Yesaya 65 - Wunta Mempori

Hukuno mia tehala ka tekaduduino mia moleo

¹ Kupemoikoo moweeakono pontiso a mia anu nahi pesikeno ndi Ongkue; Kupemoikoo ihawe Aku mia anu nahi ungke Aku. Mepau Aku, ”Ndio Aku, ndio Aku!” a tongku anu nahi poboio nee-Ku.

² I larono asa oleo Kutandeomo kae-Ku a bawaa anu umewa, anu montonda sala nahi moiko ka montonda tinoono onaeno;

³ bawaa anu mokomahakio aroa-Ku nahi penaa-naa i aro-Ku, ondae mpopesombaako pesomba a lere bungano pinesombai ka mpontunu pesomba a wawo watu tela;

⁴ anu mpentoro a ngkaburu ka mperato a laro ngkunepo; anu mpongkaa bau boe ka uwoino bau mokoburu kongko a laro ngkawalido;

⁵ anu motae, ”I ra'aimo mpiha, si umpedaakune, hangano ongkue andio tedoa mempori ndi Omiu!” Luwuno andio kana ahu anu mewinso a laro enge-Ku, kana api anu melanga asa oleo.

⁶ Menteeano, teburiomo i aro-Ku: Nahi Aku mo'ia rodo, sine Aku mompokohina pombaloa, oo, pombaloa a ngkoroido,

⁷ a luwuno salado ondaedo, maupo salado uempu'udo, pau-Do i Ue. Hangano, ondae mpotunu iramo dupa a wawo luwuno torukuno ka mentata Aku a wawo pongku. Aku suma'uo a laro lemba meloedo tambono luwuno wineweudo anu i ndi'ipua!

⁸ Kanandiomo pau-Do i Ue, ”Kana dompotae mia mongkona tonggino wua anggoro anu da hinawe uwoino: Siimo ipepateo luwu atuu, hangano i larono da hinao ronso, kanatuumo Aku weweuo hangano luwuno tetenaa-Ku; nahi Aku mokotampulao luwu.

⁹ Aku wanguo inule inso ndi Yako, ka mia anu me'ue ira torukuno-Ku inso i Yehuda; luwuno mia bininiki-Ku ira mpe'ueo, ka luwuno tetenaa-Ku ira mpo'ia i tu'ai.

¹⁰ Saroni ta gagi tongampadado bawaano bembe bimba, ka Lembono Akoro gagi pepomboleado sapi, tiado bawaa-Ku anu umungke Aku.

¹¹ Sine, ndi omiu anu binta Iramo i Ue, anu kumolupeo torukuno-Ku anu mempori, anu mopatinda kaangano pinesombai Me'uraa, ka mompatinda anggoro mesalo rampa tiano pinesombai Meni,

¹² Aku pakosi komiu memateako ponai, ka luwumiu komiu mpenggolontu ka impepateo! Hangano, tempono Kupepoboi, nahi mesangki, tempono Kupepau, nahi merongeo; omiu mpoweweu hapa anu mosa'o a pongkita-Ku ka laluaopo mebinikio hapa anu nahi Kupe'eheo.”

¹³ Onaemo pu'uno, kanandiomo pau-Do Ue Ala, ”Menteeano, luwuno tetenaa-Ku ira mpongkaa, sine omiu komiu memarasai mokoninggo. Menteeano, luwuno tetenaa-Ku ira mpo'inu sine omiu komiu memarasai mokoranga. Menteeano, luwuno tetenaa-Ku ira memawongko, sine omiu komiu mpohawe mokoko'ii.

¹⁴ Menteeano, luwuno tetenaa-Ku ira mengkokora-kora mpo'ude hangano mawongko aroado, sine komiu mperaali hangano masusa aroa, ka komiu mpengese hangano nahina pompe'osaia.

¹⁵ Omiu asalakono mebintao neemiu a mia mebininiki-Ku ka dompototonaa: Po'ineeomo Ondae Ue Ala mokopingko komiu kana ondae! Sine tetenaa-Ku ira menineeako nee susua,

¹⁶ mia anu ta mohawe ronso i wita andio, ta mo'ema ronso me'empehiako Ondae Ue Ala anu mentee, ka mia anu ta mesumpa i wita andio, ta mesumpa me'empehiako Ondae Ue Ala anu mentee, hangano luwuno ma'isoa anu i ndi'ipua kinolupeomo, ka tewuniomo inso a pongkita-Ku.”

Langi ka tolino anu wo'ohu

¹⁷ ”Hangano menteeano, Ongkue mokogagio langi anu wo'ohu ka tolino anu wo'ohu; mongkona luwuno anu i ndi'ipua nahi ta pinewowolo mbo'u, ka nahi ta me'umbaako mbo'u a laro aroa.

¹⁸ Sine, memawongko ka mengkora-koramo ranta nahina tampulaano a hapa anu pinokogagi-Ku, hangano menteeano, Kupokogagio Yerusale bukeako kokora-kora mawongko ka palilino bukeako mawongkoa.

¹⁹ Aku kokora-kora hangano Yerusale, ka mawongko hangano bawaa-Ku. I larono nahi ta teronge mbo'u pengesea ke maupo peraali.

²⁰ I tu'ai nahi ta hina mbo'u nana'ote anu tuwu butu ba'opia oleo ke mia mota'u anu nahi haweako tende ntinuwu, hangano isema anu mate a ntinuwu asa etu nta'u da ta pinotaeako mongura, ka isema anu nahi haweako asa etu nta'u ta pinotaeako kona ntotonaa.

²¹ Ondae ira mpowangu raha ka mpo'iangario mbo'u; ondae ira mpopahoio lere anggoro ka mengkaano mbo'u wuano;

²² Ondae nahi ira mpowangu hapa-hapa ka dompo'iangario mia susua, ka ondae nahi ira mpompaho hapa-hapa, ka domengkaano mia susua wuano; hangano tinuwudo bawaa-Ku ta mengkena melaino tinuwuno keu, ka mia bininiki-Ku ira mperapio inanggano kaedo.

²³ Ondae nahi ira mpe'isei mpena ke mpe'anaakono nana'ote anu ta mepobingko mate, hangano ondae atuu inuledo mia anu rinonso-Do i Ue, ka inuledo kongko saru ondae.

²⁴ Napi dompebooli, sumangki Akumo; tempono ondae da mpepau, Kurongeomo.

²⁵ Serigala ka ana bimba ira mongkaa ewo meronga-ronga, singa ta mongkaa seami kana sapi ka ule ta tuwu inso a pampawu. Nahina anu moweweu mosa'o ke mogau mokoburu a luwuno torukuno-Ku,” pau-Do i Ue.