Yosua 2 - Wunta Mempori

Mia mpopadaso i Yeriko

¹ Menongkoakoomo i Yosua anano i Nunu montena inso i Sitimi orua mia pompadaso, ipotae, ”Ilakomo poporoo inia atuu, ka kota Yeriko.” Lumako iramo mia atuu, ka hawe i rahano aasa beine belesu anu meneeako i Rahabu, ka doperato i tu'ai.

² Ka i'amba pinauako ira mokole Yeriko, motae, ”Hieno wongi, hinao mia to Isaraeli anu hawe padasoo inia andio.”

³ Montenaomo mokole Yeriko lumako pauakono i Rahabu, ”Wawa iramo meluarako mia anu hawe ndi omue atuu, anu mewinso i rahamu nde hawe ira padasoo luwuno inia andio.”

⁴ Sine beine atuu se'eluno iwawa iramo orua mia atuu ka iwuni ira. Ka ipotae, ”Lano mia atuudo hawe ira ndi ongkue, sine nahi kuto'orio insoado,

⁵ i tempono pewowa inia tamo tinondo rangku wongi, meluarako iramo mia atuu; nahi kuto'orio, ba isua dolako. Laluopo impodadu lumulu ira, asalakono da komiu humawe ira.”

⁶ Sine beine atuu se'eluno itena ira mewuatako idunsi ka iwuni ira itotono howuno seami anu lano hinaomo i tu'ai.

⁷ Melako iramo mia atuu, mpepolulu tumutuio koro Yarade, hawe ia mpesakiakoa, ka pewowano inia tinondo, mansado mia mpepolulu mpeluarako.

⁸ Sine ka napi dopoturi mia atuu, mewuatakoomo beine atuu tepohaweako ira

⁹ ka motaeako ira, ”Kuto'orio, nine Ondae i Ue Dopeweengakonomo inia andio ndi omiu ka medoito kamimo saru luwuno palili inia andio.

¹⁰ Nde kimerongeo, nine Ondae i Ue moko'areo Tahi Teberau i aromiu, tempono impelempa mpeluarako inso i wita Masiri, ka hapa anu wineweumiu ia orua ira Mokoledo to Amori i asatowano koro Yarade, ndi Sihoni ka ndi Ogo, anu pinepatemiumo.

¹¹ I tempono kimerongeo lele atuu molusaomo aroamami ka namihina sumangano sompo mia umewai komiu, nde Ondae Ue, Ue Alamiu, Ue Ala anu iwawono langi, ka i totono langi.

¹² Kanandio, ipesumpamo, ia nee-Do i Ue, nde melelu akumo mauru ndi omiu, ka komiu mpelelu moiko ia pepaekompoku; ka ipowee aku petondoni anu gagi pe'iniaku,

¹³ nine komiukoa mo'inee ira ka dotuwu amaku ka ineku, pepaekompoku anu tama ka beine ka luwuno miado, ka komiukoa tumolosio penaa mami inso a matea.”

¹⁴ Sumangki ira mia atuu ndi onae, ”Penaamami gagi pe'inia ndi omiu, polomokoa kasi popauo hapa ki'aiwaako andio; nde ba Dopewengakonomo i Ue inia andio ndi omami, kamimo mopokitaakomu pontarimakasi ka petenunumami ndi omue.”

¹⁵ Ka i'amba beine atuu motii ira mepowuluako ula mesala ia pentangoa, nde rahano mentade ia rerewatu kota, i tu'aimo ipo'ia.

¹⁶ Ipotaeako ira ndi ondae, ”Lakomo a mentorukuno, kasi ntepotowoako ira mia lumulu komiu, ka ipewuni te'otolu oleo tehineno, ranta ka dompekule anu mpepolulu; ka i'amba motilalo.”

¹⁷ Dopotae mia orua ira atuu ndi onae, ”Kamimo tepotola inso ia sumpamami ndi omue, anu inemamu gagi pedandimami

¹⁸ menteeano ba kimpewinsokio inia andio, asalakono ula kirimisi andio upetanggoakono ia pentangoa itempono upotii kami, ka amamu saru inemu, pepaekompomu, saru luwuno pe'etumu, ka upumpu ira i rahamu.

¹⁹ Ba isema anu meluarako inso ia pewowano rahamu onaeno ta sumusuruo ba te'uwu reano, komba hangano omami; sine isemamokoa anu ilaro rahamu pinokomasola, omamimo anu sumusuruo te'uwuno reano.

²⁰ Sine tewala upopauo mongkona hawemami andio tepotola kamimo inso ia sumpa mami atuu, anu utenaa kami pauo ndi omue.”

²¹ Motaeomo beine atuu, ”Kanamo anu pinaumiu, kanatuumo anu ta gagi.” Umari atuu ipo'inee iramo ka dolako. Ka i'amba beine atuu metanggoakono ula kirimisi ia pentangoa.

²² Lumako iramo ranta ka dohawe ia mentorukuno. Mo'ia iramo i tu'ai otolu oleo tehineno, ranta ka dompekule mia anu lumulu ira. Mia mpepolulu atuu pepo'ungke iramo isuamokoa, asa ngkeu sala, sine nahi dohawe ira.

²³ Mepokule iramo mia orua ira atuu, montindulu inso ia mentorukuno, ka do'amba me'asatowaako hawe ndi Yosua anano i Nunu, ka do'amba tumutuluo luwuno pinembasaido.

²⁴ Dompotae ndi Yosua, ”Ondae i Ue dopewengakonomo luwuno inia ndi'ai a ngkaeto, ka luwuno palili i inia atuu medoito ira umaropi kita.”