Yesaya 9 - Wunta Mempori

¹ Tongku anu melempa a laro wongi-wongia mongkitaomo mewine anu langkai; ondae anu mpo'ia a wita wongi-wongia, ndi ondae mewine mewantaomo.

² Hangano Omiu maroa pebooli, ka mawongkoa anu langkai; memawongko iramo i aro-Miu, kana mawongkodo tempo sumowi, kana mia mengkokora-kora tempono mpetia-tia pinomuru.

³ Hangano pasanga anu dumansoo ka ponsela a wawo oweano saru tukono anu mompokonsii Ipuduomo kana a oleo tenangiano Midia.

⁴ Hangano sompo sapatuno sorodadu anu mongkopa-kopa ka sompo lemba meloe anu medoloako rea ta gagi pompaani api.

⁵ Hangano asa nana'ote hinaomo tiato, asa ana ntama mewineeako kitamo; luwuno poparentaa kongko a wawo oweano, ka neeno domempauo mia: Puu Pompatudu kinohali-haliako, Ue Ala Anu Moroso, Ama anu Nahina Tampulaano, Mokole Sintuwu.

⁶ Langkai pabawano, ka rodoa nahi ta hina otuano a wawo ngkadera poparentaano i Daudi ka a laro poparentaano, hangano i'empehiakono ka mokorosoakono moleoa ka menteea mompu'u kanandio-andio ranta nahina tampulaano. Rosono pongkekewoi-Do Ueno luwuakoano Ira weweuo mongkona andio.

Tekuda-Do i Ue ndi Eparai 9:7–10:4

⁷ Doluarakonomo i Ue pau-Do ndi Yako, ka pau-Do atuu umaluo Isaraeli.

⁸ Luwuno tongku atuu, i Eparai ka palilino Samaria, mento'orio, sine saru pompelangka-langkaido dompotae,

⁹ ”Rere watu tela tebangku, towali mpontadeo inso a watu anu pinolei; keu ara mentinuehi, tome'euakono keu arasi.”

¹⁰ Onaemo ka Dotena ira i Ue tadulako sorodaduno i Resini umewai ira, ka lumelu ira iwalido:

¹¹ To Arami inso i sabaano oleo, ka to Pelisiti inso i sumooano oleo, Isaraeli domenteleakono nganga anu malua. Maupo gagiomo luwuno andio, tekuda-Do i Ue napi morini, ka kae-Do da tetaangako.

¹² Sine tongku atuu nahi dompepokule ndi Ondae anu tumunduhi ira, ka nahi dome'ungke Ira Ueno luwuakoano.

¹³ Onaemo ka Dotebasio i Ue inso i Isaraeli ulu ka iki, watano ka sampano merongaako a oleo anu mengkena.

¹⁴ Mia memota'u ka mia pinemota'u, onaemo atuu ulu, ka nabi anu mpopaguruako pegaupi, onaemo atuu iki.

¹⁵ Hangano luwuno petewawado tongku andio onaemo pompokotesaa, ka mia anu mepinarenta gagi tesiarawo.

¹⁶ Onaemo pu'uno, Ondae i Ue nahi Dopehohawa ira mangalitaudo, ka nahi Dopehohawa ira nana'ote nahina amado ka tuwu beinedo, hangano luwudo mpebungkui Aku ka mpoweweu mosa'o, ka sompo nganga mpepau anu nahi moiko. Maupo gagiomo luwuno atuu, tekuda-Do napi morini, ka kae-Do da tetaangako.

¹⁷ Mentee ntu'u, gau mosa'o melanga kana api anu kumaano pingko ewo ka rui, ka i'amba sumongkoo tonga ewo a ntobu ranta pebotono ahu membombo i wawono.

¹⁸ Hangano tekuda-Do Ueno luwuakoano, mo'aiomo wita atuu, ka tongku atuu gagi panino api; maupo te'asa mia nahi pehohawao pepaekompono.

¹⁹ Ondae mpongkaa i koanado, sine da mokoninggo, ondae mpongkaa i manggalido, sine nahi domemowohi, sompo mia kumaano bauno pe'etuno onaeno;

²⁰ I Manase kumaano i Eperai, ka i Eparai kumaano i Manase, ka ondae meronga-ronga umewaio Yehuda. Maupo gagiomo luwuno andio, tekuda-Do napi morini, ka kae-Do da tetaangako.