Yosua 18 - Wunta Mempori

Petiaa wita Kana'a tiado opitu tongku

¹ Mentepumpu iramo luwudo to Isaraeli i Silo, ka dompoweweu kema tepumpua i ra'ai, nde wita atuu mpetuundu iramo ndi ondae.

² I tempo atuu da opitu tongku i olodo to Isaraeli, napi dompohawe tia pusaka.

³ Onaemo ka ipotae i Yosua a nto Isaraeli, ”Ba da ta tehine mbo'u impeluweki, ka nahi melako mpo'ia ia inia anu Doweeako miu i Ue, Ue Alado uempu'u miu?

⁴ Impobiniki otolu mia te'inso ndi omiu sompo-sompo tongku. Aku tumena ira, ka dompepatinda mpelempa memparesao wita atuu, imeburio ta'ano wita, mengkitao pusakado sompo mia, umari atuu ka dompepokule ndi ongkue.

⁵ Umari atuu ka dompetiao gagi opitu ntia. Tongku Yehuda ira mpo'ia mpiha ia witado i selata ka inuleno i Yusupu ira mpo'ia mpiha i wita utara.

⁶ Imeburio ta'ano wita atuu a opitu ntia ka imewawao ndi ongkue; ka ku'amba umundiakomiu ndi'ai i aro-Do i Ue, Ue Alato.

⁷ Nde to Lewi nahi dompohawe tia i olomiu, nde potoro gagi sando mpesomba-Do i Ue onae gagi pusakado, ka tongku Gadi, tongku Rube ka tongku Manase anu asantia atuu mpohawe iramo pusakado i sabaano oleo Koro Yarade, anu doweeako ira i Musa, tetenaa-Do i Ue.”

⁸ Ka do'amba mpompakale mia atuudo ka domelako. Itena ira i Yosua melako ka domeburio ta'ano wita atuu, ipotae, ”Imelakomo mpelempa memparesao wita atuu imeburio ta'ano, ka i'amba mpekule ndi Ongkue; ka i ndi'ai i Silo aku umundiakomiu i aro-Do i Ue.”

⁹ Mia atuudo melako ka mpelempa telalo ia witado. Domeburio ta'ano a wunta, sompo-sompo kota, a opitu ntia ka dompekule ndi Yosua ia kemado i Silo.

¹⁰ I Yosua umundiako ira i Silo, i aro-Do i Ue, ka i ra'aimo dotiaako ira i Yosua wita atuu a nto Isaraeli, menunu ka petiaado.

Pusakado tongku Benami

¹¹ Meluarakoomo undia tongku inuleno i Benami montonda pepe'etuado, ka wita anu dome'inundiako mo'ia i olono witado inuleno i Yehuda ka wita inuleno i Yusupu.

¹² Tida i utara, mompu'u inso i Koro Yarade, ka i'amba tida atuu mewuatako i korimbino torukuno i utara Yeriko, morake i sumooano oleo lako ia mentorukuno, ka te'aro i pada one Beti-Awe.

¹³ Inso i ra'ai tida atuu motilalo i Lusi, i selata, te'aro i korimbino torukuno umpeda i Lusi, onaemo Beteli; ka i'amba tida atuu montindulu ke Ataro-Adari a mentorukuno anu i selata itotono Beti-Horoni.

¹⁴ Ka i'amba tida atuu melengkuako, pansia inso a mentorukuno anu i asambalino Beti-Horoni selata tetutu barata daya ka poko'ariano i Kiriati-Baali, onaemo Kiriati-Yearimi, asa kota inuleno Yehuda. Onaemo atuu sumoano oleo.

¹⁵ I Selata mompu'u inso ia untuno Kiriati-Yearimi, ka i'amba tida atuu lumako a sumooano oleo, ka te'aro mbo'u a mata uwoi Me-Nepatoa.

¹⁶ Ka i'amba tida atuu montindulu i untuno mentorukuno anu i asambalino limbo Beni-Hinomi, i utarano lembono to Repai; ka i'amba montindulu te'aro a limbo Hinomi, tumondao korimbino Yebusi, iselata, ka i'amba montindulu lumako i Eni-Roge.

¹⁷ Ka i'amba melengkuako i utara, te'aro i Eni-Semesi ka te'aro mbo'u i Gelilo i asambalino porakea Adumi, montindulu a watu Bohani anano i Rube,

¹⁸ motilalo lumako i korimbino torukuno i asambalino Beti-Araba i utara, ka montindulu i Araba-Yarade.

¹⁹ Ka i'amba tida atuu motilalo te'aro a korimbino torukuno umpeda i Beti-Hogola i utara ka tida atuu pokotompaano i kolono utara Tahi Mate, lako i ngangano koro Yarade i selata. Onaemo tuu tida i selata.

²⁰ Koro Yarade onaemo tidano i sabaano oleo. Onaemo atuu pusaka inuleno i Benami ka tidano a somposiuno montonda pepe'etuado.

²¹ Luwuno kota tongku inuleno i Benami montonda pepe'etuado onaemo Yeriko, Beti-Hogola, Eme-Kesi,

²² Beti-Araba, Semaraimi, Beteli,

²³ Haawi, Para, Opara,

²⁴ Kepa-Haamonai, Opini, ka Geba; hopulu ka orua kota saru luwuno iniano.

²⁵ Gibeo, Rama, Beero,

²⁶ Misipa, Kepira, Mosa,

²⁷ Reke, Yiripeeli, Tarala,

²⁸ Sela, Elepa, ka Yebusi, onaemo Yerusale, Gibea ka Kiriati-Yeari; hopulu ka opaa kota saru luwuno inia. Onaemo pusakado inuleno i Benami montonda pepe'etuado.