno i Gadi, ka inuleno i Manase, ”Kanandio kimento'oriomo motae Ondae i Ue ndio Ira i oloto, nde nahi bali petenunumiu ndi Ondae i Ue. Tewala kanandio impotola iramo to Isaraeli inso ia pohuku-Do i Ue.”

³² Umari atuu mpekule iramo sando mpesomba Pineha anano i Eleasa ka saru luwudo petewawa atuu, binta ira inuleno i Rube, inuleno i Gadi i wita Gileadi, mpekule i Kana'a a nto Isaraeli, ka ipauako ira lele atuu ndi ondae.

³³ Lele atuu dompemoikoo to Isaraeli, onaemo ka dome'unde-unde Ira Ue Ala ka nami dompontoo mbo'u mpe'iwaloako ira ka rumopuo wita po'iangaado inuleno i Rube, inuleno i Gadi atuu.

³⁴ Inuleno i Rube ka inuleno i Gadi numeeakono pontunua pesomba atuu: Sakosii, nde onaemo gagi sakosii i oloto nine Ondae i Ue, Ondaemo Ue Ala.