Yoeli 3 - Wunta Mempori

Pohuku a luwuno iwalido to Isaraeli 3:1-8

¹ ”Hangano menteeano a luwuno oleo atuu ka a tempo atuu, tempono Kupomuleo teweweuno Yehuda ka Yerusale,

² Aku pumpu ira luwuno tongku ka wawa ira mpetii a Lembono Yosapa; Aku mekara-karaako ira i ra'ai mongkona bawaa-Ku ka mia-Ku, Isaraeli, hangano domensiarawo ira i olodo luwuno tongku ka mpetia-tiao wita-Ku;

³ hangano bawaa-Ku dompotendeakono undi, mpeweengakono asa ana ntama hangano asa mia belesu, ka me'asao asa ana beine hangano anggoro anu ta ininu.

⁴ Ka mbo'u, hapa penggoeamu saru Ongkue, hei Tirusi, Sidoni ka luwuno wita Pelisiti? Nde komiu mingki mensulooke wineweu-Ku? Tewala hinao wineweumiu ndi Ongkue, manasa magasi ka Aku koa ronga mosuleo wineweumiu atuu ndi omiu.

⁵ Hangano omiu me'alao salaka ka wulaa-Ku ka mewawao arataa-Ku anu ntekokosi a luwuno pesombaamiu,

⁶ saru me'asa ira to Yehuda ka to Yerusale a nto Yunani ka domempinoko'olai inso a wita-Do.

⁷ Menteeano Aku lumelu ira inso a mpo'ianga ba isua ime'asa ira. Aku mosuleo wineweumiu atuu a wawo ulumiu.

⁸ Aku umasa ira anamiu tama ka beine a nto Yehuda ka ondae ira me'asa ira anamiu atuu a nto Sieba, aasa tongku anu olai, hangano Dopauomo i Ue.”

Luwuno tongku inoluako mpetea 3:9-17

⁹ Paleleomo mongkona andio i olodo tongku: pepatindamo mpo'aropi peteaa, patinda iramo puu mpetea; asalakono luwuno sorodadu me'umpeda ka melako!

¹⁰ Paluomo mata padekomu gagi ponai ka luwuno piso pompolemu gagi kansai; moikoomo mia anu nahi polio motae, ”Ongkue andio puu mpetea!”

¹¹ Irongamo me'aiwa, hei luwuno tongku inso a luwuno siuno, ka pepumpumo i ra'ai! Ipotiiomo, oo Ue, luwuno sorodadu-Miu!

¹² Po'ineeomo luwuno tongku mpelelu ka melako a Lembono Yosapa, hangano i ra'ai Aku mentoro bitara ira luwuno tongku inso a luwuno siuno.

¹³ Ioomo ponsewo, hangano sowia motahaomo; aiwamo, sesaomo, hangano ponsesaa anggoro bukeomo; luwuno pohowua anggoro nami te'ula, hangano hadioomo wineweudo mosa'o.

¹⁴ Hadio mia, hadioomo mia i lembono potantuia! Oo, rangkuomo oleo-Do i Ue i lembono potantuia!

¹⁵ Mata oleo ka wula gagi wongi-wongi, ka luwuno anano wula menaao wantado.

¹⁶ Ondae i Ue mengaoli inso i Sioni, inso i Yerusale Dopoporongeo pepau-Do, langi ka tolino leelu. Sine Ondae i Ue onaemo pepekaduduiado bawaa-Do, bentedo to Isaraeli.

¹⁷ ”Ka komiumo mento'orio nine Ongkuemo Ue Alamiu, anu mo'ia i Sioni, torukuno-Ku anu mempori. Yerusale ta gagi mempori, ka luwuno mia hawe nahi ira ntelaloio mbo'u.

Ronso tiano bawaa-Do i Ue 3:18-21

¹⁸ Ia tempo atuu luwuno torukuno ta mompo'iti anggoro wo'ohu, luwuno pongku wita mompowaa susu, ka luwuno korono mo'are i Yehuda ta mompowaa uwoi; mata uwoi ta me'umbaako inso a raha-Do i Ue ka bahoo lembono Sitimi.

¹⁹ Masiri ta gagi boni-boni, ka Edomi ta gagi pada one boni-boni, hangano pompokonsii a nto Yahudi, hangano mpo'uwu iramo reano mia anu nahina salano i witano.

²⁰ Sine Yehuda pino'iangi mpiha ranta nahina tampulaano ka Yerusale a luwuno inule.

²¹ Aku mombaloakono reado anu napi Kupombaloakono; Ondae i Ue mo'ia i Sioni.”