Yesaya 66 - Wunta Mempori

Tekaduduia umarino pohuku

¹ Kanandiomo pau-Do i Ue: Langi onaemo kadera poparentaa-Ku ka tolino onaemo pelandaano karu-Ku; raha hapake komiu mpowangua-Kune, ka po'ianga hapake anu ta gagi penaa-naaa-Ku?

² Kombake kae-Ku anu weweuo luwuno, ranta ka igagi luwuno andio? Kanandiomo pau-Do i Ue. Sine, miamo anu kanandio anu kinita-Ku: mia anu tepokonsii ka nahina pompe'osaiano ka anu doitoakono pau-Ku.

³ Mia monsumbele sapi lakino, sine mompepate mbo'u mia; mia mompesombaako bimba, sine mompudu keu we'uno dahu; mia mompesombaako pesomba kaanga, sine mompesombaako reano boe; mia mompesombaako dupa, sine mo'unde-unde mbo'u lahumoa. Onaemo pu'uno, mengkena kana ondae laludopo mpobiniki salado ondaedo, ka sumangano ineheno a mpinesombai mokoburudo,

⁴ kanatuumo Kubinikio humuku ira ka mompotiiako ira hapa anu dinoitoakodo; hangano, tempono Kupepoboi, nahina anu sumangki, tewala Ongkue mepau, nahi domperorongeakono. Ondae mpoweweu anu mosa'o a pongkita-Ku ka laludopo mpobiniki hapa anu nahi Kupe'eheo.

⁵ Rongeomo pau-Do i Ue, hei omiu anu medoitoakono pau-Do! Ondae pepaekompomiu anu umo'aliaakomiu, ka lumiahako komiu hangano nee-Ku, mpotae iramo, ”Moikoomo Dopopokitao i Ue maramba-Do, ka kimengkitao mawongkomiu!” Sine, tendeano ondaemo anu ira mempinokoko'ii.

⁶ Rongeo, suara tewukaa inso a ngkota, rongeo, haweno inso a Raha Mempori! Rongeo, Ondae i Ue mombalo a luwuno iwali-Do!

⁷ Napi pemoluki mompemahaki, onae umariomo me'ana, napi pompemahaki ta me'ana, ipe'anaakonomo ana ntama.

⁸ Isemake anu morongeomo anu gagi kanatuu, isemake anu mongkitaomo anu gagi kanandio? Mentee koake asa mpo'ianga pine'anaako i larono asa oleo, ke asa tongku pine'anaako i larono asa mpiniro? Sine da saraipo ipemoluki mompemahaki, i Sioni umariomo me'anaako ira anano.

⁹ Nde Ongkueke umungkahio pe'anakaano mia, ka nahi Kuweweuo ka ipe'ana? Pau-Do i Ue. Ke nde Ongkueke weweuo mia ka ipe'ana, ka umonsoo mbo'u pe'anakaano? Pau-Do Ue Alamiu.

¹⁰ Memawongkomo saru Yerusale, ka imengkokora-koramo memawongko hangano onae, hei luwuno mia anu kumekewoio! Mawongkomo saru onae temawongko ntu'u, hei luwuno mia anu mpo'inombo hangano onae!

¹¹ ka impo'uo ka gagi tende inso a uwoi uo anu mokorosokomiu, ka impo'oso ka mpenamio uwoi uo inso a uo anu me'ihi.

¹² Hangano, kanandiomo pau-Do i Ue: Menteeano, Kupowaao ndi onae rodoa kana korono, ka kaeado tongku kana keuno korono anu lulua. Komiu mpo'uo, binaba, ka pinoru-porusi a mpe'awia.

¹³ Kana asa mia anu tinarerono ineno, kanatuumo Aku tumarero komiu; komiu mentinarero i Yerusale.

¹⁴ Tempono imengkitao, aroamiu ta mawongko, ka komiu kana ewo anu tuwu mewalo; ka kae-Do i Ue ta mengkaa a luwuno tetenaa-Do, ka tekuda-Do a luwuno iwali-Do.

¹⁵ Menteeano, Ondae i Ue Ira hawe saru api, ka luwuno kareta-Do kana lompiu, motiio tekuda-Do anu tensila ka pewurarai-Do saru api anu kolanga-langa.

¹⁶ Hangano, Ondae i Ue Ira humukuakono api ka ponai-Do luwuno anu tuwu, ka hadioomo mia anu mate pinepate-Do i Ue.

¹⁷ Ondae anu mpopokomempori ka mpokomorinao koroido mpesomba a lere bungano pinesombai, saru mentondao asa mia anu kongko i tonga-tongano, anu mongkaa bauno boe ka luwuno kondehora mokoburu saru tehu, luwudo ira metampula pohona koa, kanatuumo pau-Do i Ue.

¹⁸ Kuto'orio luwuno wineweu ka tinoodo, ka Aku hawe pumpu ira mia inso a luwuno tongku ka pau. Ondae ira me'aiwa ka mengkitao maramba-Ku.

¹⁹ Aku monaa petondoni i tonga-tongado. Aku montena inso i olodo mia anu mentola a luwuno tongku, lumako i Tarasisi, i Puli ka i Ludi, anu teto'oriako pandedo mpepana, melako i Tubali ka Yawani, melako a luwuno togo anu olai anu napi hori domporonge lele mongkona Ongkue ka napi hori domengkitao maramba-Ku. Ira mempaleleo maramba-Ku i olodo luwuno tongku.

²⁰ Ira mewawao luwu pepaekompomiu inso i olodo luwuno tongku gagi pesomba tia-Do i Ue a wawo ngara ka kareta ka a wawo ponsela, a wawo bagali ka unta waino anu magasi, a wawo ntorukuno-Ku anu mempori, lumako i Yerusale, pau-Do i Ue, mengkena kana to Isaraeli mpowawa pesomba a mponaapa anu mempori a laro raha-Do i Ue.

²¹ Inso mbo'u i olodo Aku umala ira sando mpesomba ka to Lewi, pau-Do i Ue.

²² Hangano, mengkena kana langi ka tolino anu wo'ohu anu Aku mokogagio atuu, mo'ia mpiha i aro-Ku, kanandiomo pau-Do i Ue, kanatuumo inulemiu ka neemiu ta mo'ia mpiha.

²³ Wula me'eu wula, ka Saba me'eu Saba, ka luwuno mia ira mehawe mpenggolontu mpesomba i aro-Ku, pau-Do i Ue.

²⁴ Ira mpeluarako ka mengkikitao wata ngkoroido mia anu mpe'ewa iramo ndi Ongkue. Mentee ntu'u, ule-uleno nahi ta mate, ka apino nahi ta mate; luwuno ta gagi mongkokongiriado luwuno anu tuwu.