Yesaya 7 - Wunta Mempori

I Yesaya mokorosoo mokole Ahasi

¹ I tempono i Ahasi anano i Yotami anano i Usia, mokoledo to Yehuda, lumakoomo i Resini, mokoledo to Arami, saru i Pekahi anano i Remalia, mokoledo to Isaraeli ta meteaakono Yerusale, sine nahi pokosapoio.

² Tempono ipinauako somborino i Daudi, ”to Arami mpekema iramo i wita Eparai,” aroano i Ahasi ka palilino mpondidi-ndidi medoito kana keu a ntobu mpelelu ipuurio angi.

³ Mepau Iramo i Ue ndi Yesaya, ”Peluarakomo tepohaweakono i Ahasi, omue ka i Sieari Yasiubi, anamu tama, i tompano pangkorono Limbo i Wawono, a nsala a Mpada Penatu,

⁴ ka pauakono, Dagaiomo koroimu ka ikongko momperodo. Siimo doito ka siimo itengkuru aroamu hangano orua tompa api anu me'ahu andio tekudano ntu'u i Resini saru to Arami ka anano i Remalia.

⁵ Hangano to Arami ka to Eparai saru anano i Remalia mpontoo iramo anu mosa'o ndi omue, ka mpotae,

⁶ Aiwamo tomelako mensapoio Yehuda, mpokodoitoo, ka mpongko'alao, ka i'amba pinotoro anano i Tabe'eli gagi mokole i tonga-tongano,

⁷ ka kanandiomo pau-Do Ue Ala, Mongkona atuu nahi ta pinokoweweu, ka nahi ta gagi,

⁸ hangano kota poparentaado to Arami onaemo Damasi, petewawano Damasi onaemo i Resini. Nomo pulu ka olima nta'u mbo'u Eparai ta sinapoi, ranta nahi gagi mbo'u tongku.

⁹ Ka kota poparentaado to Eparai onaemo Samaria, petewawano Samaria onaemo anano i Remalia. Tewala nahi moroso pompe'ala-alamiu, mentee ntu'u nahi komiu merodo.”

Pompalele mongkona Imanueli 7:10-25

¹⁰ Ondae i Ue motilaloakono pau-Do ndi Ahasi, Dopotae,

¹¹ ”Emaomo asa petondoni inso ndi Ondae i Ue, Ue Alamu, ke inso a mpo'ianga ondaloano tolinodo mia mate ke a mpo'ianga kana mantandeno langi.”

¹² Sine sumangki i Ahasi, ”Nahi kubehe umemao, nahi kubehe umara-arahako Ira i Ue.”

¹³ Ka i'amba motaeomo i Yesaya, ”Rongeomo hei somborino i Daudi! Napi sompoke imeweweu ira mia nte'osa, ranta iweweu Ira mbo'u Ue Alaku te'osa?

¹⁴ Onaemo pu'uno, Ondaemo i Ue anu Ira weeakomu asa petondoni: Menteeano, beine mongura atuu mentia ka ta me'anaakono asa ana ntama, ka nineeako i Imanueli.

¹⁵ Onae ta mongkaa susu baku ka siu hoani hawe ka ito'orio mosa'oakono anu mosa'o ka binikio anu moiko,

¹⁶ hangano se'eluno napi to'orio nana'ote atuu mosa'oakono anu mosa'o ka binikio anu moiko, witado orua mokole anu dinoitoakomu ta bininta mooa.

¹⁷ Ondae i Ue Ira mompotii ndi omue, a mpalilimu ka a mpe'etumu tempo masukaraa kana anu napi hori gagi mompu'u i Eparai meliahako inso i Yehuda, molalo mokoledo to Asuri.”

¹⁸ I tempo atuu Ondae i Ue momansu mompoboi lale anu mekongko i untuno luwuno ana ngkoro Nili, ka mompoboi hoani anu mekongko i wita Asuri.

¹⁹ Ka i'amba luwuno ira mehawe ntetopa a luwuno bangano melaapimpi ka a olono pongku-pongku watu, a luwuno wala rui ka a luwuno wita pompakambia.

²⁰ A oleo atuu saru piso pongkeru anu sinabo olai inso i asatowano koro Eparata, onaemo mokole Asiuri, Ondae i Ue Ira mongkeru ulu ka wulu i olono pa'a, piso atuu ta mokotampulao mbo'u danggo.

²¹ A oleo atuu sompo mia ta mompekaria asa sapi waino anu mongura ka orua bimba,

²² ka hangano hadiono susu anu hinasili, ira mpongkaa susu baku; mentee ntu'u, susu baku ka siu hoani ta kumaano sompo mia anu tebinta i wita atuu.

²³ A oleo atuu sompo po'ianga, anu eheano tuwu asa nsowu keu anggoro ka anu me'oli asa nsowu sikala salaka, ta gagi po'iangno ewo ka rui.

²⁴ Mia lumako i ra'ai mowawa ana mpana ka pana, hangano luwuno wita atuu buke ewo ka rui.

²⁵ Ka omue nahi kosapa lumako a luwuno laano torukuno anu eheano biningku, hangano doitoako ewo ka rui; i ra'ai sapi ta pinotola ka bimba ta mo'itu-itu.