Yoeli 2 - Wunta Mempori

¹ Puuriomo tawuwua i Sioni ka pebooliakono pepopoto'ori i torukuno-Ku anu mempori! Po'ineeomo dompondidi-ndidi luwuno palili wita, hangano oleo-Do i Ue hawe, mentee ntu'u, oleo atuu rangkuomo;

² oleo wongi mpusu ka worikidi, oleo menseru ka megawu nseru. Kana towea mepansari a wawo luwuno torukuno haweomo asa tongku anu langkai ka moroso; anu kanatuu nahi hori hina mompu'u i ndi'ipua, ka umarino atuu nahi ta hina mbo'u a luwuno inule, a tempo anu ta hawe.

³ I arono piingko ikaano api, i bungkuno langano api langkai. Wita i arono kana Bonde Paradesi, sine i bungkuno pada one londa, ka nahina anu tola inso ndi onae.

⁴ Rupado kana ngara, ka kana ngara mompalari dompelulu.

⁵ Kana rerendeno kareta, dompelonso-lonso a wawo luwuno punsudo torukuno; kana ponggelo-nggelono langano api anu kumaano piingko seami; kana aasa tongku anu moroso, baresino tetinda ta metea.

⁶ I arono luwuno tongku mpondidi-ndidi, luwuno rupa gagi tedoa momite.

⁷ Kana peluludo puu mpetea, kana sorodadu dompewuatako a rere watu; singge mia melempa a mpesalaano, nahi pansia inso a nsalano;

⁸ ondae nahi dompedodanda, singge mia melempa mpiha a nsalano; ondae mperumpai a mpekorahakoado anu mpekansai, baresido nahi te'otuhi.

⁹ Ondae mponsapoi a laro ngkota, mpelulu a rere watu, mpomaru a laro luwuno raha, mpewinso telalo a mpentangoa kana mia monako.

¹⁰ I arono tolino mondende, langi melelu; mata'oleo ka wula gagi wongi-wongi, ka luwuno anano wula monaa wantano.

¹¹ Ondae i Ue moporongeo pau-Do i arono sorodadu-Do. Mentee ntu'u, tedoa hadio sorodadu-Do, moroso ntu'u anu meleluakono pau-Do. Tedoa ntu'u mongkokongiri oleo-Do i Ue atuu. Isema anu moko'ontoo?

Po'oluako ka dontepidi 2:12-17

¹² ”Sine kanandio-andio,” kanandiomo pau-Do i Ue, ”pepokulemo ndi Ongkue tompaano aroamu, saru mepuasa, mengese ka monsabangi.”

¹³ Baliomo aroamu ka osi'i sangkamu, pepokulemo ndi Ondae i Ue, Ue Alamu, hangano Ondae me'aroa ka mompehohawa, tedoa Ira sabara ka hadio ntu'u pompehohawa. Me'o'ole Ira mingki mompotii masolaa.

¹⁴ Ba mansa Ira wali me'o'ole, ka Dobintao ronso, gagi pesomba kaanga ka pesomba tinawa ndi Ondae i Ue, Ue Alamu.

¹⁵ Puuriomo tawuwua i Sioni, pesusuaomo oleo puasa, paleleomo tepumpua langkai.

¹⁶ Pumpu iramo tongku andio, pokomempori iramo bawaa, pumpu iramo mia memota'u, pumpu iramo nana'ote, maupo nana'ote anu mo'uo. Moikoomo umbu ngkoroi tama ipeluarako inso a bolongkono, ka umbu ngkoroi beine inso a bolongko poturiano.

¹⁷ Moikoomo luwuno sando mpesomba, puu pompekakaako-Do i Ue, mengese i olono arono bansala ka meda mpontunua pesomba, ka impotae, ”Oo Ue Ipehohawa iramo bawaa-Miu, ka siimo Ipo'inee ira mia-Miu gagi tataa, ranta luwuno tongku pasinggiri ira. Tembio ka ipinau i olodo luwuno tongku: Isua Ira Ue Alado?”

Dandi-Do i Ue a tongku anu mentepidi 2:18-27

¹⁸ Aroa-Do i Ue mawongkoakono wita-Do, ka Dopehohawa ira bawaa-Do.

¹⁹ Ondae i Ue sumangki ira bawaa-Do, Dopotae, ”Menteeano, Aku mo'oliwiakomiu gandu, anggoro ka lana, ka komiu memowohiakono; Nahi Aku mo'inee komiu mbo'u gagi tataa i olodo luwuno tongku.

²⁰ Ponsapoi inso i utara Aku moko'olaio inso ndi omiu, ka Aku sumaario a wita anu mokari ka londa, baresi i arono a ntahi i sabaano oleo, ka baresi i bungkuno a ntahi i sumooano oleo. Mana moboo ka mana oruno ta mewuatako, hangano mongkokongiri ntu'u anu wineweuno.

²¹ Si doito, hei wita, peboo-boolimo ka po'undemo, hangano mongkokongiri ntu'u anu wineweu-Do i Ue!

²² Si medoito, hei luwuno kondehora i tongampada, hangano wita pompakambia i pada one mololowulu, keu mewua, keu ara ka keu anggoro mompowee pompolino.

²³ Hei inuleno i Sioni, peboo-boolimo ka po'undemo hangano Ondae i Ue, Ue Alamu! Hangano Dopoweakomiumo usa a pompu'uano tempo ka Dopotiiakomiu usa, usa a pokotompaano tempo kana se'eluno.

²⁴ Luwuno ponsesaa ta bukeako gandu, ka po'ianga pomporo'ia hadio ntu'u anggoro ka lana.

²⁵ Aku momuleakomiu luwuno ta'u anu hasilino piingko ikaano kosume mpelimba, kosume mpelonso, kosume modoko mongkaa ka kosume mongkarasi, sorodadu-Ku anu hadio Kutena ira i tonga-tongamiu.

²⁶ Komiu mpepotende mpongkaa ka memowohi, ka komiu me'unde-undeo nee-Do i Ue, Ue Alamiu, anu weweuo wineweu kinohali-haliako ndi omiu. Bawaa-Ku nahi ira memongkoko'ii mbo'u ranta nahina tampulaano.

²⁷ Komiu koa mento'orio nine Ongkue kongko i olodo to Isaraeli, ka nine Ongkuemo Ue, Ue Alamiu; nahina anu susua. Bawaa-Ku nahi ira memongkoko'ii mbo'u ranta nahina tampulaano.”

Oleo-Do i Ue 2:28-32

²⁸ ”Ta gagi lembuino, nine Aku umuwuo Penaa-Ku a wawo luwuno mia, luwuno anamiu tama ka beine ira mpopau anu ta gagi; luwuno miamiu anu mota'u ira memo'ipi, luwuno mangalitaumiu ira mpohawe hadio pongkita.

²⁹ A wawo luwuno mbo'u atamiu tama ka beine Aku motiio Penaa-Ku a luwuno oleo atuu.

³⁰ Aku weweuo luwuno kinohali-haliako i langi ka i tolino: rea ka api ka hadio pebotono ahu.

³¹ Mata oleo ta baali gagi wongi mpusu ka wula gagi rea se'eluno napi hawe oleo-Do i Ue anu mongkokongiri.

³² Isemamo koa anu mebooli a nee-Do i Ue ta kinadudui, hangano i Torukuno Sioni ka i Yerusale ta hina tekaduduia; kana anu Dopauomo i Ue, sompo mia anu pinoboi-Do i Ue ta tewinso a luwuno mia anu tepotola.”