Yesaya 8 - Wunta Mempori

Anano nabi beine gagi petondoni 8:1-4

¹ Mepau Iramo i Ue ndi ongkue, ”Alaomo asa watu poburia langkai ka i wawono buriakonomo binuri biasa: Mahera-Salala Hasa-Base.”

² Ka ku'amba mompoboi orua sakosii anu pine'ala-ala, onaemo sando mpesomba Uria ka i Sakaria anano i Yeberekia.

³ Ka ku'amba mewowaliakono beineku, asa nabi beine; onae mentia ka me'anaakono asa ana ntama. Ka Do'amba mepau i Ue ndi ongkue, ”Neeakonomo: i Mahera-Salala Hasa-Base,

⁴ hangano se'eluno napi pokopauo nana'ote atuu ’Ine! Ama!’ pompolino Damasi ka pinomuruno Samaria ta winawa i arono mokoledo to Asuri.”

Ponsapoido to Asuri i Yehuda

⁵ Ondae i Ue mepau mbo'u ndi ongkue,

⁶ ”Hangano tongku andio nahi domentarimao uwoi Siloahi anu waa me'ara-arai, ka memotewe aroa ndi Resini ka anano i Remalia,

⁷ onaemo pu'uno, menteeano, Ondae i Ue Ira weweuo uwoi korono anu mokora ka langkai, – mokole Asuri ka luwuno marambano – lulua ndi ondae. Uwoi andio ta lulua lumaloio luwuno pangkorono ka waa lumaloio luwuno wiwino,

⁸ saru merumpa mewinso i Yehuda, sumampuo ka mowo hawe a we'u. Tewileno panino ta tumutuwio luwuno witamu.” Sine Ondae Ue Ala kumongkomi kita!

⁹ To'oriomo, hei luwuno tongku, ka tededengkemo, impekokoongakonomo, oo, luwuno siuno tolino, impepatindamo mpetea, ka tededengkemo, impepatindamo mpetea, ka tededengkemo!

¹⁰ Impotudaomo akala, manasa nahi ta gagi! Impo'alamo tepo'asaa mpau, manasa nahi ta pinokoweweu! Hangano Ondae Ue Ala kumongkomi kami!

Somborino i Yesaya gagi pepopoto'ori 8:11-22

¹¹ Hangano kanandiomo pau-Do i Ue ndi ongkue tempono kae-Do pabawai aku, ka Dopopoto'oriakune ka si kutondao peleludo tongku andio,

¹² ”Si mpotae tepo'asaa luwuno anu pinaudo tongku andio tepo'asaa, hapa anu dinoitoakodo siimo imedoitoakono ka siimo impondende.

¹³ Sine Ondae Ueno luwuakoano, Ondaemo anu asalakono ime'akuio gagi Anu Mempori; ndi Ondaemo imedoito ka ndi Ondaemo impondende.

¹⁴ Ondae Ira gagi po'ianga mempori, sine watu tetengkua mbo'u ka watu tetiduado orua suku Isaraeli atuu, saru gagi oho ka dampado palilino Yerusale.

¹⁵ Hadio i olodo ta tetidu, tebangku ka mobela langkai, tekadu ka tinawa.”

¹⁶ Naaomo sakosii andio ka tondoniomo pompaguru andio i olodo ana guruku.

¹⁷ Ka aku sumikori Ira i Ue anu wunio rupa-Do te'aro a inuleno i Yako; aku momperorohi ndi Ondae.

¹⁸ Menteeano, ongkue ka nana'ote anu Doweeakunemo i Ue onaemo petondoni ka pepopoto'ori i olodo to Isaraeli inso ndi Ondae Ueno luwuakoano anu mo'ia a ntorukuno Sioni.

¹⁹ Ka tewala mia mpotae ndi omue, ”Po'emamo pontiso a onitu ka luwuno penaa anu mompau nahi manasa ta gagi anu metanga-tanga ka momuti-muti,” ka sangkiomo, ”Kombake asa tongku tekona mo'ema pontiso a mpinesombaino? Nde asalakonoke ira mpo'ema pontiso a mia mate tiano mia tuwu

²⁰ ka ipohawe pompaguru ka pe'oliwi?” Isema anu nahi sangki menunu saru pau kanatuu, ndi onae nahi pesabaako towea.

²¹ Mia ira wela ntelalo i wita atuu, memongkokolaro ka memokoninggo, ka tempono mokoninggo, ira ntekuda ka mentotonaao mokoledo ka Ue Alado. Mia ira mpentombu i langi

²² ka mpengkita i tolino, mengkaa butu ma'isoa ka wongi-wongia, rawu-rawu anu mompokoma'iso, ka ira mentinadi a laro wongi-wongia.

Hinaa-Do Mokole manangai

²³ Sine nahi ta hina mbo'u rawu-rawu a wita anu te'asi atuu. Tewala i ndi'ipua nahi Dotuduo i Ue wita Sebulo ka wita Napatali, lembuino Ira mokontekosio pesalaa lumako a ntahi, wita i asatowano koro Yarade, witado tongku susua.