Yosua 17 - Wunta Mempori

¹ Undia anu pinakosi tiado tongku Manase, nde onaemo anano i Yusupu anu aka, kanandio: Ndi Makiri, ana akano ndi Manase amano i Gileadi, iweakonomo i Gileadi ka i Basani, hangano onae sorodadu.

² Gaagi tia atuumo anu pinakosi gagi tiado anano i Manase anu susua, montonda pepe'etuado, onaemo tiano inuleno i Abieseri, inuleno i Heleki, inuleno i Asirie, inuleno i Sekemi, inuleno i Heperi ka inuleno i Semida; Onaemo inuleno anu tama ndi Manase anano i Yusupu, montonda pepe'etuado.

³ Sine i Selapeha anano i Haperi anano i Gileadi anano i Makiri anano i Manase nahi pe'ana ntama, butu me'ana beine. Ndiomo neeno anano atuu: i Mahala, i Noa, i Hogola, i Milika, ka i Tirisa.

⁴ Me'aiwa ira mpe'aro a sando mpesomba Eliese, ka mpe'aro ndi Yosua anano i Nunu, saru luwudo petewawa, ka dompotae, ”Ondae i Ue tumenao i Musa ka ipoweeakami pusaka i olodo pepaekompomami.” Onaemo ka ipoweeako ira tia pusaka i olodo pepaekompono amado, menunu pau-Do i Ue.

⁵ Kanandiomo hopulu ntia wita gagi tiado tongku Manase sangkadio wita Gileadi ka Basani anu i asatowa koro Yarade,

⁶ nde luwuno ana i Manase anu beine mpohawe iramo pusaka i olodo ana ntama, sine witano i Gileadi pinakosiako ana ntamano i Manase anu mehano.

⁷ Gaagi tida witano i Manase onaemo te'inso i Asieri lumako i Mikimeta i sabaano oleo Sikemi; ka i'amba tida atuu motilalo i selata a witado palili Eni-Tapua.

⁸ Wita Tapua witado tongku Manase, sine kota Tapua, umpeda tida i witado to Manase, onaemo anudo inuleno i Eperai.

⁹ Ka i'amba tida atuu montindulu te'aro i koro Kana, te'aro i selatano korono atuu. Luwuno kota iraane onaemo anudo tongku Eparai maupo mo'ia i olono luwuno kota tongku Manase. Ka i'amba tida wita Manase atuu telalo inso utara korono atuu ka pokotompaano i tahi.

¹⁰ I Selata wita atuu anudo tongku Eparai, ke utara anudo tongku Manase. Tidano onaemo tahi; i utarano wita atuu tepohawe tida witado to Asieri, i sambaano oleo tepohawe ka witado to Isaka.

¹¹ Sine i wita Isaka ka Asieri hinao mbo'u witado to Manase, onaemo Beti-Seani saru luwuno kota kodeino, inia Yibilea saru luwuno kota kodeino, palilino Dori saru luwuno kota kodeino, palilino Eni-Dori saru luwuno kota kodeino, palilino Ta'anaki saru luwuno kota kodeino, ka palilino Megido saru luwuno kota kodeino, onaemo otolu pongkuno wita atuu.

¹² Sine inuleno i Manase nahi dompokompentorokio kota atuu, nde to Kana'a mpokompo'ia ira mpiha i wita atuu.

¹³ Mansado to Isaraeli memoroso iramo, to Kana'a atuu doweweu ira gagi mia nte'ata, sine nahi komba dosaari ira.

¹⁴ Mpotae iramo inuleno i Yusupu ndi Yosua, kanandio, ”Tembio ka ipowee aku butu asa undia ka butu asantia wita gagi pusakaku, ka hinaano ongkue andio tongku anu hadio doano, hangano Ondae i Ue ranta kanandio doronso aku?”

¹⁵ Dosangki ira i Yosua, ”Ba omiu tongku anu hadio doano lakomo a ntobu ka impoweweu po'iangamiu i ra'ai i iniado to Perisi ka to Repai, tewala mentorukuno Eperai impema'isoo lahi.”

¹⁶ Ka do'amba mpotae inuleno i Yusupu, ”Mentorukuno atuu nahi kimpesompoo, ka luwudo to Kana'a anu mpo'ia a wita atuu hinao kareta labu, moiko anu mpo'ia i Beti-Seani saru luwuno kota kodeino maupo anu mpo'ia i lembono Yisereeli.”

¹⁷ Motae i Yosua ia inuleno i Yusupu, ia inuleno i Eparai, ka ia inuleno i Manase, ”Omiu andio tongku anu hadio doano ka tedoakomiu memoroso; nahi butu asantia undia pinakosi tia miu.

¹⁸ Mentorukuno atuu ta pinakosi tia miu mbo'u, ka hangano wita atuu tobu, asalakono ime'anggao; komiu mpe'ueo hawe ia tompano, nde komiu mensaari ira to Kana'a atuu maupo domponaa kareta labu ka maupo domemoroso.”