Yosua 13 - Wunta Mempori

Wita anu napi rinontu

¹ Mansano mota'u i Yosua ka melai tinuwuno, mepau Iramo i Ue, ndi onae, ”Mota'ukomo melaiomo tinuwumu, ka inso a wita andio da hadio anu napi pinentoroki.

² Ndiomo wita anu da tebinta: Luwuno witado to Pelisiti ka luwuno witado to Gesuri,

³ mompu'u inso Koro Sikori i asambalino sabaano oleo Masiri, hawe ia wita Ekeroni i utara, luwuno atuu tewinso witado to Kana'a; hinao olima mokole to Pelisiti, onaemo i Gasa, i Asado, i Asakeloni, i Gati ka i Ekeroni; ka mia Awi

⁴ i asambalino selata; luwuno witado to Kana'a ka Meara, anudo to Sidoni, hawe i Ape, hawe i witado to Amori.

⁵ Ka i'amba witado to Gebali, ka luwuno mentorukuno Libano i sabaano oleo, mompu'u inso i Ba'ala-Gadi i pu'uno Torukuno Heremoni hawe ia nsala anu tetutu i Hamati;

⁶ luwuno palili a mentorukuno, inso i Libano hawe i Misirepo-Maimi; luwudo to Sidoni. Ongkueku ta sumaari ira inso i arodo to Isaraeli. Sine impe'undiakono se'elu wita atuu i olodo to Isaraeli gagi pusakado, kana anu Kutenaakomu.

⁷ Onae pu'uno tiaako ira wita andio a osio tongku ka tongku Manase anu asantia atuu gagi pusakado.”

Petiaa wita i asambalino koro Yarade

⁸ Mperonga-ronga ka tongku Manase anu entongano mbo'u, to Rube ka to Gadi mpohawe iramo tia pusakado, anu doweeako ira i Musa ndi ondae i sabaano oleo koro Yarade, kana anu ipakosiomo i Musa, tetenaa-Do i Ue atuu, ndi ondae,

⁹ mompu'u inso i Aro'eri, anu iwiwino koro Aranoni, kota a tia mengkenano korono atuu, ka luwuno pongku anu mantande inso i Medeba hawe i Diboni;

¹⁰ ka luwuno kota Sihoni, mokoledo to Amori, a poparentaa Hasiboni, hawe i witado to Amoni;

¹¹ ka i'amba Gileadi ka witado to Gesuri ka to Maaka, ka luwuno torukuno Heremoni ka luwuno wita Basani hawe i Salaka.

¹² Luwuno poparentaa Ogo i Basani anu memparenta i Asitaro ka Ederei, onaemo anu da tuwu inso a toreado mia Repaimi anu ninangino ka sinaarino i Musa.

¹³ Sine to Isaraeli nahi domponsaari to Gesuri ka Maaka atuu, onaemo Gesuri ka Maaka da mpo'ia ira mpiha i olodo to Isaraeli ranta kanandio.

¹⁴ Butu ia tongku Lewi nahi domewineeako pusakado anu gagi pusakado: Anu gagi pusakado onaemo pesomba anu tinunuako api tia-Do i Ue, Ue Alado to Isaraeli, kana Dodandiako ira ndi ondae.

Wita tiado tongku Rube

¹⁵ Ia tongkudo i Rube, montonda pepe'etuado, doweeako iramo i Musa tiado:

¹⁶ Wita tiado mompo'u inso i Aro'eri i wiwino koro Aranoni, kota anu mo'ia i tia mengkenano korono atuu, ka luwuno pongku mantande umpeda i Medeba;

¹⁷ Hasiboni ka luwuno kotano, anu ia pongku mantande, onaemo Diboni, Bamoti-Baali, Beti-Baali-Meoni,

¹⁸ Yahasi, Kedemote, Mepaati,

¹⁹ Kiriataimi, Sibima, Sereti-Hasahari ia wawontorukuno i lembono atuu,

²⁰ Beti-Peori, ia korimbino torukuno Pisiga, Beti-Yesimoti,

²¹ ka luwuno kota ia pongku mantande atuu ka luwuno peparentaa Sihoni, mokoledo to Amori, anu meparenta i Hesiboni, anu ninangino i Musa; meronga onae mbo'u inangio mokole i Midia, onaemo i Ewi, Rekemi, Suri, Huri, ka i Reba, luwuno mokole anu ipabawaio i Sihoni, palili wita atuu.

²² Ka mbo'u i Bilea anano i Beori, sando atuu dompepate iramo to Isaraeli mompake ponai, saru mia memate anu tinobodo.

²³ Gaagi tidado tongku Rube onaemo koro Yarade ka wita i wiwino. Onaemo pusakado inuleno i Rube montonda pepe'etuado, luwuno kota ka iniado.

Wita tiado tongku Gadi

²⁴ Ndi ondae tongku Gadi, onaemo inuleno i Gadi montonda pepe'etuado, iweeako iramo i Musa, tia andio:

²⁵ Wita tiado onaemo Yaese ka luwuno kota wita Gileadi, asantia witado to Amoni hawe i Aro'eri, anu i sabaano oleo Raba,

²⁶ mompu'u inso i Hesaboni hawe i Ramati-Misipa ka Betoni, ka te'inso i Mahanai hawe i wita Debiri,

²⁷ ka i lembono Beti-Harami, Beti-Nimara, Sukoti ka Saponi, toreano poparentaa Sihoni, mokole Hasiboni; Koro Yarade ka wita i wiwino, hawe i untuno rano Kinere, i sabaano oleo koro Yarade.

²⁸ Onaemo tuu pusakado inuleno i Gadi montonda pepe'etuado, luwuno kota ka iniano.

Wita tiado tongku Manase

²⁹ Ndi ondae tongku Manase anu asantia, onaemo ndi ondae inuleno i Manase anu entongano atuu, montonda pepe'etuado, iweeako iramo i Musa tia andio:

³⁰ witado te'inso i Mahanai: Luwuno Basani, luwuno poparentaa Ogo, mokole Basani, ka luwuno Hawoti-Yairi, anu i Basani atuu, nomo pulu kota hadiono;

³¹ ka entongano i Gileadi, Asitaro ka Ederei, kota-kota poparentaa Ogo i Basani, gagi tiano inuleno i Makiri, anano i Manase onaemo tia entongano inuleno i Makiri montonda pepe'etuado.

³² Onaemo tuu luwuno anu itiaako ira i Musa gagi pusakado i wita Moabi i sabaano oleo koro Yarade umpeda i Yeriko.

³³ Sine ia tongku Lewi i Musa nahi poweeako ira pusakado: Ondae i Ue, Ue Ala Isaraeli, Ondaemo gagi pusakado kana anu Dodandiako ira ndi ondae.