Yesaya 64 - Wunta Mempori

¹ Ande-andeno Iberio langi ka Ipetii, ranta luwuno torukuno lelu i aro-Miu,

² kana api anu sumongkoo sampa keu anu motu'i ka kana api mokoredeo uwoi, ka nee-Miu domento'orio anu umewai Komiu, ka luwuno tongku mpondidi-ndidi i aro-Miu.

³ Hangano, Omiu moweweu wineweu mongkokodoito anu nahi kimperorohio, Omiu metii ka luwuno mbo'u torukuno lelu i aro-Miu.

⁴ Mompu'u i ndi'ipua se'eluno nahi hori teronge, nahina biri anu moronge, ka nahina mata anu hori mongkita maupo Ue Ala isua, sangkadio Omiu, anu moweweu tiado mia anu sumikori Ira. Butu Omiu anu moweweu kanatuu.

⁵ Omiu tumotowoo mia anu mawongko moweweu anu mentee, ka anu rumambe-Komiu a nsala anu tiniso-Miu! Menteeano, Omiu tekuda, hangano omami mentehala mompu'u i ndi'ipua se'eluno. Nde kami koa mengkinadudui?

⁶ Kanatuumo luwumami kana asa mia mokoburu ka luwuno pesombamami ntu'u kana sawu hawe wula. Luwumami gagi moleu kana lewe ka tampula hangano mosa'ono wineweumami kana lewe ipaneeo angi.

⁷ Nahina anu moboio nee-Miu ke anu me'usaha metako ndi Omiu; hangano Omiu wunio rupa-Miu ndi omami, ka meweengako kami alaro pokungkuno salamami.

⁸ Sine kanandio-andio, oo Ue, Omiumo Amamami! Omami andio wita pulu ka Omiumo anu weweu kami, luwumami onaemo wineweuno kae-Miu.

⁹ Oo Ue, siimo Itekuda lahi ka siimo Ipewowoloo hala lembuino! Oo, po'ineeomo ka Ikita kami, hangano omami luwu onaemo bawaa-Miu.

¹⁰ Luwuno kota-Miu anu mempori gagiomo pada one, Sioni gagiomo pada one, Yerusale boni-boni.

¹¹ Rahamami anu mempori ka maramba, po'iangado uempu'umami umunde-unde-Komiu, gagiomo pompaani api, ka luwuno pine'uemami anu lalu tekosi gagiomo terawo-rawo.

¹² Kumitao luwuno andio, oo Ue, kana'umpe ka Komiu mo'iaakono, saru mo'ia merodo-rodo ka mokonsii kami kanandio gagiano?