Yosua 20 - Wunta Mempori

Luwuno kota tekaduduia

¹ Mepau Iramo i Ue ndi Yosua,

² ”Pauako ira to Isaraeli, kanandio: Impontiso kota tekaduduia, anu Kupauakomiu telalo ndi Musa,

³ nde ba isema mompepate mia nahi ipe'inungakono, ka lano nahina tinoono ta mompepate, mokompolai i raane, ranta luwuno kota atuu anu gagiomo po'ianga tekaduduiano inso a potuntu pontolosi rea.

⁴ Ba ipolai a nte'asamokoa kota atuu, asalakono ka ipentade i arono pewowa kota ka ipauo teweweuno a mia memota'u i kota. Asalakono ka dome'eheakono ipo'ia i kota atuu, ka dompoweakono po'iangaano, ranta ka ipo'ia ndi ondae.

⁵ Ba mansa anu mpotuntu tolosino rea atuu lumuluo mia anu mompepate atuu, nahi ta pineweengako ndi ondae, nde onae mompepate pe'asa miano nahina tinoono se'elu, ka se'eluno nahi o'aliaakono.

⁶ Asalakono ka ipo'ia mpiha i kota atuu ranta ka iwinawa a nterisoa bawaa ka i binitara, ranta sando mpesomba langkai tempo atuu mate. Ka i'amba mia anu mompepate atuu moikoomo ipekule i kotano i rahano, ia kota te'insoano molai.”

⁷ Onaemo ka to Isaraeli mpopakosi kota anu gagi kota tekaduduia: Kedesi i Galilea, a mentorukuno Napatali ka i Sikemi, a mentorukuno Eparai, ka i Kiriati-Araba, onaemo Heberoni, i torukuno Yehuda.

⁸ Ka i asatowano koro Yarade, i sabaano oleo Yeriko domempakosio Beseri, i pada one, i korimbino torukuno, inso a tongku Rube, ka Ramoti i Gileadi inso a tongku Gadi, ka Golani i Basani, inso a tongku Manase.

⁹ Onaemo luwuno kota anu pinakosi tiado luwuno to Isaraeli, ka tiado luwuno mia mehawe anu mpo'ia i olodo, ka sompo mia anu mompepate nahi pe'inungakono, molai ngkoraane, kasi dompepateo pontutu tolosi rea, ba napi winawa ia nterisoa bawaa.