Yosua 11 - Wunta Mempori

Tedontano Kana'a Utara

¹ Mansano anu teweweu atuu teronge ndi Yabi mokoledo to Hasori, montenaomo mia lako ndi Yoba, mokoledo to Madoni, ka a mokole wita Simoroni, ndi mokole Akasa,

² ka ia luwuno mokole i Utara, a mentorukuno, i Araba-Yarade, ka i selatano Kinero, Sepela, Dore i sumooano oleo,

³ onaemo mokoledo to Kana'a ia sabaano oleo ka i sumooano oleo, to Amori, to Heti, to Perisi, to Yebusi a mentorukuno, ka to Hewi ia mpu'uno torukuno Heremoni, i wita Misipa.

⁴ Ka do'amba mpeluarako luwu mokole andio mperonga-ronga saru luwuno sorodadu, tedoa hadio palili, kana one i wiwi ntahi hadiono, ka tedoa hadio ngara ka kareta.

⁵ Mokole andiodo ntepo'asa, aiwa mpekema mperonga-ronga umpeda mata uwoi Meromi, mpeteaako ira to Isaraeli.

⁶ Mepau Iramo i Ue ndi Yosua, ”Sii doito umaropi ira, nde tisomo bara'ura kana langku kanandio, Aku meweengako ira memate luwu a nto Isaraeli. Ngarado asalakono impepate ira, karetado asalakono imentunuo.”

⁷ I Yosua ka luwudo sorodaduno tepohaweako ira nahi domengkokooo umpeda a mata uwoi Meromi, ka domensapoi ira.

⁸ Ka Ondae i Ue meweengako ira a nto Isaraeli. Donangi ira, ka dolulu ira hawe i Sidoni-Langkai ka hawe i Mesirepo-Maimi, ka hawe i lembono Misipa anu i sabaano oleo. Kanandiomo domempinepate, nahina maupo te'asa mia anu tepotola.

⁹ Iweweu ira i Yosua kana anu Dopauakono i Ue: Ngarado mensinolangi ka karetado mentinunu.

¹⁰ Itempono atuu, pekuleno i Yosua irontuo mbo'u Hasori, ka mokoleno ipepateakono ponai. Nde hangano i Hasori se'eluno anu tedoa moroso i olono luwuno poparentaa i wita atuu.

¹¹ Luwuakoano anu menaa ilarono pinepateako ponai ka dopokoropu ira mia atuudo. Nahina anu tepo'ia tuwu, ka luwuno anu hinao penaano ka Hasori domesongkoo.

¹² Ka luwuno kota ka anu mokoledo inangio i Yosua ka ipepateako ira ponai, kana petenano i Musa, tinena-Do i Ue.

¹³ Sine, to Isaraeli nahi domentunuo kota tuudo, anu wunangu i wawoni howuno kota se'eluno, tendeano Hasori anu tinununo i Yosua.

¹⁴ Luwuno sangka ka pinotuwu anu laro kota atuu, dompomuru iramo to Isaraeli. Sine luwuno mia dompepateako ira ponai, nahina anu tepo'ia tuwu, inso ia luwuakoano anu hinao penaano.

¹⁵ Kana tinena-Do i Ue ndi Musa, tetenaa-Do atuu, kanatuumo petenano i Musa ndi Yosua ka kanatuumo i weweuo i Yosua: Nahina te'asa anu kinolupeno kana tinena-Do i Ue ndi Musa.

Poponangido to Isaraeli

¹⁶ Kanandiomo inangi ira i Yosua luwuno wita atuu, moiko a mentorukunono, luwuno Wita Nege, wita Gose, Sepela, ka Araba-Yarade, ka a mentorukuno i Isaraeli saru wita lembono;

¹⁷ mompu'u inso ia ntorukuno Gundu, anu morake lumako i Seiri, hawe i Baala-Gadi i lembono torukuno Libano, ia pu'uno torukuno Heremoni. Irako ira luwu mokoledo ka ipepate ira.

¹⁸ Tehine ipeteaako ira i Yosua luwuno mokole atuu.

¹⁹ Nahina maupo te'asa kota anu mesambe'eako ira to Isaraeli, sangkadio to Hewi anu mpo'ia i Gibeo. Luwuno atuu domerontuo a mpeteaa.

²⁰ Hangano Ondae i Ue anu mokomoteao aroado, onaemo ka dompeteaako ira to Isaraeli, ka domempinokoropu kasi domempinehohawa, sine merinopu, kana anu petena-Do i Ue ndi Musa.

²¹ Itempo atuu hawe i Yosua, ka ipokopingko ira luwu to Ena inso a mentorukuno, inso i Hebero, i Debiri ka i Anaba, inso a luwuno torukuno i Yehuda ka inso a luwuno mentorukuno Isaraeli. Ondae ka luwuno kotado ipokoropuo i Yosua.

²² Nami hina mbo'u mia to Ena anu pinoinee tuwu i witado to Isaraeli; butu i Gasa, i Gati, ka i Asido da hinao tebinta.

²³ Kanandiomo irontu ira luwu i Yosua wita atuu, kana pau-Do i Ue ndi Musa. Ka i Yosua meweengakono wita atuu ia nto Isaraeli gagi pusakado, montonda petiaado tongkudo. Rodoomo wita atuu, mpenaa-naa iramo mpetea.