Yosua 10 - Wunta Mempori

Pe'iwalia umpeda i Gibeo

¹ Mansano irongeo i Adoni-Sede mokole Yerusale, motae irontuoomo i Yosua kota Ai ka iropuo, kana anu iweweuo Yeriko ka a mokoleno, kanatuukoa mbo'u iweweuo kota Ai ka mokoleno, ka nto Gibeo mpoweweu ira pesintuwua saru to Isaraeli ka mpo'ia ira i olodo,

² tedoa ira medoito mia, nde Gibeo atuu kota anu langkai, kana kota mokole, ka laluaopo langkai sekono kota Ai, ka luwudo tadulako.

³ Onaemo i Adoni-Sede mokole i Yerusale montena mia lako ndi Hohami, mokole i Hebero, ndi Pirea mokole Yaramu, ndi Hapia mokole i Lakisi, ndi Debira mokole i Egelo, motae,

⁴ ”Ime'aiwamo ndi ongkue ka imentulungi aku, ka tomensapoio Gibeo, nde moweweuomo pesintuwua saru i Yosua ka to Isaraeli.”

⁵ Onaemo ka olima ira mokole to Amori mpepumpu ka domelako: Mokole Yerusale, mokole Hebero, mokole Yaramu, mokole Lakisi, ka mokole Egelo, ondae ka luwuno sorodadudo. Mpekema ira mentanggolilio Gibeo ka mpeteaakono.

⁶ Ka to Gibeo atuu montena mia lumako ndi Yosua, ia mpekemaano i Giliga, motae, ”Si potolao kaemu inso ia tetenaamu ndio. Aiwamo ndi omami, potola kami, ka tulungi kami nde luwudo mokoledo to Amori anu mpo'ia a mentorukuno, mpe'asa iramo umewai kami.”

⁷ Lumakoomo i Yosua inso i Giliga, onae ka luwudo sorodadu anu merongaakono, luwudo pongkiari anu moroso ntu'u.

⁸ Pau-Do i Ue ndi Yosua, ”Sidoitoako ira, nde Aku meweengako ira a ngkaemu. Nahi tahina mia inso ndi ondae anu ta moko'aropiko.”

⁹ Asa wongi ipelempa inso i Giliga, i Yosua mepokomba umaropi ira.

¹⁰ Ondae i Ue monsiarawo ira i arodo to Isaraeli, ka i Yosua weweu ira ka domengkenangia langkai umpeda i Gibeo, lumulu ira a mporakea Beta-Horoni ka sumapoi ira ka domponsuka hawe umpeda i Aseka ka i Makeda.

¹¹ Kontongaado mpolai ia arodo to Isaraeli, mansado mehawe i korimbino Beta-Horoni, Ondae i Ue wuwunooako ira watu anu melolangkai inso i langi hawe i Aseka, ranta ka domemate. Anu mate hangano usa watu atuu lalu hadioopo sekono anu pinepatedo to Isaraeli mompake ponai.

¹² Mepauomo i Yosua ndi Ondae i Ue, a oleo Dopeweengakono i Ue to Amori a nto Isaraeli. Mepauomo i arodo to Isaraeli, ”Mata oleo, penaa-naamo i wawono Gibeo, ka omue wula i wawono lembono Ayalo!”

¹³ Menaa-naaomo mata oleo ka wula nahi pelelu, ranta tongku atuu mombaloakono pontoono aroado a iwalido. Nde nahi teburi ke ia Wuntado Mia Moleo? Mata oleo nahi pelelu i tongano langi ka me'ara-arai ranta ka isumoo mingki asa oleo.

¹⁴ Napi hori hina oleo kanatuu, i ndi'ipua ka maupo oleo lembuiano, motae Ondae i Ue merorongeakono po'emano asa mia kanatuu nde anu me'iwali tiado to Isaraeli onaemo Ondae i Ue.

¹⁵ Umari atuu i Yosua ka luwuno to Isaraeli anu merongaakono mpekule ia kemado i Giliga.

Olima mokole pinepate

¹⁶ Mokole anu olima ira atuu mpolai ka dompewuni i larono aa i Makeda.

¹⁷ Ndi Yosua pinaleleakoomo, kanandio, ”Ko'olima ira mokole atuu mehinawe iramo mpewuni ia aa i Makeda.”

¹⁸ Motaeomo i Yosua, ”Impolundiakono watu langkai a ngangano aa atuu ka ihina mia dumagai ira.

¹⁹ Sine si mpenaa-naa lumulu ira iwali miu, imelulu ira ka ime'a'e ira baresi anu i bungkuno. Simpo'inee ira mpewinso ia iniado, nde Ondae i Ue, Ue Alamu dopeweengakonomo ndi omiu.”

²⁰ Umarino i Yosua ka to Isaraeli numangi ira ranta ka domentenangi ntu'u, sine ba opia ira i olodo mokompewinso ia kota anu pinokomoroso.

²¹ Mpekule iramo memomoiko tongku atuu ndi Yosua a kemado, i Makeda. Nahina maupo te'asa mia anu mosia montadi pau ta umewai ira to Isaraeli.

²² Ipepauako ira i Yosua, ”Ime'ungkahiomo ngangano aa ka luarako ira olima mokole atuu inso ilarono ka iwawa ira ndi ongkue.”

²³ Kanatuumo domeweweuo mia tinena atuu. Doluarako ira olima mokole atuu inso ia laro aa, ka dowawa ira ndi onae: Mokole Yerusale, mokole Hebero, mokole Yaramu, mokole Lakisi ka mokole Egelo.

²⁴ Umarido lumuarako ira mokole atuudo ka dowawa ira ndi Yosua, i Yosua moboi ira luwu to Isaraeli mpepumpu ka ipotaeako ira luwuno tadulako sorodadu anu merongaakono mpontonda mpetea, ”Ime'umpeda, imenaao karu miu ia palontundudo mokole andio.” Mperangkuhi iramo ka domenaao karudo a palontundudo mokole atuu.

²⁵ Mepauomo i Yosua ndi ondae, ”Sii medoito, ka kasi molusa aroa miu, impokomorosoo ka impedatoo aroa miu, nde kanatuumo ba Doweweuo i Ue ia luwuno iwali miu anu impeteaako ira.”

²⁶ Umari atuu ipepate ira i Yosua mokole atuudo ka dondoe ira, ia olima keu pondoea, ranta ka i sumoo mata oleo.

²⁷ Sine mansano ta sumoo oleo metenaomo i Yosua, potii ira wata ngkoroi atuu te'inso ia ngkeu pondoea ka dontai ira ia aa pewuniado. Ka i'amba ngangano aa atuu hinowuiako watu melolangkai, da hinao ranta kanandio.

Tedontano wita Kana'a i selata

²⁸ I oleo koa atuu i Yosua ipoko'alao kota Makeda, ihino inia ipepateako ira ponai, kanatuu koa mbo'u mokoledo, luwuno anu tuwu ipepate ira nahina maupo te'asa mia anu tola ka mokole Makeda wineweu kana mokoledo to Yeriko.

²⁹ Mpotilalo iramo i Yosua ka luwudo to Isaraeli inso i Makeda, lako i Libina, meteaako ira to Libina.

³⁰ Kota atuu Dopeweengakono i Ue a nto Isaraeli, saru mokoleno. Kota ka luwuno ihino ipepate ira i Yosua mompake ponai, nahina maupo te'asa mia anu tepotola, ka mokoledo wineweu kana mokoledo to Yeriko.

³¹ Ka i'amba i Yosua ka luwudo to Isaraeli mpotilalo inso i Libina lumako i Lakisi, ka do'amba mpekema mentanggolilio kota atuu ka domensapoio.

³² Ondae i Ue meweengakono kota Lakisi atuu a nto Isaraeli. Ipoko'alao i Yosua kota atuu i ko'orua oleono. Kota atuu ka luwuno ihino ipepateako ira ponai, kana iweweu ira to Libina.

³³ Horami, mokole Geseri, lumako tumulungi ira to Lakisi, sine i Yosua mepateo saru palilino, onaemo ka nahina miano anu tepotola.

³⁴ Ka i'amba i Yosua ka luwudo to Isaraeli mpotilalo inso i Lakisi lumako i Egelo, mpekema ka domengkadu ira ka do'amba mensapoio inia atuu ka dompe'iwali.

³⁵ Kota atuu dompentorokio i oleo koa atuu, ka dompepateako ira ponai. Luwuno anu tuwu dompepate ira ia oleo koa atuu, doweweu ira kana doweweu ira to Lakisi.

³⁶ Ka i'amba i Yosua ka luwudo to Isaraeli melako inso i Egelo lumako i Hebero, me'iwaliako ira.

³⁷ Dompentorokio kota atuu, dompepateako ira ponai, saru mokoledo, ka kotado, ka luwuno anu tuwu dopepate ira nahina anu tepotola, kana anu wineweudo i Egelo. Kota ka luwuno anu tuwu i larono dompepate ira.

³⁸ Ka i'amba i Yosua ka luwudo to Isaraeli mpekule i Debira, ka dompe'iwaliako ira.

³⁹ Wita atuu saru mokoleno ka luwuno kotano dompentorokio, ka dompepateako ira ponai. Luwuno anu tuwu pinepate, nahina anu pino'inee tepotola, kana anu wineweudo i Hebero, kanatuu koa mbo'u doweweu ira to Debiri saru mokoledo, kana anu wineweudo i Libina saru mokoledo.

⁴⁰ Kanandiomo i Yosua numangio luwuno wita atuu, Mentorukuno, wita Nege, Sipela ka korimbino ka luwuno mokoledo. Nahina maupo te'asa mia anu tepotola, sine luwudo anu hinao penaano dopepate ira, kana anu Dotenaako ira i Ue, Ue Alado to Isaraeli.

⁴¹ I Yosua mepate ira inso i Kadesi-Berane, hawe i Gasa, ka luwuno wita Gosa hawe i Gibeo.

⁴² Luwuno mokole ka witado inangi ira luwu i Yosua. Nde anu metea tiado to Isaraeli onaemo Ondae i Ue, Ue Alado to Isaraeli.

⁴³ Ka i'amba i Yosua ka luwudo to Isaraeli mpekule ia kemado i Giliga.