Yosua 14 - Wunta Mempori

Petiaa wita Kana'a

¹ Ndiomo luwuno anu hinawedo to Isaraeli gagi pusakado i wita Kana'a, anu itiaako iramo sando mpesomba Eleasa a nto Isaraeli, ka i Yosua anano i Nunu ka luwuno petewawa pepe'etua inso a sukudo,

² dompe'undiakono pusakado, kana petena-Do i Ue ndi Musa, mongkona luwuno tongku anu osio ka entonga atuu.

³ Nde ia tongku orua ka entonga mbo'u iweeako iramo i Musa i asambalino koro Yarade, sine ia nto Lewi nahi domempinoweeako pusaka.

⁴ Nde inuleno i Yusupu orua tongku, Manase ka Eparai. Ndi ondae to Lewi nahi domempinoweeako tia ia wita atuu, sangkadio kota-kota po'iangaado ka wita pompotuwuado pinotuwu.

⁵ Kana petena-Do i Ue ndi Musa kanatuu domeweweuo to Isaraeli ka dompetia-tiaomo wita atuu.

Heberoni tiano i Kalebi

⁶ Hawe iramo inuleno i Yehuda ndi Yosua i Giliga. I tempo atuu mepauomo i Kalebi anano i Yepune, mia i Kenasi atuu ndi onae, ”Uto'orio pau anu pinau-Do i Ue ndi Musa, mia tinena-Do i Ue Ala, mongkona ongkue ka omue i Kadesi-Baranea.

⁷ Tinuwuku pato pulu nta'u, i tempono itena aku i Musa, tinena-Do i Ue inso i Kadesi-Baranea ka kupadasoo wita andio; ka kupekule mowawa lele ndi onae anu moleo.

⁸ Ka pe'etuku anu merongaakune lumako raane, gagi mompokomolusao aroado tongku atuu, ongkue kongkoku tumonda Ira i Ue, Ue Alaku ia moleono aroaku.

⁹ Tempo atuu i Musa mesumpa, ipotae: Menteeano wita pelandaamu atuu ta gagi pusakamu ka luwuno anamu ranta pokotampulaano, hangano omue kongkomu mpiha tumonda Ira i Ue, Ue Alaku, ia moleono aroa.

¹⁰ Gaagi kanandio, menteeano Ondae i Ue dopotuwu akumo, kana anu dinandi-Do. Kanandio, pato pulu ka olima nta'umo tehineno, mompu'u Dopauo i Ue ndi Musa, ka itempono atuu to Isaraeli kongkodo mpelempa i pada one. Kanandio halu pulu ka olima nta'umo tinuwuku;

¹¹ i tempo andio da moroso aku kana itempono itena aku i Musa; morosoku tempo atuu kana morosoku kanandio ba kupetea.

¹² Gaagi iwee akumo mentorukuno, anu dinandi-Do i Ue ia tempo atuu, nde omiumo isa'a anu rumongeo, motae i ra'ai hinao to Ena saru kota langkai ka mebente. Bara'ura Dokongkomi aku i Ue, ka kupokosaari ira, kana anu pinau-Do i Ue.”

¹³ Umarino atuu i Yosua rumonsoo i Kalebi anano i Yepune, ka iweeakonomo Heberoni gagi pusakano.

¹⁴ Onaemo ka Heberoni gagi pusakano i Kalebi anano i Yepune mia Kenasi atuu, ranta hawe kanandio, hangano kongkono tumonda Ira i Ue, Ue Alado to Isaraeli, ka moroso aroano.

¹⁵ Se'eluno neeno Heberoni, Kiriati-Araba; Araba pengkonaano mia anu tedoa langkai i olodo to Ena. Ka merodo iramo, nami dompe'iwali.